ආනයන තීරු බදු ප්රතිශතය තව දුරටත් අඩු කරගැනීමට අදාලව ඇමරිකාව සමග සාකච්ඡා පැවැත්වෙන පසුබිමක ශ්රි ලංකාව සහ ඇමරිකාව අතර වෙළෙඳ ගනුදෙනුවල පරතරය තව දුරටත් අඩු කරගැනීමේ උපාය මාර්ගයක් ලෙස එරටින් බොරතෙල් මිලදී ගැනීමට හැකි වන අයුරින් ක්රියා මාර්ග සකස් කිරීමට ශ්රී ලංකාවේ අවධානය යොමු වී තිබේ.
මෙම පියවර ගෙන ඇත්තේ ආනයන තීරු බදු ප්රතිශතය තව දුරටත් අඩු කරගැනීමට අදාලව සාකච්ඡා පැවැත්වෙන පසුබිමකය.
මේ පිළිබඳ අදහස් දක්වමින් ලංකා ඛණිජතෙල් නීතිගත සංස්ථාවේ කළමනාකාර අධ්යක්ෂ ආචාර්ය මයුර නෙත්තිකුමාරගේ පවසන්නේ මේ හරහා ඇමරිකාව සමග ඇති වෙළෙඳ පරතරය අඩු කරගැනීම සහ තරගකාරි මිලකට බොරතෙල් මිලදී ගත හැකිවනු බවය.
ඔහු මෙසේ ද පැවසුවේය.
“ඇත්තටම අපේ පිරිපහදුවේ බොරතෙල්වල තව තරගකාරීත්වය වැඩි කිරීමේ අවශ්යතාවය තියනවා. ඒ වගේම පහුගිය දවස්වල යුද්ධයත් එක්ක මැද පෙරදිගට පිටින් ලබා ගන්න පුලුවන් බොරතෙල් පිළිබඳව අපි සාකච්ඡාවකවකට ගියා. ඒ ගැන අපි සොයාබැලීම් කළා. අප්රිකානු කලාපයේ සහ වෙනත් කලාපවලින් අපට බොරතෙල් ලබා ගැනීම සඳහා අපි උත්සාහයක් දරමින් ඉන්නවා.”
“එතකොට අපේ තියන පිරිපහදුවේ ඒ සියලුම බොරතෙල් පිරිපහදු කරන්න පහසුකම් නෑ. ඒ හින්දා අපට සාම්පල් පරීක්ෂා කරලා පුලුවන් බොරතෙල්වලට අපි අපේ ටෙන්ඩර් පටිපාටිය ඕපන් කරන්න ඉන්නේ. ඒ අනුව තමයි අපි WTI බොරතෙල් ඇමරිකාවෙන් ගෙනෙන බවට ගෙන ඒම සඳහා මේ වනවිට සාම්පල් ලබා ගැනීමට කටයුතු කරලා තියෙන්නේ. ඒ සාම්පල් පරීක්ෂා කරලා නිවැරදි උනෝතින් අපි කරන දේ තමයි ටෙන්ඩර් එකකට ඒ ගොල්ලන්ට එන්න අවස්ථාව සලසන එක.”
“එතකොට ඒ ටෙන්ඩර් පටිපාටිය යටතේ අපි ඛණිජතෙල් නීතිගත සංස්ථාව හැටියට බලාපොරොත්තු වෙන්නේ වැඩිම තරගකාරිත්වය යටතේ අඩුම මිලට ලැබෙන බොරතෙල් ලබා ගන්න තමයි අපි බලාපොරොත්තු වෙන්නෙ. අපි විශ්වාස කරනවා ඒක හරහා අපේ ඔය වෙළෙඳ පරතරය අඩු කරගැනීමටත් ලංකාවට ඉතා වාසිදායක තත්ත්වයක් ඇති කරගැනීමටත් පුලුවන් වේවි කියලා. “
