අල්ලස් ලබා ගැනීමේ සිද්ධියක් සම්බන්ධව අත් අඩංගුවට ගත් ගම්පහ මූලස්ථාන පොලිසියේ අපරාධ අංශයේ ස්ථානාධිපති ප්රියංකර රාජපක්ෂ ලබන 06 වැනිදා දක්වා රක්ෂිත බන්ධනාගාරගත කර තිබේ.
ඒ ඔහු අද දහවල් කොළඹ අතිරේක මහේස්ත්රාත් ලහිරු වරුෂවිතාන හමුවට ඉදිරිපත් කළ අවස්ථාවේ දී ය.
ජා ඇල දඬුගම ප්රදේශයේ ව්යාපාරිකයෙක් කළ පැමිණිල්ලකට අනුව ගම්පහ මූලස්ථාන පොලිසියේ අපරාධ අංශයේ ස්ථානාධිපතිවරයා අත් අඩංගුවට පත් වන්නේ ඊයේ දිනයේ දී ය.
පුද්ගලයෙක් සොරකම් කළ රන් භාණ්ඩ තොගයක් පැමිණිලිකරු මිලදී ගෙන ඇතැයි පවසා ඒ සම්බන්ධයෙන් නීතිමය ක්රියා මාර්ග නොගෙන සිටීම සඳහා මෙම නිලධාරියා රුපියල් ලක්ෂ 03ක අල්ලසක් සහ රන් පවුම් තුන් කාලක් ඉල්ලා තිබේ.
ඉන් රුපියල් දෙලක්ෂ පනස් දහසක් ලබා ගන්නා අවස්ථාවේ දී පොලිස් නිලධාරියා අල්ලස් හෝ දූෂණ විමර්ශන කොමිසමේ නිලධාරීන් විසින් අත් අඩංගුවට ගෙන තිබේ. අල්ලස් කොමිසමේ නිලධාරීන් අධිකරණයෙන් ඉල්ලා සිටියේ විමර්ශන තව දුරටත් ක්රියාත්මක බැවින් සැකකරු රක්ෂිත බන්ධනාගාරගත කරන ලෙසය.
සැකකරු සුදුසු ඇප කොන්දේසියක් මත මුදා හරින්නැයි ඔහු වෙනුවෙන් පෙනී සිටි නීතිඥවරයා ඉල්ලීමක් කළේය.
කරුණු සලකා බැලූ අතිරේක මහේස්ත්රාත්වරයා ඉදිරි නඩු දිනයේ දී කොළඹ මහේස්ත්රාත් අධිකරණයේ දී ඇප ඉල්ලීම සිදුකරන ලෙස දන්වා සිටියේය.
නඩුව ජනවාරි 06 වැනිදා යළි කැඳවීමට නියමිතය.
මේ ලිපියත් කියවන්න…
ගම්පහ අපරාධ අංශ ස්ථානාධිපති ප්රියංකර රාජපක්ෂ අල්ලසක් ගැනීමේදී අල්ලස් කොමිසමේ අත් අඩංගුවට…
