දළදා මාළිගාවට බෝම්බ ගැසු ජනතා විමුක්ති පෙරමුණේ පිරිස සම්බන්ධව තොරතුරු නැතැයි පැවසීම මුසාවක් බවත්, දැනට ඇති තොරතුරු සහිත වාර්තාවක් පාර්ලිමේන්තුව තුළ සභාගත කරන ලෙසත් පාර්ලිමේන්තු මන්ත්රී දයාසිරි ජයසේකර අද (23) මහජන ආරක්ෂක ඇමති ආනන්ද විජේපාලගෙන් ඉල්ලා සිටියේය.
ඔහු මේ බව ප්රකාශ කරන්නේ රෝහිනී කුමාරි කවිරත්න විසින් මහනුවර දළදා මාළිගාව ඉදිරිපිට මහා මාර්ගය විවෘත නොකර සිටීම සම්බන්ධ ප්රශ්නයට අදාලව පිළිතුරු දෙමින් ජනතා විමුක්ති පෙරමුණ චෝදනා ලබන දළදා මාළිගාවට බෝම්ම එල්ල කළ සිද්ධිය සම්බන්ධව තොරතුරු නොමැති බව පාර්ලිමේන්තුවට කී අවස්ථාවේ දී ය.
සිද්ධිය පෙළ ගැසෙන්නේ මෙසේය.
දළදා මාළිගාවට ප්රහාර එල්ල කළ එල්.ටී.ටී. සංවිධානය නොමැති බැවිනුත් ජනතා විමුක්ති පෙරමුණ ප්රජාතන්ත්රවාදී දේශපාලනයට පැමිණ රාජ්ය බලය ද හොබවන බැවිනුත් දළදා වහන්සේට තවදුරටත් තර්ජනයක් නොමැති නිසා වසා ආරක්ෂක හේතු පදනම් කරගෙන වසා දැමූ දළදා මාළිගාව ඉදිරිපිට මාර්ගය යළි විවෘත කර නුවර නගරයේ පරිසර දූෂණය වැළැක්වීම කටයුතු කරන ලෙස අද රෝහිණී කුමාරි කවිතරත්න මන්ත්රීවරිය ඉල්ලා සිටියාය.
ඇය කීවේ දළදා මාළිගාව ඉදිරිපිට මාර්ගය වසා දැම්මේ දළදා මාළිගාවට එල්ල වුන මෙම ප්රහාර දෙක නිසා බවය.
ඇය ඉදිරිපත් කළ ප්රශ්නයට අදාල දෙවැනි අතුරු ප්රශ්නය විමසුවේ පාර්ලිමේන්තු මන්ත්රී දයාසිරි ජයසේකර විසිනි. ඔහු ප්රකාශ කළේ ජනතා විමුක්ති පෙරමුණ විසින් දළදා මාළිගාවට බෝම්බ එල්ල කිරීමට උත්සාහ කිරීමේ සිද්ධියට සම්බන්ධව මහජන ආරක්ෂක ඇමතිවරයා විසින් කළ ප්රකාශය සාවද්ය එකක් බවය.
ඔහු ප්රකාශයක් කරමින් දළදා මාලිගාවට බෝම්බ ගැසූ සිද්ධියේ සැකකරුවන් හා විමර්ශන පිළිබඳ හෙළි කරමින් මෙසේ කීවේය.
“අවුරුදු 36ක් නිසා මේ සම්බන්ධව තොරතුරු නෑ කියනවා. 1989 පෙබරවාරි 08 දළදා මාළිගාවේ මුරපොළවල් 05කට පහර දීලා ටී81 රයිෆල් තුවක්කු 09ක්, ටී 56 රයිෆල් තුවක්කු 02ක්, ඇතුළු ගිනි අවි 17ක් පැහැර ගෙන ගොස් තිබෙනවා. ඒ වගේම මේකට සම්බන්ධ වෙලා තිබුණු පද්මා චාන්දනී නැමැත්තියක් අත් අඩංගුවට ගෙන තිබෙනවා, මාතලේ ගංගා, මංගලිකා, නදීකා, නිලන්ති සහ වීරසිංහ නැමැති අය අත්අඩංගුවට ගෙන තිබෙනවා. ඒ වගේම තිබ්බටුවාවේ ඤාණරතන කියන හාමුදුරුනමක් තමයි කිරිච්චියක් අරන් ගිහින් නිලමේ තුමාගේ බෙල්ලට පිහිය තියලා තිබෙන්නෙ.”
“ඒවගේම 1818න් පස්සේ 1989 දි තමයි දළදා වහන්සේට ප්රහාරයක් කරන්න පෙළඹුනේ. ඔබතුමාගෙන් අහන ප්රශ්නය තමයි කුඹල් පෙරහර කරන්න බැරිව දළදා කරඬුව අතේ තියාගෙන තමයි දියවඩන නිලමේ තුමා ආවේ. ඔබතුමා පොලිසියේ හිටපු කෙනෙක් විදිහටත්, වර්තමාන පොලිස් ඇමතිවරයා හැටියටත් මම කියන්නේ. අවුරුදු 36කට පස්සෙත් තොරතුරු තියනවා මේ සම්බන්ධව. ගෞරවයෙන් ඉල්ලලා මේක සභාගත කරන්න කියලා ඉල්ලීම කරනවා.”
ඊට පිළිතුරු දෙමින් පොලිස් ඇමතිවරයා මෙසේ පැවසුවේය.
” මේ සම්බන්ධව පැහැදිලි පිළිතුරක් දුන්නා. තොරතුරු නෑ කියලා තමයි පොලිසියෙන් කියන්නේ.”
