කංසා කර්මාන්තය මේ රටේ ප්රවර්ධනය කරන ත්රෛලෝක්ය විජයපත්ර සෝභිනිය හෙවත් නූතන චිංචිට මේ රටේ මුදුන් මුලක් හෝ කිසිම සංස්කෘතික බැඳීමක් තබා එක් ඡන්දයක චන්ද පදනමක් නැති බවත් කංසා විකුණා ඇය මේ රටට ගෙනෙන ඩොලර් කෙසේ වෙත්ත ඇයගේ මඩිය නම් ඩොලර්වලින් තරවනු ඇති බවත් දුම්කොල හා මධ්යාසාර අධිකාරියේ සභාපති මහාචාර්ය වෛද්ය සමාධි රාජපක්ෂ පැවසීය.
ඔහු මේ බව ප්රකාශ කළේ දුම්කොල සහ මධ්යසාර අධිකාරිය මගින් මහජන පරීක්ෂකවරුන් සඳහා බණ්ඩාරනායක ජාත්යාන්තර සම්මන්ත්රණ ශාලාවේ දී පැවත්වූ විශේෂ ඇගයීමේ උත්සවයකට එක් වෙමිනි.
එහිදී මහාචාර් සමාධි රාජපක්ෂ මෙසේ ද පැවසුවේය.
“දැන් ඉන්නවා අපේ රටේ ත්රෛලෝක්ය විජයපත්ර සෝබිනී නූතන චිංචි කියලා නායිකාවක්. ත්රෛලෝක විජයපත්රය ප්රවර්ධනය කරන කාන්තාවක් ඉන්නවා. එතුමිය එක් අවස්ථාවක බුදු දහම පිළිබඳව මහා විශාල දැනුමක් ඇති කෙනෙක් විදිහට කියනවා ලොව්තුරා ගෞතම බුදු පියාණන්වහන්සේ ගංජා ගැහුවා කියලා.“
ඔන්න එතුමියගේ දැනුම. අපේ රටේ මිනිස්සු මේවා අහගෙනත් ඉන්නවා.
තව තැනක කියනවා දුම්කොලවලින් තමයි පිළිකා හැදෙන්නෙ. ඒ තාරයි නිකොටිනුයි නිසා. නමුත් කංසාවලින් කැන්සර් හැදෙන්නෙ නෑ කියලා. ඒ විජයපත්ර සෝභිනියට ඒ තරම් දැනුමක් තියනවා.
මා බොහොම පැහැදිලිව කියනවා මේ රට වෙනත් දිශානතියකට මේ ගෙනියන්නෙ. දැන් දුම්කොලවලට පහර වැදීගෙන එනවා. ය 1970 ඉඳන් අපිට පැහැදිලි තොරතුරු තියනවා දුම්කොල කර්මාන්තය ගංජා ව්යාපාරය ප්රවර්ධනයට සල්ලි වියදම් කරපු හැටි.
දැන් මේ සෝබිනිය කතා කරන්නෙ රටට ඩොලර් ගේන්න. රටට නම් ඩොලර් ලැබෙන්නෙ නෑ කංසා විකුණලා. තමන්ගේ මඩියට ඩොලර් ලැබෙන බව මා ඉතාම හොඳින් දන්නවා.
මේ රටේ මුදුන් මුලක් නැති, කිසිම සංස්කෘතික බැඳීමක් නැති, අඩුම ගානෙ එක ඡන්දයක් වත් නැති, මේ අය ඡන්දෙන් පත්වෙච්චි අය නෙමෙයි, මේ තියන ප්රශ්නයට විසඳුම හැටියට කංසා ලණු අඹරනවා. මේ අය තමයි ඊලඟට අපට එන අභියෝගය .
දැන් මැසේජ් එකක් එනවා කංසාවලින් හදපු සිගරට් රටට ආනයනය කරන්න යනවා කියලා…
මේ රටේ හිටිය ප්රබල කැබිනට් ඇමතිවරයෙක් කුරුඳුවලින් හදපු සිගරට් එකක් කටේ ගහගත්තාම අපි එක රැස්වීමයි තිබ්බේ. ඒ රැස්වීමේ දි මම කිව්වා මම හිතුවෙ පංචායුදේ දිලිසෙනකොට පෙරාපු රත්තරන් කියලා. බලනකොට මේක මලකඩ කාපු බෙලෙක් කෑල්ලක් කියලා. ඒ කියපු ගමන් ප්රචාරණය නවත්තලා දැම්මා.
