කොවිඩ්-19 වසංගත තත්ත්වය හමුවේ අභියෝගයට ලක් වූ දකුනු ආසියානු කලාපයේ ආර්ථිකය නගා සිටුවීමේ හා සංවර්ධනය කරා ගමන් කිරීමේ ක්රමෝපායන් සොයා ගැනීම සඳහා මූලිකත්වය ගන්නැයි අද මෙරටට පැමිණි ඉන්දීය ජාතික ආරක්ෂක උපදේශක ශ්රී අජිත් දෝවාල් මහතා අග්රාමාත්ය මහින්ද රාජපක්ෂ මහතාගෙන් ඉල්ලා සිටියේය.
ඉන්දියාවේ ජාතික ආරක්ෂක උපදේශක ශ්රී අජිත් දෝවාල් මහතා අද දින ශ්රි ලංකාවට පැමිණි අතර ඔහු අග්රාමාත්ය මහින්ද රාජපක්ෂ මහතා අද විජේරාම නිල නිවසේදී හමුවිය.
ප්රථමයෙන් ඉන්දියාවේ ජාතික ආරක්ෂක උපදේශක ශ්රී අජිත් දෝවාල් මහතා විසින්, ඉන්දීය අග්රාමාත්ය නරේන්ද්ර මෝඩි මහතාගේ සුබ පැතුම් පණිවිඩයක් අග්රාමාත්ය මහින්ද රාජපක්ෂ මහතා හා නාමල් රාජපක්ෂ මහතා වෙත එක් කළේය.
කොවිඩ්-19 වසංගතය හේතුවෙන් ලොව බොහොමයක් රටවල් මුහුණ දී ඇති අර්බුදකාරී තත්ත්වයට කලාපයේ සෙසු රටවල්වලට ද මුහුණ දීමට සිදුව ඇති බව ප්රකාශ කළ හෙතෙම, වසංගත තත්ත්වය යටතේ වුවත් කලාපයේ රටවල ආර්ථික, සමාජීය සංවර්ධනය ඉදිරියට පවත්වාගෙන යාමට සිදුව ඇති බව පැවසීය.
එසේම කොවිඩ්-19 වසංගතය තත්ත්වයන් හමුවේ රටවල් අතර සංවර්ධන ක්රියාදාමයන් පිළිබඳව රාජ්ය තාන්ත්රික සාකච්ඡා සිදු කිරීමට වැඩි වශයෙන් සිදුව ඇත්තේ අන්තර්ජාලය හරහා වීඩියෝ තාක්ෂණය ඔස්සේ බවද අජිත් දෝවාල් මහතා ප්රකාශ කළේය.
ශ්රී ලංකාව, ඉන්දියාව ඇතුලු මෙම කලාපයේ රටවලට ද විදේශ ශ්රමිකයින් නිසාවෙන් විශාල ආර්ථික ශක්තියක් ලැබුණ ද, වර්තමාන කොවිඩ්-19 වසංගත තත්ත්වය හමුවේ ඔවුන්ගේ රැකියා අහිමිවීමත්, සිය රටවලට ශ්රමිකයින් පැමිණීමත් නිසා සෑම රටකටම ලැබුණු විදේශ විනිමය අවම වී ඇති බව අජිත් දෝවාල් මහතා පෙන්වා දුන්නේය.
ඒ සඳහා ඉන්දියානු රජයේ සම්පූර්ණ සහයෝගය ලබා දෙන බව පැවසූ අජිත් දෝවාල් මහතා, කොවිඩ්-19 තත්ත්වය යටතේ වුවත් ශ්රී ලංකාව, ඉන්දියාව ඇතුළු කලාපයේ සෙසු රටවල සංවර්ධනය යළි ගොඩනැගිය යුතු බව ද ප්රකාශ කළේය.
ඉන්දියානු රජයේ ආධාර යටතේ උතුරු නැගෙනහිර හා කන්ද උඩරට ප්රදේශවල නිවාස යෝජනා ව්යාපෘති ක්රියාත්මක කර ඇති බව ප්රකාශ කළ අග්රාමාත්ය මහින්ද රාජපක්ෂ මහතා, එවන් නිවාස යෝජනා ව්යාපෘති දකුණු ප්රදේශය කේන්ද්ර කර ගනිමින් ආරම්භ කිරීමට ද සහයෝගය ලබා දෙන ලෙස ඉල්ලා සිටියේය. ඒ සඳහා ඉන්දියානු රජයේ සහයෝගය ලබා දෙන බව ශ්රී අජිත් දෝවාල් මහතා පැවසීය.
එසේම ඉන්දියානු අග්රාමාත්ය නරේන්ද්ර මෝඩි මහතාගේ මඟ පෙන්වීම යටතේ නවීන තාක්ෂණය යොදා ගනිමින් ඉන්දියාවේ ආරම්භ කර ඇති පානීය ජලය ලබාදීමේ ව්යාපෘති පිළිබඳව අවධානය යොමු කරමින්, එම තාක්ෂණය යොදා ගනිමින් ශ්රී ලංකාව තුළ ජල යෝජනා ක්රම ආරම්භ කිරීම සඳහා මෙම හමුවේදී එකඟතාව පළ විය.
මේ පිළිබඳව ඉහළ පෙළේ නිලධාරීන් සමඟ සාකච්ඡා ආරම්භ කිරීමට අවශ්ය කටයුතු කඩිනමින් සූදානම් කරන ලෙස ඉන්දීය ජාතික ආරක්ෂක උපදේශක ශ්රී අජිත් දෝවාල් මහතා, ශ්රී ලංකාවේ ඉන්දීය මහ කොමසාරිස් ගෝපාල් බාග්ලේ මහතාට උපදෙස් ලබා දුන්නේය.
මෙම අවස්ථාව සඳහා ශ්රී ලංකාවේ ඉන්දීය මහ කොමසාරිස් ගෝපාල් බාග්ලේ හා අග්රාමාත්ය ලේකම් ගාමිණී සෙනරත් මහත්වරු එක්වූහ.
