ඇහැලේපොල වලව්වේ නිර්මාණය වු ඉටි රූ කෞතුකාරය විවෘත කිරීමට අදාල දින 04 ක උත්කර්ෂවත් උත්සවය අවසන්ය. ඒ අද මධ්යම රාත්රියෙනි.
පසුගිය 17 වැනිදා ජනාධිපතිවරයා පැමිණ මෙම කෞතුගාරය විවෘත කළ දා සිට පැවති උත්සව මාලාවේ යටි පෙළ වූයේ සැප්තැම්බරයේ පැවැත්වෙන දළදා මාළිගාවේ දියවඩන නිලමේවරයා තේරීමේ ඡන්දයට වත්මන් දියවඩන නිලමේවරයා සූදානම් කිරීමය.
වර්ෂ 2005 සිට වසර විස්සක් ආවරණය කරන ධූර කාල දෙකකින් පසු තුන්වන ධූර කාලයටත් ඔහුව පත්කරගැනීම මෙම ව්යාපෘතියේ අරමුණ වූ බව එම අවස්ථාවට සහභාගී වූ අත්දැකීමෙන් සහතිකර කරගතිමි.
මින් පෙර පුරා දින 10ක ඡන්ද ව්යාපාරයකට දියවඩන නිලමේවරයාට අවස්ථාව සැලසිනි. ඒ දළදා ප්රදර්ශනයට සමගාමීවය. රජයේ නිර්දේශ පසෙක දමා ප්රභූ පෝලිම් සදමින් දියවඩන නිලමේවරයා තමන්ට දියවඩන නිලමේවරයා ලෙස පත්වීම සඳහා ඡන්දය ලබා දීමට සුදුසුකම් ඇති නිලමක්කාරයින්ගේ ඥාති මිත්රාදීන් සහිත පරිවරට දළදා වැන්දවූ ආකාරය සම්බන්ධව එවකට මාධ්යවල පල විය. ඔවුන්ට අදාල සියලු සංග්රහයන් ද ලබාදීමෙන් පසු වීඅයිපී පෝලිම්වල දළදා වැන්දවූ බව කියැවිනි.
එම ව්යාපෘතියේ උත්කර්ෂවත් දෙවැනි අදියර ඉටි රූ කෞතුකාගාරය විවෘත කිරීමට සමගාමීව වූ උත්සව මාලාවය.
17 වැනිදා පස්වරුවේ දී ජනාධිපතිවරයා ඉටි රූ කෞතුකාගාරය විවෘත කළේය. 18 වැනිදා මුළු දිනයම වෙන් කර තිබුණෙ සිංහල දෙමළ සහ මුස්ලිම් සමස්ථ ව්යාපාරික ප්රජාව වෙනුවෙනි. එදිනම සවස මහනුවර මාධ්යවේදීන් ගෙන්වා තිබිණි. 19 වැනිදා පැමිණියේ ලංකාවේම දිසාපතිවරු ප්රාදේශීය ලේකම්වරු ඇතුළු දිවයිනේ පරිපාලන ක්ෂේත්රයේ ප්රජාවය. අද (20) හෝටල් ක්ෂේත්රයේ ප්රධානීන්, හිමිකරුවන්, සහිත හොටල් ව්යාපාරික ප්රජාවත්, අද හවස්වරුවේ රටේ සියලුම මාධ්ය ආයතනවල හිමිකරුවන් සහ මාධ්ය ප්රධානීන්ද ගෙන්වා තිබිණි. මීට අමතරව ඊයේ සහ අද ගෝඨාභය රාජපක්ෂ ඇතුළු හිටපු දේශපාලන නායකයින් ද ඉටි රූ කෞතුකාගාරය නැරඹීමට පැමිණියහ.
මෙම කෞතුකාගාරය නරඹන පිරිස ඉන් පසු රැගෙන යනු ලබන්නේ රජ බොජුන් පිළිබඳ අදහසක් ගෙන එන කිංස් කෝට් අවන්හලටය. එතැන ආහාර සපයන්නේ ද සම්ප්රදායික ක්රමයට. එක් අයෙක් ආහාර වේලක් ගැනීමට සැලකිය යුතු කාලයක් මිඩංගු කළ යුතුය. ඒ කාලය අතර තුර දෙපසවන පටු බිත්තිවල ප්රක්ෂේපනය කර ඇත්තේ දියවඩන නිලමේවරයාගේ වසර 20 මහා ජාතික මෙහෙවර පිළිබඳ විඩියෝ රැසකි. ආහාර ගැනීමට සලස්වන්නේ දියවඩන නිලමේවරයාගේ ජාතික මෙහෙවර ගැන ද පෙන්වා දෙමිනි.
කෙසේ වෙතත් දියවඩන නිලමේ නිලංග දෑල සිය තුන්වැනි ධූර කාලය ලබා ගැනීම සඳහා මේ ඡන්දයේ දී දැනට ප්රමුඛයා ලෙස සිටී. එම අවස්ථාව ඔහුට ලැබුණහොත් සුද්දන් විසින් දළදාවේ ගිහි භාරකාරත්වය දියවඩන නිලමේට පැවරීමෙන් පසු වසර 30ක එම රාජකාරිය කළ පළමුවැන්නා වනු ඇත්තේ ඔහුය.
