දිනසේන රතුගමගේ –
යාපනයේ පේදුරුතුඩුව රෝහලේ කිලිටි රෙදි සෝදන ටෙන්ඩරය ලබා ගැනීම සඳහා එම ටෙන්ඩරය මතෙක් ලබා ගත් රෙදි සෝදන්නා සහ ඔහුගේ බිරිය නිදා සිටියදී දැවැන් කොන්ක්රීට් ගල් අතහැර හස කුඩු කර මරා දැමූ ඝාතන සැකකරුවන් සියලු දෙනා අත් අඩංගුවට ගෙන තිබේ.
යාපනයේ කාර්කෝවලම් පුනිතනගර් ප්රදේශයේ සිය නිවසේ දී මෙම අඹු සැමි යුවල ඝාතනය කර තිබිණි. ඝාතනය කර තිබුනේ 53 හැවිරිදි මානික්කම් සුබ්රමනියම් නැමති අය හා ඔහුගේ බිරිද වන 51 හැවිරිදි මේරී රීටා නැමති දෙදෙනාය. මෙම ඝාතනය පසුගිය ඔක්තෝබර් 30 දා සිදුකොට තිබුණේ ඔවුන් දෙදෙනා නිවසේ නිදා සිටියදී විශාල ප්රමාණයේ කොන්ක්රීට් ගල් කීපයකින් ඔවුන් දෙදෙනාගේ ඔලුවලට අතහැරීමෙනි.
පේදුරුතුඩුව රෝහලේ කිලිටි රෙදි සෝදන්නෙකු වශයෙන් ටෙන්ඩරය බාර ගෙන සිටි සුබ්රමනියම් ඝාතනයට ලක් වූයේ එම කොන්තාත්තුව වෙනත් අයකු විසින් ලබා ගැනීමට සැලසුම් කිරීමේ සිද්ධියක් සමගය. මේ ඝාතනයන් දෙක සම්බන්ධයෙන් පේදුරුතුඩුව පොලීසිය එහි ප්රධාන සැකකරු හා තවත් අයෙකු අත් අඩංගුවට ගෙන සිටි අතර තුන්වෙනි පුද්ගලයා පළාතෙන් පලාගොස් සිටි නිසා ඔහුව අත් අඩංගුවට ගැනීමට නොහැකි වුණි. පළාතෙන් පලාගොස් සිටි තුන් වෙනි සැකකරුවත් පේදුරුතුඩුව පොලීසිය විසින් ඊයේ ( 3 ) අත් අඩංගුවට ගත්තේය. එම සැකකරු නිවසින් පලා ගොස් වෙනත් ප්රදේශයක නිවසක රැදී සිටියදී පොලීසියට ලැබුණු තොරතුරක් මත ඔහුව අත් අඩංගුවට ගෙන තිබේ.
මේ වන විට අත් අඩංගුවට ගෙන සිටින සැකකරුවන් තුන් දෙනාම යාපනය අධිකරණය වෙත ඉදිරිපත් කිරීමට පේදුරුතුඩුව පොලීසිය පියවර ගෙන ඇත.
