මවකට එකම මොහොතකදී දරුවන් හතර දෙනෙකු බිහි කළ හැකිය. එහෙත් ඒ දරුවන් හතර දෙනාම අඩුබරකින් අඩු මාසයකින් උපදින්නේ නම් එම දරුවන් ජීවත් කරලීමේ භාර ‘ධූර කාර්ය පැවරෙන්නේ ළමා රෝග විශේෂඥ වෛද්යවරයෙකුටය. මන්ද දරුවා සාමාන්ය තත්ත්වයට පත් වෙන තෙක්ම ළමා රෝග වෛද්යවරයාට වගකීමෙන් නිදහස් විය නොහැකි නිසාය.
දරුවෙකු මව්කුසින් මෙලොවට බිහිවන්නේ ගැබට සති 38ක් ගියපසුවය. එවන් දරුවෙකු නිසි බරකින් යුක්තවේ. එහෙත් දරුවෙකු සති 26කින් දරුවෙකු බිහි කරයි නම් එම දරුවා ජීවත් කරලීම ඉතාමත් අපහසු කාර්යයකි. විවිධ සංකූලතාවන්ට ගොදුරුවීමේ ඉඩකඩ ඉතාමත් වැඩිය. එහෙත් මවකට මෙවැනි දරුවන් හතර දෙනෙකු එකවර ඉපදුණේ නම් එම දරුවන්ව ජීවත් කරලීමට තිබෙන අපහසුව මොනතරම්ද යන්න කීමට හෝ නොහැකිය.
අම්බලන්ගොඩ එරන්දි කුලසිරි මව පසුගිය පෙබරවාරි 29 වන දින සිසේරියන් සැත්කමකින් අඩුබර දරුවන් හතර දෙනෙකු බිහි කළාය. බලපිටිය රෝහලෙන් කාසල්වීදීයේ කාන්තා රෝහල වෙත එවන ලද එරන්දි පෙබරවාරි 20වන දින රෝහල් ගත විය. ඒ වන විට ඇයගේ කුසට සති 26 පිරුණා පමණි. හදිසියේම ඇතිවූ ප්රසව වේදනාවෙන් රෝහලේ 9, 10 වාට්ටු භාර ප්රසව හා නාරිවේද විශේෂඥ යූ.ඩී. රත්නසිරි ඇතුලු වෛද්ය කණ්ඩායම එරන්දි සිසේරියන් සැත්කමකට ලක් කළේය.
සිසේරියන් සැත්කමින් පසුව දරුවන් ජීවත් කරලීමේ වගකීම පැවරෙනුයේ ළමා රෝග විශේෂඥ වරයාටය. ඒ වන විටත් ළමා රෝග විශේෂඥ වෛද්යවරයා සමන් කුමාර කොළඹ අවට තිබෙන සියලුම රෝහල්වලට දුරකථන ඇමතුම් ලබා දෙමින් සිටියේය. ඒ ළදරු දැඩිසත්කාර ඒකක ඇඳන් හිස්ව පවතින රෝහල් සොයමිනි. අඩුමාසයකින් උපදින දරුවන්ගේ උපත් බර අඩුය. මෙවැනි දරුවන්ට කෘතීම ශ්වසනය ලබා දීම සඳහා “වෙන්ටිලේටර්” යන්ත්රවලට සවිකර තිබිය යුතුය.
දරුවන් බිහිවන විට කාසල් රෝහලේ හිස්ව පැවතියේ ළමා දැඩි සත්කාර ඇදන් 2කි. එනම් කෘතීම ශ්වසනය ලබා දිය හැකි යන්ත්ර දෙකක් පමණි. එරන්දිගේ දරුවන් දෙදෙනෙකු කාසල් රෝහලේම රඳවා ගත්ත ද අනෙකු දරුවන් දෙදෙනා හෝමාගම රෝහලට සහ ශ්රී ජයවර්ධනපුර රෝහලේ ළමා දැඩි සත්කාර ඒකකයට ඇතුළත් කළේ එහි ඇඳන් දෙකක් හිස්ව පවතින බව දැනුම් දීමත් සමගය. දරුවන් එම රෝහල් වෙත යැවුවත් ළමා රෝග විශේෂඥවරුන්ගේ අධීක්ෂණය යටතේ ඔවුන්ව රැඳවීම අනිවාර්ය වන්නේය.
