දිනසේන රතුගමගේ
ඉදිරි ජනාධිපතිවරණයේදී දෙමළ ජනතාව නියෝජනය කරමින් දෙමළ අපේක්ෂකයෙකු තොරා ගන්නවාට වඩා දෙමළ ජනතාවගේ ප්රශ්න විසඳා දෙන බවට විශ්වාසය තැබිය හැකි අපේක්ෂකයෙකුට සහය ලබා දීම වඩා වැදගත් බව දෙමළ ජාතික සන්ධානයේ ජෙයෂ්ඨ නායක ආර්.සම්පන්ධන් මන්ත්රීවරයා පැවසීය.
ඊයේ (31) මාධ්ය වෙත අදහස් දක්වමින් මන්ත්රීවරයා කියා සිටියේ මේ අවස්ථාවේදී දෙමළ ජාතික සන්ධානයට පාක්ෂික දෙමළ පක්ෂ කීපයක්ම ඉදිරි ජනාධිපතිවරණයේදී දෙමළ ජනතාව වෙනුවෙන් අපේක්ෂකයෙකු ඉදිරිපත් කිරීම සුදුසු බවට තමන්ට යෝජනා කොට ඇති බවයි.
නමුත් මේ අවස්ථාවේදී එසේ කිරීමෙන් විශාල සහයෝගයක් දෙමළ ජනතව තුළින් එම අපේක්ෂකයාට ලබා ගැනිමට නොහැකි බව සියලු දෙමළ කොටස් තේරුම් ගත යුතු නිසා වඩා හොදම දේ කිරිමට පක්ෂය තීරණය කල යුතු බවද සම්පන්ධන් මන්ත්රීවරයා මෙහිදී කියා සිටියේය.
ඉදිරියේදී ජනාධිපතිවරණයට ඉදිරිපත් වන අපේක්ෂකයා දෙමළ ජනතාවගේ ප්රශ්න විසදීම පිණිස වැදගත් හා පිළිගත හැකි දේශපාලනික විසදුමක් ඉදිරිපත් කළ යුතු වන අතර ඔහු උතුරු නැගෙනහිර පළාත් දෙක එකට එකතු කොට තනි පාලන ව්යුහයක් වශයෙන් සැලකීමට සූදානම් අයෙකු වීම ඉතා වැදගත් බවද මන්ත්රීවරයා මෙහිදී අවධාරණය කළේය.
රනිල් වික්රමසිංහ මහතා ජනාධිපතිවරණයට ඉදිරිපත් වුවහොත් දෙමළ ජාතික සන්ධනය පක්ෂයක් වහයෙන් ඔහුට සහය ලබා දෙන්නේ දැයි විමසූ විට සම්පන්ධන් මන්ත්රීවරයා පවසුවේ ජනාධිපතිවරණය සදහා නාම යෝජනා ලබා දීමෙන් පසුව ඔහු සමග සාකච්ඡා කොට ඒ සදහා තීරණයක් ගන්නා බවයි.
එතෙක් දෙමළ මන්ත්රීවරු වරින් වර සිදු කරණු ලබන ප්රකාශයන් වලංගු නොවන බවද ඔහු මෙහිදී වැඩි දුරටත් කියා සිටියේය.
