කපිල කේ. හීනටියන –
අද, පෙබරවාරි 15 වැනිදාය. කොළඹ ආර්. ප්රේමදාස ක්රීඩාංගනය ට ඉහළ අහස දෙස ලෝකයේම අවධානය යොමු වී ඇත්තේය. ඉන්දියා-පාකිස්තාන මහා සංග්රාමය සම්බන්ධව නිශ්චිත තීන්දුව අහසට භාර වී ඇත . තරගයේ තීරකයා වී ඇත්තේ ‘වැසි වලාකුළු’වලින් බර වූ අහසය.
ලෝකයේ වැඩිම අවධානය යොමුවන ඉන්දියා – පකිස්ථාන මුහුණට මුහුණ හමුවන මොහොතක, ක්රීඩකයන්ගේ දස්කම්වලට වඩා කොළඹ අහසේ නිල් පැහැය සහ අළු පැහැය අතර සටන ජාත්යන්තර මාධ්යයේ ප්රධාන මාතෘකාව වී ඇත්තේ මේ හේතුව නිසාය. ඉන්දියානු, පාකිස්තානු මාධ්ය පමණක් නොව, ජාත්යන්තර ක්රිකට් ක්රීඩා මාධ්යයන් සියල්ලම කොළඹ අහසේ වෙනස්කම් ගැන යාවත්කාලීන කිරීම් මේ වනවිට ලබාදෙමින් සිටී.
ඉන්දියානු ක්රිකට් ලෝලීන්ගේ හදගැස්ම හඳුනන The Indian Express, NDTV Sports සහ Hindustan Times වැනි දැවැන්ත වෙබ් අඩවි, තරගයට පෙර සිටම කොළඹ කාලගුණය ගැන සජීවී යාවත්කාලීන කිරීම් ලබාදීමට පියවර ගෙන ඇත. එම යාවත්කාලීන කිරීම් පැයෙන් පැයට සිද්ධ වේ. ඔවුන් සිය ප්රජාවට දැනුම් දෙන්නේ දහවල් කාලයේදී වැසි වැසීමේ හැකියාව 94%ක් දක්වා ඉහළ අගයක ඇති බවය.
කෙසේ වෙතත්, තරගය ආරම්භ වන රාත්රී 7 වන විට වර්ෂාපතන සම්භාවිතාව 49% දක්වා පහත වැටෙනු ඇතැයි පවසමින් ඔවුන් ඉන්දියානු රසිකයන්ගේ බලාපොරොත්තු යළි දල්වා තිබේ. ඒත් මැච් එක ගහන්නට තිබෙන ඉඩ බාගෙට බාගයකි. තරගය අත්හැර දැමීමේ අවදානමක් ද ඉන්දීය මාධ්ය විසින් මතුකර තිබේ.
පාකිස්තානු මාධ්ය සහ සමාජ මාධ්ය ක්රියාකාරීන්ද මෙම තත්ත්වය දෙස බලන්නේ දැඩි උනන්දුවකිනි. Zalmi TV සහ DD News වැනි X (Twitter) ගිණුම් හරහා කොළඹ අහසේ වලාකුළු හැසිරෙන ආකාරය පිළිබඳ දර්ශන සජීවීව බෙදාගනිමින් සිටී.
වැසි සහිත කාලගුණය නිසා තරගය කෙටි වුවහොත්, ඉන් පාකිස්තානු දඟපන්දු යවන්නන්ට (Spinners) වැඩි වාසියක් හිමිවනු ඇතැයි ඔවුන් අනාවැකි පළ කරයි. එය පකිස්ථානු ක්රීඩා ලෝලීන්ගේ බලාපොරොත්තු දල්වා තිබේ.
කොළඹ අහස ගැන කතා කරන්නේ අසල්වැසි රටවල් පමණක් නොවේ. ESPNcricinfo සහ Yahoo Sports වැනි ගෝලීය ක්රිකට් වෙබ් අඩවි පවා සිය සජීවී බ්ලොග් අඩවි (Live Blogs) හරහා කාලගුණ තත්ත්වය වාර්තා කරයි. මීට අමතරව Cricket Mood සහ Sports Today වැනි YouTube සහ Instagram චැනල්, ක්රීඩාංගනය අවට තත්ත්වය සජීවීව පෙන්වමින් ලොව පුරා විසිරී සිටින මිලියන සංඛ්යාත ප්රේක්ෂකයන්ගේ කුතුහලය සංසිඳුවීමට උත්සාහ කරයි.
ක්රිකට් යනු හුදෙක් ක්රීඩාවක් පමණක් නොව, එය ජාතීන් යා කරන, හැඟීම් අවුස්සන සංස්කෘතික සංසිද්ධියක් බව අද කොළඹ අහස දෙස ලෝකයම බලා සිටින ආකාරයෙන් මැනවින් පැහැදිලි වේ.
අවසානයේදී, කාසිය වාසිය දිනන්නේ කවුරුන් වුවත්, පිත්තෙන් සහ පන්දුවෙන් දස්කම් පෑවත්, අද තරගයේ සැබෑ තීරකයා වන්නේ කොළඹ අහසය. වැසි බිඳුවක් වැටුණත්, නොවැටුණත්, ‘වැස්ස’ නමැති ස්වභාව ධර්මයේ තීරකයා ගැන කෙරෙන මේ කතාබහ ඉතිහාසයට එක්වනු නොඅනුමානය.