“ නොමේරූ දරුවන් ගිලන්රථයෙන් රැගෙන යනවිට විවිධ සංකූලතාවන්ට ලක්වෙන් තියෙන ඉඩකඩ වැඩියි. ඒත් කාසල් රෝහල තුළ ඒ වන පහසුකම් තිබුණේ දරුවන් දෙන්නෙකුට විතරයි. ඒ නිසා අපිට දරුවන් දෙන්නෙක් වෙනත් රෝහල්වටල යැවීමට සිදු වුණා. ඒක ඒතරම් හොඳ දෙයක් නොවෙයි. මොකද මොවුන් නොමේරූ දරුවන්. ඒ අයට විවිධ සංකූලතා ඇතිවෙන් තිබෙන ඉඩකඩ ඉතාමත් වැඩියි. එම්බියුලන්ස් එකක මේ දරුවන් වෙනත් රෝහලටක අරිනවා කියන්නේ හරිම අවදානම් වැඩක්. ඒත් කාසල් රෝහලේ දරුවන් හතර දෙනාම රඳවා තියාගන්න පහසුකම් තිබුණා නම් පිට රෝහල් වලට යවන්නේ නැහැ. මේ දරුවෝ හතර දෙනා කාසල් රෝහලේ සිටම බලාකියා ගන්න අපිට පුළුවන් වෙනවා.කොහොම නමුත් මගේ වෛද්ය ජීවිත කාලය තුළ මෙවැනි භාරදූර්ය කටයුත්තකට මුහුණ දුන් ප්රථම අවස්ථාව මෙයයි .” යැයි කාසල් රෝහලේ ළමා රෝග විශේෂඥ සමන් කුමාර සඳහන් කළේය.
මෙසේ එරන්දිගේ දරුවන් රෝහල් තුනක රඳවා සිටියදී එම දරුවන්ට මව්කිරි රැගෙන යාමේ කාර්ය පැවරුණේ සජිත් කේසරටය. ඔහු එරන්දිගේ සැමියාය. කාසල් රෝහලේ සිටින එරන්දිගෙන් ලබාගන්නා මව්කිරි හෝමාගම රෝහලේ සහ ජයවර්ධනපුර රෝහලේ ළමා දැඩිසත්කාර ඒකකයේ සිටින තම දරුවන් දෙදෙනාට රැගෙන ගියේය. රටපුරා කොරෝනාව හේතුවෙන් ඇඳිරි නීතිය පවතිද්දී සජිත් උදේ හවස තම දරුවන් පෝෂණය කිරිමට මව්කිරි රැගෙනගියේය. සජිත් අම්බලන්ගොඩ සිට කොළඹ පැමිණියත් ඔහුට නවාතැනක් සොයාගැනීම මහත් අසීරු කටයුත්තක් වූයේ කොරෝනාවෛරසය පැතිර පැවතීම හේතුවෙන් කිසිවෙකු හෝ නවාතැන්දීමට අකමැතිවීම හේතුවෙනි. කෙසේ වෙතත් නොරිස්කැනල් හී ෆාතිමා දෙව්මැදුරේ පියතුමා සජිත්ට පිහිට වූවේය. මේ අනුව සජිත් ට දෙව්මැදුරේ නවාතැන් ලැබුණි.
පසුගිය මැයි 14 දා වන විට රෝහල් තුනක සිටි එරන්දිගේ දරුවන් හතර දෙනාම ඇය වෙත ලැබී තිබුණි. එදින ඇයව නිවස බලා යැවීමට වෛද්යවරුන් තීරණය කර තිබුණි. පුතුන් දෙදෙනෙකු සහ දියණියන් දෙදෙනෙකු සජිත්ගේ සහ එරන්දිගේ කැදල්ලට එකතු වීම ඔවුන් ලද භ්යාගයකි. කෙසේ නමුත් දෙමාපියන් දෙදෙනා රජයේ රැකියාවක් කළත් දරුවන් රැක බලා ගැනීමට ඉතාමත් අසීරු කටයුත්තකි. මේ පුංචි කැදැල්ලට උපකාර කිරීමට පරිත්යාගශීලී අය වෙත්නම් 0710777155 යන දුරකථනය අංකයට හෝ ඩී.එස්. දේශරා , ගිණුම් අංක 100330455369 ,ජාතික ඉතිරිකිරිමේ බැංකුව, අම්බලන්ගොඩ ශාඛාවට තමන්ගේ ප්රදානයන් ලබා දිය හැකිය.
