කොළඹ නගර සභාවේ බලය නැතුව මුජිබර්ට නින්ද නොයන්නේ ඇයි?.

විශේෂ ලියුම්කරුවෙක් විසිනි –

කොළඹ නගරයේ වාහන ගාල් කළමනාකරණය කියලා කියන්නේ මහා පරිමාණ වංචා ක්ෂේත්‍රයක්.  විගණනයකින් මේ ගැන හෙළිදරව් වෙලා තියෙන දේවල් ඇහුවම අහන මිනිස්සුත් කම්පාවට පත් කරනවා.  මේ කතාව දේශපාලන බලය පාවිච්චි කරලා, අපේම සල්ලි කොහොමද හොරා කන්නේ කියලා පෙන්නුම් කරන හොඳම උදාහරණයක්.

කොන්ත්‍රාත් දුන්න හැටි – අමුතුම කතාවක්!

වාහන ගාල්වල ගාස්තු අය කරන්න පෞද්ගලික ආයතන තෝරන්නේ කොහොමද කියලා නීති රීති තියෙනවා. කලින් කුලී ගෙවීම් පැහැර හැරපු ආයතනවලට කොන්ත්‍රාත් දෙන්න බැහැ. මේක පැහැදිලි නීතියක්. හැබැයි, විගණනයේදී පෙනී ගිහින් තියෙනවා මේ නීතිය කිසිසේත්ම පිළිපදලා නැති බව. කුලී ගෙවීම් පැහැර හැරපු ආයතනවලටම ආයෙත් කොන්ත්‍රාත් දීලා!

Sadid Enterprises කියලා ආයතනයක් මේකට හොඳම උදාහරණය. මෙයාලා 2015, 2016, 2017 අවුරුදු තුනටම නගර සභාවට ගෙවන්න ඕන රුපියල් මිලියන 9.9ක් විතර ගෙවලා නැහැ. එහෙම නොගෙවා ඉද්දිත්, 2018දී ආයෙත් මේ ආයතනයට කොන්ත්‍රාත් තුනක් දීලා තියෙනවා. මේක නිකන් හොරෙක්ටම ආයෙත් හොරකම් කරන්න අවස්ථාව දෙනවා වගේ වැඩක්. 2021 දෙසැම්බර් 31 වෙද්දී හිඟ මුදල 13,998,796.75 විදියට විගණන වාර්තා වල තියෙනවා.

Sadid Enterprises එක මුජිබර් රහුමාන් මහතාට අයත් පෞද්ගලික ආයතනයක්. ඉතින්, දේශපාලන බලය මෙතනට කොහොමද පාවිච්චි වෙලා තියෙන්නේ කියලා මේකෙන් පැහැදිලි වෙනවා. මුජිබර් රහුමාන් විතරක් නෙවෙයි අජන්ත ලියන්ගේ කියන පොහොට්ටු මන්ත්‍රීගේ ආයතන 6ක් ලියාපදිංචි වෙලා තියෙනවා. ඒ ආයතන 6ම ගෙවීම් පැහැර හැරලා 2021 වෙනකොට නගර සභාවට ගෙවන්න තියෙන හිඟ මුදල විදියට රුපියල් හාර කෝටි දහ අට ලක්ෂ අසූ දෙදහස් හාරසිය හයයි  ශත තුනක (4,18, 82, 406.03) මුදල් විගණන වාර්තා වල පෙන්වන්වා.

නොගෙවූ කුලී බිලියන ගණනක්!

වාහන ගාල්වලින් නගර සභාවට මාසිකව එන්න ඕන කුලී සල්ලි දිගින් දිගටම පැහැර හැරලා තියෙනවා. 2021 අවුරුද්ද වෙනකොට ආයතන 38කින් රුපියල් මිලියන 367කට වඩා වැඩි හිඟ මුදලක් අය කර ගන්න බැරිව තියෙනවා. මේ සල්ලි අපේ සල්ලි. මේවා ගත්තා නම් කොළඹ නගරය තව කොච්චර දියුණු කරන්න තිබුණාද?

හිතුවක්කාර විදියට ගාස්තු අය කරනවා

නගර සභාවෙන් වාහන ගාල් කරන්න අවසර දීලා තියෙන තැන්වල විතරයි ගාස්තු ගන්න ඕන. හැබැයි, නොරිස් කැනල් රථගාල වගේ තැන්වල A.R. Enterprises කියන ආයතනයේ අය තහනම් තැන්වල වාහන නවත්තලා සල්ලි ගන්නවා. මේ ආයතනය පිටුපස ඉන්නෙත් සමඟි ජන බලවේගය නියෝජනය කරන මන්ත්‍රී කෙනෙක්. එහෙමනම් මේ සල්ලි යන්නේ කාටද කියලා හිතාගන්න පුළුවන්.

තව දෙයක්! මේ ගාල්වල ඉන්න කිසිම කෙනෙක් නිල ඇඳුමක්වත්, හැඳුනුම්පතක්වත් දාගෙන නැහැ. ඒ විතරක් නෙවෙයි, ටිකට් දෙනකොටත් සම්මත ටිකට් නැතුව අමුතු ටිකට් දෙනවා. මේවා කරන්නේ ඇයි කියලා අමුතුවෙන් කියන්න ඕන නැහැනේ. හැමදේම කරන්නේ හොර රහසේ, ආදායම් වංචා කරන්න.

