සංවිධානාත්මක අපරාධකරුවෙකු සහ මහා පරිමාණ මත්ද්රව්ය ජාවාරම්කරුවෙකු වන අරුමාහන්දි ජනිත් මධුසංඛ ද සිල්වා හෙවත් ‘පොඩි ලැසී’ ඉන්දියාවේ සිට අද (27) අලුයම දිවයිනට රැගෙන එනු ලැබීය. ඔහු ඊයේ දිනයේ දී රට තුළට ගෙනෙනු ඇතැයි අපේක්ෂාවක් තිබිණි.
පොලිස් විශේෂ නිලධාරී කණ්ඩායමක් විසින් මෙරටට රැගෙන ආ සැකකරු, අද අලුයම 05.55 ට මුම්බායි නුවර සිට ශ්රී ලන්කන් ගුවන් සේවයට අයත් UL-142 දරන යානයෙන් කටුනායක ගුවන් තොටුපොළ වෙත ළඟා විය.
ඝාතන සිද්ධි රැසක් සම්බන්ධයෙන් පොලිසියට අවශ්යව සිටි පොඩි ලැසී, 2024 දෙසැම්බර් 09 වනදා අධිකරණයෙන් ඇප ලබා ගැනීමෙන් අනතුරුව මුහුදු මාර්ගයෙන් ඉන්දියාවට පළා ගොස් තිබුණි. 2025 ජනවාරි මාසයේදී ඉන්දියාවේ මුම්බායි නුවරදී එරට ආරක්ෂක අංශ විසින් ඔහු අත්අඩංගුවට ගනු ලැබුවේ රාජතාන්ත්රික ක්රියාමාර්ග සහ ජාත්යන්තර පොලිසියේ (Interpol) මැදිහත්වීම මතය.
පොලිස් මාධ්ය ප්රකාශක, සහකාර පොලිස් අධිකාරී එෆ්. යූ. වුට්ලර් මහතා සඳහන් කළේ, කටුනායක ගුවන් තොටුපොළෙන් පිටතට රැගෙන ආ සැකකරු වැඩිදුර විමර්ශන සඳහා ගාල්ල දිසා අපරාධ කොට්ඨාසයට භාරදීමට නියමිත බවයි.
මෙම සිද්ධිය සම්බන්ධයෙන් අදහස් දැක්වූ මාධ්ය ප්රකාශකවරයා, ජාත්යන්තර අපරාධකරුවන් මෙරටට ගෙන්වා ගැනීමේ ප්රගතිය පිළිබඳව ද කරුණු අනාවරණය කළේය. ඔහු ප්රකාශ කළේ 2024 වසරේ සිට මේ දක්වා රතු නිවේදන නිකුත් කර තිබූ සැකකරුවන් 29 දෙනෙකු මෙරටට ගෙන්වාගෙන ඇති බවය.
එමෙන්ම පොලිස්පතිවරයාගේ ඍජු මැදිහත්වීම මත, ආගමන විගමන නීති උල්ලංඝනය කිරීම් පදනම් කර ගනිමින් ‘පොඩි ලැසී’ ඇතුළු සැකකරුවන් 14 දෙනෙකු රතු නිවේදන නොමැතිව දිවයිනට ගෙන්වා ගැනීමට සමත් වී ඇති බව ද ඔහු පෙන්වා දුන්නේය.
සංවිධානාත්මක අපරාධකරුවන් සඳහා දැනට රතු නිවේදන 89ක් ලබාගෙන ඇති අතර, 2026 වසර තුළ ඔවුන් මෙරටට ගෙන්වා ගැනීමට උපරිම උත්සාහයක් දරන බව සහකාර පොලිස් අධිකාරීවරයා වැඩිදුරටත් පැවසීය.
