දිවයිනේ විවිධ ප්රදේශවල ව්යාප්තව ඇති කොකේන් හෙරොයින් අයිස් ඇතුළු විෂ මත්ද්රව්ය සම්බන්ධයෙන් ජනතාවට ඍජුව තොරතුරු දැනුම් දීම සඳහා මීට පෙර පළාත් භාර නියෝජ්ය පොලිස්පතිවරුන්ගේ දුරකථන අංක මාධ්ය වෙත නිකුත් කෙරිනි.
එම අංකවලට අමතරව අද සිට අදාල ජ්යෙෂ්ඨ නියෝජ්ය පොලිස්පතිවරුන් යටතේ සිටින දිසා භාර නියෝජ්ය පොලිස්පතිවරුන් සහ කොට්ඨාස භාර ජ්යෙෂ්ඨ පොලිස් අධිකාරීවරුන්ගේ අංක ද මහජනතාවට තොරතුරු ලබා දීම සඳහා නිකුත් කර ඇත.
අදාල තොරතුරුවල ආරක්ෂිත භාවය සුරකින බවද පොලිසිය ප්රකාශ කරයි.
මේ අතර මහජන ආරක්ෂාව පිලිබඳ අමාත්ය ආනන්ද විජේපාල කීවේ සංවිධානාත්මක අපරාධකරුවන් විසින් භාවිතා කළ දුරකථන 31ක් ඔස්සේ මේ වනවිට විමර්ශන පැවැත්වෙමින් ඇති බවත්, එම විමර්ශනවලින් හෙළිවන දේපාලනඥයින් හෝ වෙනත් ඕනෑම පුද්ගලයෙකුගේ තරාතිරම නොබලා නීතිය ක්රියාත්මක කිරීමට සූදානම් බවත්ය.
