ආරක්ෂක අමාත්යංශය විසින් පෞද්ගලික ආරක්ෂාව සඳහා පුද්ගලයින් වෙත බලපත්ර මත නිකුත් කර තිබෙන ගිනිඅවි ආපසු භාර දෙන ලෙස පසුගියදා ආරක්ෂක අමාත්යංශයේ ලේකම්වරයා විසින් නිකුත් කළ නිවේදනය බලරහිත කිරීමේ නියෝගයක් ලබාදෙන ලෙස ඉල්ලා අභියාචනාධිකරණයට පෙත්සමක් ඉදිරිපත් කර තිබේ.
ඇවෙන්රා හෝටල් සමූහයේ අධිපති එච්.ඩී. නවින්තක ද සිල්වා විසින් එම පෙත්සම ඉදිරිපත් කළේය.
එහි වගඋත්තරකරුවන් ලෙස ආරක්ෂක අමාත්යාංශයේ ලේකම්වරයා, රාජ්ය බුද්ධි සේවයේ අධ්යක්ෂවරයා සහ වැඩබලන පොලිස්පතිවරයා ඇතුළු පිරිසක් නම්කර තිබේ.
නීතිඥ සනත් විජයවර්ධන මාර්ගයෙන් ගොනුකර තිබෙන මෙම පෙත්සමෙන් පෙත්සම්කරු කියා සිටින්නේ 2012 හෝ 2013 වසරවල තමන්ට එල්ල වූ බරපතළ තර්ජන හේතුවෙන් ආරක්ෂක අමාත්යංශය වෙතින් බලපත්රයක් යටතේ ගිනි අවි ලබාගත් බවයි.
අරගලය පැවති සමයේ සිය හෝටල්වලට අලාභ හානි සිදුකළ බවත් තමන් ජීවත් වන්නේ එවැනි තර්ජන සහිත පරිසරයක බවත් ඔහු සිය පෙත්සමේ සඳහන් කර ඇත.
මෙම වාතාවරණය තුළ බලපත්රය යටතේ නිකුත් කර තිබෙන ගිනි අවි ආපසු භාර දෙන ලෙස ඉකුත් 07 වනදා ආරක්ෂක ලේකම්වරයා විසින් නිවේදනයක් නිකුත් කර තිබෙන බව තමන්ට දැනගන්නට ලැබුණු බව පෙත්සම්කරු සඳහන් කරයි.
මෙම තීරණය හේතුවෙන් ව්යාපාරිකයෙකු වශයෙන් තමන්ට දැඩි තර්ජනකාරී තත්ත්වයක් උද්ගතවී ඇතැයි පෙන්වා දෙන පෙත්සම්කරු මෙම තීරණයට එරෙහිව අභියාචනයක් ඉදිරිපත් කළත් සෙතක් නොවූ බව ද සඳහන් කර තිබේ.
ඒ අනුව ආරක්ෂක ලේකම්වරයා විසින් නිකුත් කර තිබෙන අදාළ නිවේදනය බලරහිත කිරීමේ රිට් ආඥාවක් නිකුත් කරන ලෙසත් මෙම පෙත්සම විභාගකොට අවසන් තීන්දුවක් ප්රකාශයට පත් කරන තුරු අදාළ නිවේදනය ක්රියාත්මකවීම වැළැක්වීමේ අතුරු තහනම් නියෝගයක් නිකුත් කරන ලෙසත් පෙත්සම්කරු අභියාචනාධිකරණයෙන් ඉල්ලා තිබුණි. – දෙරණ
