විපක්ෂ නායකවරයා එක්ස්ප්රස් පර්ල් හානිය සහ වන්දි පූරණය ගැන අද මේ පාර්ලිමේන්තුවේ දී ප්රශ්න කරන්නේ එම සිද්ධිය සහ නිවු ඩයමන්ඩ් සිද්ධිය සම්බන්ධව නඩු කටයුතු කරගැනීමට පවා ඉඩක් නොතබා අමුතුම ආකාරයේ හැසිරීම් ප්රකට කරමින් ආණ්ඩුවෙන් ද චෝදනා ලද පුද්ගලයා තමන්ගේ දෑත් ශක්තිමත් කරගැනීමට සමගි ජන බලවේගයට කැඳවාගෙන ඇති පසුබිමක වීම හාස්ය ජනක යැයි අධිකරණ හා බන්ධනාගාර කටයුතු පිළිබඳ රාජ්ය අමාත්ය අනුරාධ ජයරත්න පැවසුවේය.
එක්ස්ප්රස් පර්ල් සහ නිව් ඩයමන්ඩ් නෞකා සිද්ධිවලදී නීතිපතිවරයාටවත් නොදන්වා හිටපු ජනාධිපති ගෝඨාභය රාජපක්ෂගේ බලය තමන් අතට ගෙන රටට අහිතකර ප්රතිඵල ගෙන එන ආකාරයට හැසිරීම සම්බන්ධව එවකට වියත් මගෙහි ප්රධානියෙක් වූ ආචාර්ය නාලක ගොඩහේවාට බරපතල චෝදනා එල්ල වී තිබිණි.
ඔහු අද ඉන්නේ සජිත් ප්රේමදාස ගේ සමගි ජන බලවේගයට එක්වී විපක්ෂයේ ය.
එක්ස්ප්රස් පර්ල් හානිය සම්බන්ධව විපක්ෂ නායක සජිත් ප්රේමදාස විසින් අද පාර්ලිමේන්තුවේ දී 27/2 යටතේ ප්රශ්නය මතු කළ අවස්ථාවේ දී රාජ්ය අමාත්ය අනුරාධ ජයරත්න දීර්ඝ පිළිතුරක් ආණ්ඩුව පාර්ශවයෙන් ලබා දීමෙන් අනතුරුව මෙසේ ද පැවසුවේය.
මේ කාරණයට අදාලම කාරණාවක් තමයි නිව් ඩයමන්ඩ් නෞකාව. මේකට සම්බන්ධ පිරිස් මේ සභාවෙ ඉද්දිම විපක්ෂ නායක තුමා අපව විවේචනය කළා.
අධිකරණ අමාත්යාංශයෙ අනුමැතිය නොමැතිව නිව් ඩයමන්ඩ් නෞකාව මුහුදු සීමාවෙන් පිටතට යැවූ නියෝජ්ය ඇමතිවරයා ගැන අපේ කඳවුරේ ඉද්දි අපිත් චෝදනා කළා. අදටත් ඒ චෝදනාව කරනවා. පූර්ව පරීක්ෂණයේ දී රටට හිමිවෙන්න තිබුණු මුදල් ප්රමාණය තීව්ර ලෙස අවප්රමාණ වුනා.
මේ ප්රශ්නයක් විපක්ෂ නායකවරයා අද මේ සභාවෙ අහනකොට මේකෙ අපට නීති කටයුතු කරගන්න බැරි තැනකට පත් කරපු, විපක්ෂ නායකවරයා විසිනුත් විවේචනය කරපු, අපේ විවේචනයටත් ලක්වුන නියෝජ්ය ඇමතිවරයා දැන් ආණ්ඩුවෙන් විපක්ෂයට ඇවිත් විපක්ෂ නායකවරයාගේ දෑත් ශක්තිමත් කරනවා.
බලාගෙන ඉන්නකොට මේක හරි හාස්ය ජනකයි. අපේ කඳවුරේ ඉන්නකොටත් අපි ඔහුට චෝදනා කළා. අපේ කඳවුරේ නැතිවෙනකොටත් අපි චෝදනා කරනවා.
එක්ස්ප්රස් පර්ල් සිද්ධිය සම්බන්ධව කාරක සභාවක් පිහිටුවලා අපි සමහර වන්දි මුදල් අය කරගන්න උත්සාය කළ වෙලාවෙදි අපේ අධිකරණ අමාත්යංශයෙ නිලධාරීන් නීතිපති දෙපාර්තමේන්තුවෙ නිලධාරීන් නැව් සමාගම් වෙනුවෙන් පෙනී සිටි නිතිඥ සමාගම්වල නීතිඥවරු ගෙනත් කාරක සභාවල යම් යම් කාරණා සාකච්ඡා කරන්න (ඒ නියෝජ්ය ඇමතිවරයා) කටයුතු කළා. ඒක ඉතාම අවාසනාවන්ත තත්ත්වයක්. මොකද නීති කෘත්යයක් ක්රියාත්මක වන අවස්ථාවක මේ ගරු සභාවකවත් අපි ඒ ගැන සාකච්ඡා කරන්නේ නෑ. ඒක තමයි අපේ සම්ප්රදාය. ඒකවත් වලංගු භාවයක් නැතිව සමහර අය කටයුතු කළා.
කෙසේ වෙතත් එක්ස්ප්රස් පර්ල් හානිය සම්බන්ධව විශේෂඥ වාර්තාව හරහා ලබා දුන් තක්සේරු වාර්තාවක් මේවන විට අපි අධිකරණයට ඉදිරිපත් කරලා තියනවා. ඒ නිසා ඒ ගැන සාකච්ඡා කරන්නේ නෑ. රටට වෙච්චි හානිය ලබා ගැනීම සඳහා අපි කළ හැකි කළ යුතු සියලු දේ අධිකරණ අමාත්යාංශය හැටියට කරනවා.
