කඩින්කඩ වැසි මැද අත්හිටුවමින් කල් යමින් පුරා දින දෙකක් තිස්සේ තවමත් ඉන්දු – පකිස්ථාන් තරගය පැවැත්වේ. මේ ලියන මොහොතවනවිටත් තරග නතර වී ඇත. 9.20ට යළි තරගය ආරම්භ කිරීමත් ඕවර 50ක් ක්රීඩා කිරීමටත් මේ වනවිට එකඟතාවය පලවී ඇත.
ඉන්දියාව ක්රීඩා කළේ අති විශිෂ්ට ඉනිමකි. පිතිකරණයේ මහේශාඛ්ය ආනුභාවය කාසියේ වාසිය දිනා පන්දු රැකීම තේරූ පකිස්ථාන කණ්ඩායමට ඉන්දියාව විසින් පෙන්වා දී තිබිණි. ඔවුන් ලබා දුන්නේ පකිස්ථානයට ලඟාවීම සිහිනයක් සමාන වූ ඉලක්කයකි.
ආරම්භක පිතිකරු යුවල අර්ධ ශතක ලැබූහ. රෝහිත් ශර්මා ලකුණු 56ක් පන්දු 49ක් තුළ ලැබුවේය. ඊට හතරේ පහර හයක් සහ හයේ පහර 4ක් ඇතුළත් විය.
ශුබ්මන් ගුල් පන්දු 52ක් තුළ ලකුණු 58ක් ලැබුවේය. ඔහු ලකුණු 40ක් ලැබුවේ හතරේ පහර වලිනි. ඔහු එල්ල කළ හතරේ පහර 10කි.
උත්කර්ෂය වන්නේ ඉන් අනතුරුව පිටියට පැමිණ තරගය නිමා වනතුරු ක්රීඩා කළ විරාට් කෝලි සහ කේ.එල් රාහුල් නොදැවී ශතක ලැබීමය.
කෝලි පන්දු 94ක දී නොදැවී ලකුණු 122කි. ඒ චමත්කාරාජනක ඉනිමට හතරේ පහර 09ක් සහ හයේ පහර 03ක් ඇතුළත් විය.
කේ.එල් රාහුල් නොදැවී ලකුණු 111කි. හතරේ පහර 12කි. හයේ පහර 2කි. ඉන්දියාව කඩුලු 02ක් දැවී රැස්කළ ලකුණු ප්රමාණය 356කි.
පකිස්ථාන පන්දු යවන්නෝ හොඳටෝම ගුටි කෑහ. ශහීම් ෂා ඇෆ්රිඩි පන්දු ඕවර 10ක දී ලකුණු 79කට කඩුල්ලක්, ෂඩාබ් ඛාන් පන්දු ඕවර 10ක දී ලකුණු 71ට කඩුල්ලක් දවා ගත්තේය.
පකිස්තාන කණ්ඩායම පිටියට පැමිණියේ ලකුණු 356ක ජයග්රාහී ඉලක්කයක් හඹා යන්නටය. පකිස්ථාන කණ්ඩායම බිහිසුණු අගාධයකට ඇද දැමීමට ඉන්දීය පන්දු යවන්නෝ සමත් වූහ. වර්ෂාවෙන් පසු තරගය ආරම්භ කිරීමට පෙර ඉන්දීය කඩුළු 2ක් ලකුණු 44කට දැවී ගොස් තිබිණි.
ජස්ටිප් බුම්රා ඉමාම් උල් හක් ලකුණු 09ට දවා ගත්තේය. හර්දික් පාණ්ඩ්යාගේ පන්දුවක් කඩුල්ල කඩු කරනවිට නායක බාබර් අසාම් ලබාගෙන තිබුණේ පන්දු 22ක දී ලකුණු 10කි.
තරගය 9.20ට ඇරඹෙනු ඇත. ආශ්චර්යයක් නොවේ නම් මේ තෙත බරිත රාත්රියේ පකිස්ථානයේ ජයග්රහණය ඇත්තේ බොහෝ දුරින් බව කිව යුතුය.
