මනම්පිටිය නිමල් ජයරත්න –
රජය වී සඳහා සහතික මිලක් නියම කර තිබියදී පොළොන්නරුවේ, ප්රකට සහල් ව්යාපාරිකයෙක් වන ඩඩ්ලි සිරිසේන වී කිලෝවක් රුපියල් 140 කට මිලදී ගන්නා බවට, මාධ්යයට ප්රකාශයක් සිදුකර ඇති බවත්, එම මිලට වී මිලදී ගත්තද කිසිදු ලෙසකින් ඔහුට සහල් පාලන මිල ඉහළ දමා පාරිභෝගිකයා තවදුරටත් අමාරුවේ දැමීමට ඉඩ නොතබන බව, නිවාස සංවර්ධන නියෝජ්ය අමාත්යය ටී.බී. සරත් සඳහන් කළේය.
වත්මන් රජය ඉදිරි වසර පහ කාලය තුළ වෙනස් නොවන බවත් ,ඊළඟ වසර පහද දිනන්නේ ජාතික ජන බලවේගය බවත්, එය කිසිවෙකුට වෙනස් කිරීමට නොහැකි බවදත් නියෝජ්ය ඇමතිවරයා කීවේය.
ඊයේ (10) පොළොන්නරුව වැලිකන්ද රුහුණුකෙත ගම්මානය වටා මහවැලි පුනරුද සතියට සමගාමී අලි වැටක් ඉදිකිරීමේ අවස්ථාවට එක්ව මහජනතාව අමතමින් නියෝජ්ය ඇමතිවරයා ඒ බව කීවේය.
නිවාස සංවර්ධන නියෝජ්ය අමාත්ය ටී.බී. සරත් මෙසේද පැවසුවේය.
” රජය රුපියල් 120 ක සහතික මිලක්, වී කිලෝවකට දීලා තියෙනවා. අපේ රජය වී කිලෝවක නිෂ්පාදන මිල රුපියල් දහතුනකින් අඩු කරලා තියෙනවා. වී කිලෝවක් නිෂ්පාදන වියදම තිබුනේ රුපියල් 100 කට. අපේ රජය 87 දක්වා ඒක අඩුකළා.
ඒ වගේම අපි වී කිලෝවක රුපියල් 105 ට තිබුන සහතික මිල රුපියල් 120 දක්වා වැඩි කළා. හැබැයි දැන් විවිධ පුද්ගලයන් විවිධ සංවිධාන ප්රකාශ කරන්න පටන් අරන් තියනවා සහතික මිල රුපියල් 140 ක් කරන්න කියලා. මේ රටේ ප්රබලම සහල් ව්යාපාරිකයා ඩඩ්ලී සිරිසේන මහතත් ප්රකාශ කර තිබෙනවා සහතික රුපියල් 140 කරන්න කියලා. අපි අහනවා එහෙම වුණොත් මේ රටේ සහල් පාරිභෝගිකයා සහල් කන්නේ කීයටද කියලා. එකසිය හතලිහ නෙමෙයි දෙසිීය කරන්නත් පුළුවන්. හැබැයි ඒ අය සහල් වලටත් මිලක් ඉල්ලනවා.
වී කිලෝවකට අපි මේ මිල කියලා තියෙන්නෙ නිෂ්පාදකයයි, වී ගොවියයි, සහල් පාරිභෝගිකයයි ගැන හිතලා. අපේ රටේ ගොවි ජනතාවත් දැන් පෙලඹිලා ඉන්නවා ප්රමිතියෙන් යුතු සහල් පාරිභෝජනය කරන්න. ඒ නිසා මේ රටේ භාණ්ඩයක මිල තීරණය විය යුත්තේ රටේ පුරවැසියාට මිලදී ගැනීමට පවතින හැකියාව මත.
අපි ගොවි ජනතාවට ලාභ අරන් දියයුතු වන්නේ ගොවිජනතාවට වී කිලෝවට යන නිෂ්පාදන වියදම අඩු කරලා. නිෂ්පාදනයේ ඵලදා වැඩිකරලයි. තව කන්න දෙක, තුනක් යනකොට අපි ඒකට වැඩ පිළිවෙළක් සිදුකරනවා. ඒ සඳහා නව පොහොර වර්ග, බීජ වර්ග හඳුන්වාදීමට කටයුතු කරනවා, නව තාක්ෂණය හඳුන්වා දීලා තෙල් පොහොර සඳහා යන වියදම අඩු කිරීම තමයි අපේ අරමුණ. නියෝජ්ය ඇමතිවරයා සඳහන් කළේය.
