වර්ෂ 2010 වසරේ සිට 2025 වසර දක්වා කාලය තුළ කොළඹ මහ නගර සභාව තුළ සිදුවී ඇති දුෂණ, වංචා සහ අපරාධ සම්බන්ධව පූර්ණ විමර්ශනයක් කිරීම සඳහා ජනාධිපතිවරයා විසින් විශේෂ පරීක්ෂණ කොමිෂන් සභාවක් ගැසට් මගින් ප්රකාශයට පත් කර තිබේ.
1948 අංක 17 දරන පරීක්ෂණ කොමිෂන් සභා පනතේ 2 වන වගන්තියෙහි විධිවිධාන ප්රකාරව හිටපු මහාධිකරණ විනිසුරු නීතීඥ පියසේන රණසිංහ , ශ්රි ලංකා ගණකාධිකාරී සේවයේ පළමු ශ්රේණියේ නිලධාරියෙක් වූ ඊ. ආර්. එම්.එස්.එච්. ඒකනායක හිටපු ජ්යෙෂ්ඨ පොලිස් අධිකාරී ඩී. එස්. වික්රමසිංහ ජනාධිපතිවරයා විසින් මෙම පර්යේෂණ කොමිසමට පත් කර තිබේ.
කොළඹ මහ නගර සභාව තුළ සිදුව ඇති දූෂණ සහ වංචා ක්රියා, සාපරාධි ලෙස විශ්වාසය කඩ කිරීම, දේපළ සාපරාධී ව්යපහරණය, රැවටීම, රාජ්ය සම්පත් හා වරප්රසාද අනිසි ලෙස පාවිච්චි කිරීම හෝ අවභාවිතය, නීත්යානුකූල නොවන බඳවා ගැනීම් හා පත් කිරීම්, නීති විරෝධී සැලසුම්, ප්රසම්පාදන මාර්ගෝපදේශ සංග්රහයේ විධිවිධාන උල්ලංඝනය කිරීම්, නිශ්චල හෝ චංචල දේපළ කුලියට හෝ බද්දට දීමේදී සිදුකර ඇති අක්රමිකතා, නිසි කාර්යය පටිපාටියෙන් බැහැරව සිදු කර ඇති නඩු කටයුතු, සම්බන්ධව විමර්ශනයට මෙම කොමිසමට බලය පැවරී ඇත.
එමෙන්ම සමථ කිරීම් හා බේරුම් කිරීම සහ එකී වරදවල් සහ වැරදි ක්රියාවන්හි ප්රතිඵලයක් ලෙස රාජ්ය වත්කම් වලට රාජ්ය ආදායමට බරපතල අලාභ හෝ හානි සිදු වීම සම්බන්ධයෙන් දේශපාලන පදවි දැරූ හෝ තවදුරටත් දරමින් සිටින පුද්ගලයන්ට සහ රජයේ සේවකයන් වශයෙන් සහ ව්යවස්ථාපිත මණ්ඩලයන්හි නිලධරයන් වශයෙන් සේවයේ නිරතව සිටි හෝ තවදුරටත් සේවයේ නිරතව සිටින පුද්ගලයන්ට සහ සේවා සහ සැපයීම් සිදු කරන පුද්ගලයන්ට සහ රාජ්ය හෝ පෞද්ගලික ආයතන හෝ පුද්ගලයන්ට එරෙහි බරපතල චෝදනා පිළිබඳව මහජන පැමිණිලි, තොරතුරු සහ සෙසු කරුණු කැඳවීම හා ලබා ගැනීමට කොමිසමට බලය ලබා දී ඇත.
විමර්ශන කාර්යය සිදු කරගෙන යාමේ දී ඉහත 2010 – 2025 කාල සීමාවෙන් ආවරණය නොවන හෝ ඉහත සඳහන් ක්රියා වලට පරිබාහිර එහෙත් පරීක්ෂණ කොමිෂන් සභාවට බරපතල ස්වභාවයේ බවට හැඟී යන වරදක් හෝ වැරදි සම්බන්ධයෙන් මහජන පැමිණිලි, තොරතුරු සහ සෙසු කරුණු කැඳවීමට ද කොමිෂන් සභාවට ඉඩ කඩ සලසා දී ඇත.
පසුගිය දශක ගණනාවක් පුරා කොළඹ මහ නගර සභාවට අයත් ඉඩම්, ගොඩනැගිලි ඇතුළු සියලු දේපළ සම්බන්ධයෙන් ද නගර සභාව මගින් සිදු කරන සැපයුම්, සේවා, ව්යාපෘති සහ විවිධ සංවර්ධන කටයුතු සම්බන්ධයෙන් ද සිදු වී ඇතැයි කියනු ලබන දුෂණ ක්රියා, වංචා, සාපරාධී ලෙස විශ්වාසය කඩ කිරීම, දේපළ සාපරාධී ව්යපහරණය, රැවටීම, බලය හෝ අධිකාරය, රාජ්ය සම්පත් හා වරප්රසාද අනිසි ලෙස පාවිච්චි කිරීම හෝ අවභාවිතය සම්බන්ධයෙන් දේශපාලන පදවි දැරූ හෝ තවදුරටත් දරමින් සිටින පුද්ගලයන්ට නිලධාරීන්ට, සේවා සපයන්නන්ට එරෙහිව පැමිණිලි සහ චෝදනා විශාල සංඛ්යාවක් ඉදිරිපත්ව ඇති හෙයින් මෙම පරීක්ෂණ කොමින් සභාව පත් කර ඇතැයි කොමිෂන් සභාව පත් කරමින් නිකුත් කළ ගැසට් නිවේදනයේ සඳහන් වේ.
