ඇමරිකානු පැසිෆික් නාවික බලඇණියේ ආඥාපති අද්මිරාල් ස්ටීව් “වෙබ්” කෝලර් (Steve “Web” Koehler) තෙදින නිල සංචාරයක් සඳහා අද (19) දිවයිනට පැමිණීමට නියමිතය.
පෙබරවාරි 21 දක්වා මෙරට රැඳී සිටින ඔහු, දෙරට අතර ආරක්ෂක සහයෝගීතාව ශක්තිමත් කිරීම අරමුණු කරගත් ඉහළ පෙළේ සාකච්ඡා කිහිපයකට එක්වනු ඇත.
මෙම සංචාරය අතරතුර අද්මිරාල් කෝලර් ශ්රී ලංකා රජයේ ඉහළ පෙළේ නිලධාරීන් සහ මෙරට ආරක්ෂක අංශ ප්රධානීන් හමුවීමට සැලසුම් කර තිබේ. එහිදී සාගරික ආරක්ෂාව ප්රවර්ධනය කිරීම, කලාපීය ස්ථාවරත්වය තහවුරු කිරීම සහ දෙරටේ ආරක්ෂක අංශ අතර අන්තර් ක්රියාකාරිත්වය වර්ධනය කර ගැනීම පිළිබඳව දීර්ඝ වශයෙන් සාකච්ඡා කිරීමට නියමිතය.
ලොව විශාලතම නාවික බලඇණි විධානයවන ඇමරිකානු පැසිෆික් නාවික බලඇණිය, ලෝකයෙන් අඩකටත් වඩා වැඩි ප්රදේශයක් ආවරණය කරමින් සාගර වෙළඳ මාර්ග ආරක්ෂා කිරීමට සහ ඉන්දු-පැසිෆික් කලාපීය සහයෝගීතාව වර්ධනය කිරීමට කැපවී සිටී.
අද්මිරාල්වරයාගේ මෙම සංචාරය පිළිබඳ අදහස් දක්වන ඇමරිකානු පාර්ශවය අවධාරණය කරන්නේ, ගෝලීය සමුද්රීය වෙළඳ මාර්ගයන්හි කේන්ද්රස්ථානයක පිහිටි ශ්රී ලංකාවේ උපායමාර්ගික වැදගත්කම මෙමගින් මනාව පිළිබිඹු වන බවය. එසේම නිදහස්, විවෘත සහ සමෘද්ධිමත් ඉන්දු-පැසිෆික් කලාපයක් වෙනුවෙන් වූ දෙරටේ පොදු කැපවීමද මෙහිදී යළි තහවුරු කෙරේ.
ශ්රී ලංකා ආරක්ෂක අංශවල වෘත්තීයභාවය සහ හැකියාවන් කෙරෙහි වොෂින්ටන් පාලනයේ ඇති විශ්වාසය මෙම සංචාරයෙන් තහවුරු වන බවත්, සාගරික කලාප පිළිබඳ දැනුවත්භාවය සහ අන්තර්ජාතික තර්ජන මැඩලීම වැනි පොදු අභියෝගයන්ට මුහුණ දීම සඳහා විනිවිදභාවයකින් යුත්, දිගුකාලීන ආරක්ෂක සබඳතා ගොඩනැගීමට ඇමරිකාව සහය වන බවත් වැඩිදුරටත් සඳහන් වේ.
