මොන ආගමක මොන තනතුරක් දැරුව ද කාදිනල් තුමා පැවිද්දෙක් නොව ගිහියෙක් බව තිලංග සුමතිපාල අද පැවසුවේය.
ශ්‍රී ලංකා නිදහස් පක්ෂයේ කොලඹ දිසා සමුලුවේ දී ඔහු කීවේ ලෝකය වටේ කේලාම් කියමින් ගොස් කාදිනල් තුමා පහත් දේශපාලනයක් කරන බවය. ඔහු තරම් පහත් ලෙස කිසිම ආගමික නායකයෙක් ත්‍රස්වාදීන් ආරක්ෂා නොකළ බවත් තිලංග සුමතිපාල කීවේය.
ඔහු කීවේ ජය ශ්‍රී මහා බෝධිය, දළදා මැදුර ප්‍රහාරයට ලක් කළ, අරන්තලාව ඝාතනය සිදුකළ ත්‍රස්තවාදී ප්‍රහාර හමුවේ කාදිනල්ලා ලෝකයට කේලාම් නොකී බවය. කාදිනල්තුමා හදන්නේ තමන්ගේ නායකයා වන මෛත්‍රීපාල සිරිසේනට නඩුවක් දමා විත්තිකරුවෙක් කිරීමට බවය.
බුකි කරුවෙක් ලෙස සමාජයේ ප්‍රකට තිලංග සුමතිපාල පසුගිය මැතිවරණයෙන් පරාජයට පත් වූ අයෙකි. ඔහු ශ්‍රී ලංකා නිදහස් පක්ෂ කොළඹ දිසා සමුළුව අමතමින් මෙසේ ද කීවේය.
“ජය ශ්‍රී මහා බොධියට ගැහුවා, දළදා මාලිගාවට ගැහුවා. අරන්තලාවට ගැහුවා. අවුරුදු විස්සක් තිහක් තිස්සෙ ගහපු එකම වෙලාවක හෝ එමානුවෙල්ලවත් කාදිනල්ලාවත් ලෝකෙට ගිහින් කේලම් කිව්වෙ නෑ.“
“මගෙ නිවස ගාව ඉන්න කාදිනල් තුමා ගැන කණගාටු වෙනවා. දුක් වෙනවා. ලෝකෙට ගිහින් කේලාම් කියනවා. නමුත් මැරිච්ච මිනිස්සු වෙනුවෙන් මුදල් ටිකක් ගන්න හදන්නෙ නෑ. එල්ලලා මරන්න කියනවා පූජිත් ජයසුන්දරව. හේමසිරි ප්‍රනාන්දුව. එහෙම නැතිනම් අපේ මෛත්‍රීපාල සිරිසේන මැතිතුමාට නඩුවක් දාලා චූදිතයෙක් කරන්න.“
“එතුමා බොහොම පහත් විදිහට දේශපානය කරනවා තමන්ගෙ ඉලක්කයක් සඳහා. අපේ කිසිම ආගමික නායකයෙක් මේ විදිහට ත්‍රස්තවාදීන් රැක ගත්තෙ නෑ. චන්ද්‍රිකා මැතිණියගෙ කාලෙ, ජේ.ආර්. ජයවර්ධනගෙ කාලෙ, ප්‍රේමදාසගෙ කාලෙ කොච්චර බෝම්බ තිබ්බද, කී දාහක් මැරුණ ද?“
“9/11 ප්‍රහාරයෙදි බුෂ් ජනාධිපති මුළු ඇමරිකාවම බිම දැම්මා. කවදාවත් ජන නායකයෙකුට අත තිබ්බෙ නෑ. ඒ නිසා අපි බොහොම ඕනෑකමින් කියා සිටිනවා කාදිනල් තුමාට. එතුමා ඉස්සරවෙලාම මඩකලපුව පල්ලියට ගියෙ නෑ. ඒක බෝන් අගේන් නිව් චර්ච් නිසා. ඒක කතෝලික නෙමෙයි. එතුමාට ඉස්සරවෙලාම ක්‍රිස්තියානි ආගමේ අය එකතු කරගන්න කියන්න.“
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
එතුමා එක කොටුවක පිරිසක් අමතන ආගමික නායකයෙක්. ඉස්සරවෙලා තමන්ගේ කොටස තේරුම් ගන්න ඕන. එතුමා මොන ආගමකින් මොන තත්වයකට ලඟා වුනත් අපට ඔහු ගිහියෙක්. පැවිද්දෙක් නෙමෙයි. පැවිදි කෙනෙක් සහ ගිහියෙක් අතර වෙනස අපි තේරුම් ගන්න ඕන. “
