සාධාරණ ප්රවාහන ගාස්තු සංශෝධනයක් ලබා නොදීම හේතුවෙන් ඛනිජ තෙල් ප්රවාහන කටයුතුවල නිරත පෞද්ගලික ඉන්ධන ප්රවාහන ටැංකි රථ හිමියන් අද මධ්යම රාත්රියේ සිට ඛනිජ තෙල් ප්රවාහන කටයුතු වලින් ඉවත් වන බව ලංකා ඛනිජ තෙල් පෞද්ගලික ටැංකි රථ හිමියන්ගේ සංගමය නිවේදනය කර ඇත.
ඩීසල් මිල වැඩිවීම මෙන්ම ඇමරිකානු ඩොලරයේ අගය වෙනස්වීමත් සලකා බලා අවම වශයෙන් 60% ක ප්රවාහන ගාස්තු වැඩි කිරීමක් ඉල්ලා ඔවුන් ඛනිජ තෙල් නීතිගත සංස්ථාව වෙත මීට දින දෙකකට පෙර යොමු කළ ලිපියට සාධාරණ ප්රතිචාරයක් නොලැබීම හේතුවෙන් මෙම වෘත්තීය ක්රියා මාර්ගය වෙත එළඹි බව එම සංගමය පෙන්වා දෙයි.
ඉල්ලීමට එකඟ නොවූ ඛනිජ තෙල් නීතිගත සංස්ථාව ප්රතිචාර වශයෙන් පවසා ඇත්තේ ඩීසල් මිල වැඩි වීම පමණක් මිල වැඩි කිරිම සඳහා සලකා බලන බවය.
ඊට ප්රතිචාර දැක්වීම සඳහා වෘත්තීය ක්රියාමාර්ගය ප්රකාශ කිරීමත් සමග ලබන අප්රේල් මස 01 දා සිට ගාස්තු සංශෝධනයක් සඳහා සැලසුමක් ඇති බව ඛණිජතෙල් නීතිගත සංස්ථාවේ නිලධාරියෙක් විසින් ලංකා ඛනිජ තෙල් පෞද්ගලික ටැංකි රථ හිමියන්ගේ සංගමයට දන්වා තිබේ. කෙසේ වෙත්ත සිය වෘත්තීය ක්රියාමාර්ගය අද මධ්යම රාත්රියේ සිට ක්රියාත්මක කරන බව සංගමය පවසයි.
මෙරට ඛනිජ තෙල් ප්රවාහනයේ 80% ක සිදුකරනු ලබන්නේ පෞද්ගලික ටැංකි රථ හිමියන් විසිනි.
