2024 මහ මැතිවරණය පැවැත්වීමට යෝජිත දිනය සම්බන්ධයෙන් ගොනු කර ඇති මූලික අයිතිවාසිකම් පෙත්සම ශ්රේෂ්ඨාධිකරණයේ පංච පුද්ගල විනිසුරු මඩුල්ලක් හමුවේ අද (04) විභාගයට ගැනීමට නියමිතව තිබේ. මෙම පෙත්සම ගොනු කර ඇත්තේ අපි ශ්රී ලංකා ජාතික සංවිධානයේ ලේකම් සහ සිවිල් ක්රියාකාරිකයෙකු වන එච්.එම්. ප්රියන්ත හේරත් විසිනි.
2024 මහ මැතිවරණය නොවැම්බර් 14 වැනිදා පැවැත්වීමට ගත් තීරණය අභියෝගයට ලක්කරමින් ගොනුකර ඇති මූලික අයිතිවාසිකම් පෙත්සමක් ඔක්තෝබර් 21 වැනිදා ශ්රේෂ්ඨාධිකරණය හමුවේ ගොනුකරමින් මෙම තීන්දුව ව්යවස්ථා විරෝධී බවට තීන්දුවක් ලබාදෙන ලෙස ඔහු ඉල්ලා සිටියේය. නාමයෝජනා කැඳවීම සහ 2024 මහ මැතිවරණය සඳහා දිනය ප්රකාශයට පත් කිරීම ශ්රී ලංකාවේ මැතිවරණ පනතේ විධිවිධාන උල්ලංඝනය කරන බව පෙත්සමෙන් තර්ක කර ඇත.
පෙත්සමින් පෙන්වා දී තිබුණේ, පාර්ලිමේන්තු ඡන්ද විමසීම් පනතේ 10 වැනි වගන්තිය අනුව නාමයෝජනා කැඳවීමට ඔක්තෝබර් මස 04 වැනිදා සිට ඔක්තෝබර් 11 වැනිදා දක්වා දින නියම වූ බවයි. මැතිවරණ පනත ප්රකාරව නාමයෝජනා භාරගැනීම අවසන් වූ දින සිට සති පහකට නොඅඩු කාලයක් සහ සති හතකට නොවැඩි කාලයක් තුළ ඡන්ද විමසීම සඳහා දින නියම කළ යුතු බව ද එහි දැක්වෙයි. ඒ අනුව නාම යෝජනා භාරගැනීම අවසන් වූ ඔක්තෝබර් 11 වැනිදා සිට සති 5ක කාලය, නොවැම්බර් මස 15 වැනිදා අවසන් වන අතර, සති 07 කාලය නොවැම්බර් මස 29 වැනිදා සම්පූර්ණ වන බව පෙත්සමේ සඳහන් ය.
මැතිවරණ සංශෝධන පනතට අනූව මැතිවරණය සඳහා නාමයෝජනා කැඳවීමට සහ මැතිවරණය පැවැත්වීමට නිවැරදි කාලය වන්නේ, නොවැම්බර් 15 වැනිදා සිට නොවැම්බර් 29 වැනි දක්වා බව පෙන්වා දෙන පෙත්සම්කරු, ජනාධිපතිවරයා ප්රකාශයට පත් කළ ගැසට් නිවේදනය නීතියට සම්පූර්ණයෙන්ම පටහැනි බවත් එය නීතියේ ආධිපත්යය කඩ කිරීමක් බවත් පෙන්වා දී තිබුණි.
