දිනසේන රතුගමගේ –
යාපනය පොලීසියේ බැරැක්කයක් තුළ බීමත් පොලිස් නිලධාරීන් දෙදෙනෙකු සෙසු පොලිස් නිලධාරීන්ට එලව එලවා පහර දීමේ සිද්ධියක් මත එම බීමත් පොලිස් නිලධාරීන් දෙදෙනා අත් අඩංගුවට ගෙන තිබේ.
ඊයේ (26) වාර්තාවන එම සිද්ධිය මෙසේය.
මෙම පොලිස් නිලධාරීන් දෙදෙනා පොලීසියට පිටස්තර ස්ථානයකදී මත් පැන් පානය කොට බැරැක්කය වෙත පැමිණ බැරැකයේ සිටි පොලිස් නිලධාරීන්ට බැණ වැදී තිබේ.
මේ අවස්ථාවේදී බැරැක්කයේ සිටින්නේ රාජකාරී කොට මහන්සි වී විවේක ගන්නා නිලධාරීන් නිසා ඔවුන්ට බාධා නොකරන ලෙස බැරැකයේ සිටි පොලිස් නිලධාරීන් කීපදෙනෙකු පැවසීමත් සමගම බීමත් පොලිස් නිලධාරීන් දෙදෙනා සෙසු පොලිස් නිලධාරීන්ට පහර දෙන්නට පටන් ගෙන ඇත.
ඉවක් බවක් නොමැතිව පහර දීම නිසා බැරැක්කයෙන් එලියට දිව ගිය පොලිස් නිලධාරීන් මේ පිළිබඳව ජ්යෙෂ්ඨ නිලධාරීන්ට දැනුම් දීමෙන් පසුව එම නිලධාරීන්ගේ උපදෙස් මත බීමත් පොලිසි නිලධාරීන් දෙදෙනා අත් අඩංගුවට ගෙන තිබේ.
එම පොලිස් නිලධාරීන් දෙදෙනාට එරෙහිව විනය පරීක්ෂණයක් ආරම්භ කොට ඇත.