කපිල කේ හීනටියන –
-
එක්ව එක්සත් රාජධානියට පැමිණි යුවල අතර ආරවුල් ඇති වෙලා තිබෙන්නේ බිරිය සේවා ස්ථානයේ තරුණයෙක් සමග සම්බන්ධයක් ගොඩනගා ගත්තට පස්සේ… බිරිය ඝාතනයෙන් පසු ඝාතක සැමියා සිය දිවි නසා ගැනීමට උත්සාහ කරලා…
-
මානුෂික සබඳතාවල ස්වරූපය පිළිගැනීමට නොහැකි වූ වෛරී පුද්ගලයෙකුට සිදුකළ හැකි විනාශය ගැන දකුණු වේල්ස් පොලිසිය සහ රජයේ නීතිපති දෙපාර්තමේන්තුවෙන් අවධාරණයක්…
එක්සත් රාජධානියේ මෙන්ම ශ්රී ලංකාවේ ද ප්රජාවන් දැඩි කම්පනයට පත් කරමින්, සිය බිරිඳ අමානුෂික ලෙස ඝාතනය කිරීම සම්බන්ධයෙන් වරදකරු වූ 37 හැවිරිදි තිසර වේරගලගේ නැමැත්තාට බ්රිතාන්ය අධිකරණය විසින් ජීවිතාන්තය දක්වා සිරදඬුවම් නියම කර තිබේ. මෙලෙස ඝාතනයට ලක්ව ඇත්තේ ඔහුගේ බිරිඳ වූ 32 හැවිරිදි නිවුන්හැල්ලගේ දෝන නිරෝධා කල්පනී නිවුන්හැල්ල නැමැති කාන්තාවකි.
මෙම අවාසනාවන්ත ඝාතනය 2025 අගෝස්තු 21 වන දින වේල්සයේ කාර්ඩිෆ් හි රිවර්සයිඩ් ප්රදේශයේ පිහිටි නේවාසික රථ ගාලකදී සිදුව ඇති අතර, නිරෝධා වෙත එල්ල වූ බහුවිධ පිහි ඇනුම් හේතුවෙන් ඇය එම ස්ථානයේදීම මියගොස් ඇත. අධිකරණයේදී අනාවරණය වූ කරුණු අනුව, මෙය ඉතා දරුණු මෙන්ම කල්තියා සැලසුම් කරන ලද ප්රහාරයක ප්රතිඵලයකි.
ශ්රී ලංකාවේ සිට සංක්රමණය වූ මෙම යුවළ ඝාතනය සිදුවීමට මාස කිහිපයකට පෙර සිට වෙන්ව ජීවත් වී ඇති අතර, ඔවුන්ගේ විවාහ සබඳතාව බිඳ වැටීමට හේතු වී ඇත්තේ නිරෝධා සිය රැකියා ස්ථානයේ සගයෙකු සමඟ නව සබඳතාවක් ආරම්භ කිරීමයි.
අධිකරණ ක්රියාදාමයේදී වැඩිදුරටත් හෙළි වූයේ වේරගලගේ සිය බිරිඳගේ නව ජීවන රටාව පිළිබඳව දැඩි වෛරයකින් සහ මෝහනයකින් පසුවී ඇති බවයි. ඔහු ඇයගේ නව සහකරු පදිංචි ස්ථානය අසල කිහිප වතාවක්ම රැකවල් ලා සිටිමින් සහ ඔවුන්ගේ රථ වාහනවල ඡායාරූප ලබාගනිමින්, මෙම දරුණු ප්රහාරය ඉතා සූක්ෂ්ම ලෙස සැලසුම් කර ඇති බව නඩු විභාගයේදී තහවුරු විය.
අධිකරණයේදී ඉදිරිපත් වූ සාක්ෂිවලට අනුව, මෙම ඝාතනය සිදුකිරීමට පෙර දින වේරගලගේ විසින් ‘B&M’ වෙළඳසැලකින් මුළුතැන්ගෙයි පිහි තුනක් මිලදී ගෙන ඇති අතර, ඉන් එක් පිහියක් මෙම මාරාන්තික ප්රහාරය සඳහා යොදාගෙන තිබේ. ප්රහාරයෙන් පසු සැකකරු එම ස්ථානයෙන් පලාගොස් ඇති අතර, පසුව ඔහු ලොරි රථයකට පැන සියදිවි නසා ගැනීමට උත්සාහ කර ඇතත් එහිදී ඔහුට සිදුව ඇත්තේ සුළු තුවාල පමණි. ඔහු ගමන් කළ ‘ෆෝඩ් ෆියෙස්ටා’ වර්ගයේ රථය තුළ තිබී ලේ තැවරුණු අත්වැසුම් සහ තවත් සාක්ෂි පොලිසිය විසින් සොයාගෙන තිබේ.
ආරම්භයේදී තමන් වැරදිකරු නොවන බව ප්රකාශ කළද, 2026 ජනවාරි මාසයේදී නිව්පෝට් ක්රවුන් අධිකරණයේදී (Newport Crown Court) ඔහු සිය වරද පිළිගත්තේය. ඒ අනුව, 2026 පෙබරවාරි 20 වන දින කාර්ඩිෆ් ක්රවුන් අධිකරණයේදී නඩු තීන්දුව ප්රකාශයට පත් කරමින් විනිසුරු ඩැනියෙල් විලියම්ස් වේරගලගේට ජීවිතාන්තය දක්වා සිරදඬුවම් නියම කළේය. ඔහුට ඇප ලබා ගැනීමට සුදුසුකම් ලැබීමට පෙර අවම වශයෙන් වසර 23කුත් මාස නවයක සිරදඬුවමක් විඳිය යුතු බවටද එහිදී නියෝග කෙරිණි. නිරෝධාගේ ජීවිතය අකාලයේ උදුරා ගැනීම “ම්ලේච්ඡ ආත්මාර්ථකාමීත්වයක්” ලෙස විනිසුරුවරයා එහිදී දැඩි ලෙස හෙළා දුටුවේය.
අධිකරණයේදී කියවන ලද අතිශය සංවේදී සාක්ෂියකදී, නිරෝධාගේ පියා ප්රකාශ කර සිටියේ ඇය තම “එකම දියණිය” වූ බවත්, ඇය සැමගේ ආදරය දිනාගත් තැනැත්තියක් වූ බවත්ය. දකුණු වේල්ස් පොලිසිය විසින් නිකුත් කරන ලද නිවේදනයක ඇයගේ පවුලේ සාමාජිකයන් සඳහන් කර ඇත්තේ, මෙම ප්රචණ්ඩකාරී ක්රියාව හේතුවෙන් තමන්ට සිදුවූ අහිමි වීම සහ වේදනාව වචනයෙන් විස්තර කළ නොහැකි බවය.
පවුල් ආරවුල්, ඊර්ෂ්යාව සහ සබඳතාවක් අවසන් වීම පිළිගැනීමට ඇති නොහැකියාව කෙතරම් විනාශකාරී ප්රතිඵල ගෙන දිය හැකිද යන්න මෙම සිදුවීම මගින් මනාව පැහැදිලි වන බව දකුණු වේල්ස් පොලිසිය සහ රජයේ නීතිපති දෙපාර්තමේන්තුව මෙහිදී අවධාරණය කර ඇත.