පැය 24ම සල්ලි කඩා ගන්නවා

වාහන ගාල්වලින් සල්ලි ගන්න පුළුවන් වෙලාවක් තියෙනවා. ඒ කියන්නේ උදේ 6 ඉඳන් රෑ 12 වෙනකම්. හැබැයි නොරිස් කැනල් වගේ තැන්වලයි, රෝහල් ළඟ තියෙන වාහන ගාල්වලයි, පැය 24ම සල්ලි කඩා ගන්නවා කියලා හෙළිවෙලා තියෙනවා. මේක නිකන් ජනතාවගේ සාක්කුවට පිහිය දාලා සල්ලි ගන්නවා වගේ වැඩක්.

ආදායම් මිලියන ගණනක් නගර සභාවට අහිමි වෙලා

වාහන ගාල් බලන්න 23 දෙනෙක් ඉන්නවා. එයාලා හරියට වැඩ කළා නම්, මාසෙකට රුපියල් මිලියන 5.6ක් විතර නගර සභාවට එන්න ඕන. හැබැයි ඇවිත් තියෙන්නේ රුපියල් මිලියන 1ක් විතරයි. මේ නිසා නගර සභාවට රුපියල් මිලියන 4.6කට වඩා වැඩි මුදලක් අහිමි වෙලා.

ස්වයංක්‍රීය යන්ත්‍රත් බිල්ලට

වාහන ගාල්වලින් සල්ලි ගන්න ස්වයංක්‍රීය යන්ත්‍ර දැම්මා. ටෙනාගා කාර් පාර්ක්ස් කියලා සමාගමක් මේ කොන්ත්‍රාත්තුව ගත්තා. 2016 ඉඳන් මේගොල්ලෝ ගෙවීම් කරලා නැහැ. 2021 වෙනකොට රුපියල් මිලියන 109කට වඩා නගර සභාවට ගෙවන්න ඕන. මේවා නොගෙවා ඉද්දිත්, නගර සභාවේ අය මේ කොන්ත්‍රාත්තුව අවලංගු කරලා නැහැ. නීතිමය පියවර ගන්නත් අපොහොසත් වෙලා. මේවා නිකන් ‘කළමනාකරණ දුර්වලතා’ නෙවෙයි, මේවා හිතාමතාම කරන වංචා.

මන්ත්‍රීවරුන්ගේ වාහන ගාල් – ලොකු ප්‍රශ්නයක්

කොළඹ මහනගර සභාවේ මන්ත්‍රීවරුන්ට තමන්ගේ කාර්යාල ළඟ වාහන ගාල් කරන්න අවසර දීලා තියෙනවා ගාස්තු නැතුව. 119න් 110 දෙනෙක් මේ පහසුව අරගෙන. හැබැයි මේකෙත් ලොකු හොරකමක් තියෙනවා.

• සමහර මන්ත්‍රීවරු එක ලිපිනයකට වාහන ගාල් කරන්න ඉඩ දෙක තුනක් අරගෙන. JDM Elegance කියලා ආයතනයක් ළඟ මේ වගේ දෙකක්ම තියෙනවා කියලා හෙළි වෙලා.
• මන්ත්‍රීවරුන්ට වෙන් කරපු තැන්වල ව්‍යාපාර කරන අය වාහන දාගෙන. මේවා පොදු දේපළ පෞද්ගලික ලාභවලට පාවිච්චි කිරීමක්.
• තව දෙයක් තමයි, මන්ත්‍රීවරුන් කාර්යාල දාලා තියෙන්නේ වාහන ගාල් කරන්න ඉඩ නැති, තදබද වැඩි තැන්වල. උදාහරණයක් විදියට, කොළඹ 11 ප්‍රදේශයේ මන්ත්‍රීවරු 60 දෙනෙක්ම කාර්යාල දාලා තියෙනවා. මෙහෙම කරන්නේ වාහන ගාල් කරන්න ඉඩ ගන්න කියලා තමයි පෙනී යන්නේ. මේකෙන් නගරයට වෙන තදබදය ගැන කවුරුත් හිතන්නේ නැහැ.

අවසාන කතාව

මේ හැමදේම බැලුවම පැහැදිලි වෙන්නේ, කොළඹ මහනගර සභාවේ වාහන ගාල් කළමනාකරණය කියලා කියන්නේ, දේශපාලන බලය පාවිච්චි කරලා මහජන මුදල් වංචා කරන තැනක් බවයි. මුජිබර් රහුමාන් මහතාගේ නම මේකට ඈඳිලා තිබීමෙන්, මේක දේශපාලනය මුවාවෙන් කෙරෙන මහා හොරකමක් කියලා පේනවා. සමහර නාගරික මන්ත්‍රීවරුන් තමන්ගේ බලය පාවිච්චි කරලා, පොදු දේපළ අවභාවිත කරලා, තමන්ගේ මඩිය තර කරගෙන තියෙනවා.

මේ ගැන ඉක්මනින්ම පරීක්ෂණ කරලා, වගකිව යුත්තන්ට දඬුවම් දිය යුතුයි. අපේ සල්ලි ආරක්ෂා කරගන්න අපි මේ ගැන හඬක් නැගිය යුතුමයි.