පොහොර උර 19 ක අසූරා සඟවා තබා තිබූ මෙතම්ෆෙටමින් හෙවත් අයිස් මත් කුඩු කිලෝ 345ක් පමණ ප්රමාණයක් සැකකරුවන් 07 දෙනෙක් සමග බස්නාහිර උතුර අපරාධ විමර්ශන කොට්ඨාසය විසින් තිස්සමහාරාම ප්රදේශයේ දී අත් අඩංගුවට ගෙන තිබේ.
මෑත ඉතිහාසයේ ගොඩබිම සිදුවූ විශාලතම මත්ද්රව්ය අත් අඩංගුවට ගැනීම්වලින් එකක්වන මෙම මෙහෙයුමේ දී පොලිසිට හසුවූ සැකකරුවන් 07 දෙනා අතර මෙම මත්ද්රව්ය තොගය රට තුළට ගෙනා මහ මොළකරු ද සිටින බව විමර්ශන අංශ කියයි.
ඩුබායි හි පදිංචිව සිටින රන් මල්ලි නමින් හැඳින්වෙන කුප්රකට මත්ද්රව්ය ජාවාරම්කරුවෙකුට අයත් යැයි විශ්වාස කරන මෙම මත්ද්රව්ය තොගය අත් අඩංගුවට ගෙන ඇත්තේ තිස්සමහාරාම කිරින්ද නිදන්ගල ප්රදේශයේ සඟවා තිබියදීය.
කොළඹ අවට ප්රදේශවල පුද්ගලයින්ට හිමිකම් ඇති මෙම මත්ද්රව්ය ජාලායට සම්බන්ධ ලොරි, මෝටර් රථ ඇතුළු වාහන හයක් ද මෙහෙයුමේ දී පොලිසිය සිය භාරයට ගෙන තිබේ.
මත්ද්රව්ය බෝට්ටුවකින් රට තුළට ප්රවාහනය කර ඇති බවට විමර්ශකයින් සැක කරන නමුත් මෙහෙයුම සඳහා භාවිතා කළ යාත්රාව තවමත් සොයාගෙන නොමැත.
බස්නාහිර උතුර අපරාධ විමර්ශන කොට්ඨාසයට ලැබී තිබූ තොරතුරකට අනුව කළ මෙම වැටලීමට තංගල්ල පොලිස් කොට්ඨාශය සහ විශේෂ කාර්ය බලකාය (STF) සහාය ලබා දී ඇත.
පොලිස් මාධ්ය ප්රකාශක සහකාර පොලිස් අධිකාරී එෆ්.යූ. වූට්ලර් තහවුරු කර ඇත්තේ සැකකරුවන්ගෙන් ප්රශ්න කරමින් සිටින බවත් අතුරුදහන් වූ බෝට්ටුව සොයා ගැනීමට උත්සාහ කරන බවත්ය.
