බොරැල්ල – කොටාපාර වෙස්ටන් පුද්ගලික රෝහල තුළ සිදුවී ඇතැයි චෝදනා එල්ල වී ඇති වකුගඩු ජාවාරමට සම්බන්ධ සැකකරුවෙක් කොළඹ අපරාධ කොට්ඨාසය විසින් ඊයේ (05) අත්අඩංගුවට ගෙන තිබේ.
අත්අඩංගුවට ගත් සැකකරු කොළඹ 15 කජීමාවත්ත ප්රදේශයේ පදිංචි 41 හැවිරිදි පුද්ගලයෙකි.
මෙම තැනැත්තා වකුගඩු මුදලට ලබා දෙන පුද්ගලයා හා ලබා ගන්නා පාර්ශවය අරත සම්බන්ධීකරණයක් කරමින් තැරැව්කරුවෙක් ලෙස කටයුතු කර ඇති බව හෙළි වී ඇත.
මොහු තැරැව් කරුවෙක් ලෙස ලබා ගන්නා කොමිස් මුදලට අමතරව වකුගඩු ලබා දෙන පුද්ගලයා වෙත ලබා දෙන මුදලින් ද කොටසක් වංචා කර ඇතැයි අනාවරණය වී තිබේ.
සැකකරු අද (06) දින අධිකරණයට ඉදිරිපත් කිරීමට නියමිතව ඇත.
දිළිඳු පුද්ගලයින්ගෙන් වකුගඩු ලබාගෙන ඔවුන්ට පොරොන්දු වූ මුදල ලබා නොදීම සම්බන්ධව පුද්ගලයින් 04 දෙනෙක් හා එක් කාන්තාවක් බොරැල්ල පොලිසිය වෙත සිදුකළ පැමිණිල්ලකට අනුව කොළඹ අපරාධ කොට්ඨාසයේ නිලධාරීන් විසින් මෙම විමර්ශනය ආරම්භ කර තිබේ.
මෙම තැරැව් කරුවා ඊයේ සවස අපරාධ පරීක්ෂණ දෙපාර්තමේන්තුව වෙත ඉදිරිපත් වීමෙන් අනතුරුව අත්අඩංගුවට ගෙන තිබිණි.
