නව කතානායක ධූරය සඳහා පොළොන්නරුව දිස්ත්රික්කය නියෝජනය කරන මන්ත්රී වෛද්ය ජගත් වික්රමරත්න පත් කිරීමට තීරණය කර ඇති බවත් නව කතානායකවරයා ලෙස ජාතික ජන බලවේගය නියෝජනය කරන නියෝජ්ය කතානායක වෛද්ය රිස්වි සාලි, මන්ත්රී නිහාල් ගලප්පත්ති ඇතුළු නම් කිහිපයක් මාධ්යවල පළ වුවත් ඒවා සාවද්ය බවත් ජාතික ජන බලවේගයේ අභ්යන්තර තොරතුරු උපුටා දක්වමින් මව්බිම වාර්තා කරයි.
හෙට (17) රැස්වන පාර්ලිමේන්තුවේ දී මෙම තෝරා පත්කරගැනීම සිදුවනු ඇතැයි රජයේ ආරංචි මාර්ග පවසයි. නව කථානායකවරයා සම්බන්ධයෙන් අවසන් තීරණයක් ගැනීම සඳහා ආණ්ඩු පක්ෂයේ මන්ත්රී කණ්ඩායමේ රැස්වීමක් ද අද දිනයේ පැවැත්වීමට නියමිතය
දැනට මූලික වශයෙන් කථානායකවරයා ලෙස යෝජනා වී ඇති වෛද්ය ජගත් වික්රමරත්න කතානායකවරයා ලෙස පත් කරන්නට රජය සැලසුම් කරන්නේ විපක්ෂයෙන් ද එම තනතුර සඳහා නාම යෝජනාවක් ඉදිරිපත් කිරීමට සූදානම් වී ඇති පසුබිමකය. විපක්ෂය වෙනුවෙන් කථානායක ධූරය සඳහා නාම යෝජනාවක් ඉදිරිපත් කරන බව පවසන සමගි ජන බලවේගයේ පාර්ලිමේන්තු මන්ත්රී නලීන් බණ්ඩාර අවධාරණයෙන් ප්රකාශ කළේ තව දුරටත් තමන්ට ජාතික ජන බලවේගයේ මන්ත්රීවරුන්ගේ සිදුසුකම් සම්බන්ධව විශ්වාසයක් නැති බවය.
වරක් රැවටුන තමන් යළිත් වරක් රැවටීමට ලක් වීමේ අවදානම නොදන්නා බව කී නලින් බණ්ඩාර මන්ත්රීවරයා විපක්ෂයෙන් මන්ත්රීවරයෙක් යෝජනා කරන බව කීවේ විශේෂඥ වෛද්යවරයෙක් ලෙස පෙනී සිට මැතිවරණය ව්යාපාරයේ යෙදුන නියෝජ්ය කථානායක රිස්වි සාලිගේ සුදුසුකම් ද මේ වනවිට සමාජය ඉදිරියේ අභියෝගයට ලක් වෙමින් ඇති බව පෙන්වා දෙමිනි. කෙසේ වෙතත් විපක්ෂයෙන් ඉදිරිපත් කරන නියෝජිතයා කවරෙක් දැයි මේ වනවතුරුත් සමගි ජන බලවේය ද ප්රකාශ කර නැත.
ව්යාජ උසස් අධ්යාපන සහතික ඉදිරිපත් කරීම සම්බන්ධව බරපතල සමාජ අපවාදයකට ලක්වන 10 වැනි පාර්ලිමේන්තුවට පත් වූ හිටපු කථානායක අශෝක රන්වල ලංකා ඉතිහාසයේ අඩුම කාලයක් කථා නායක ධූරය දැරූ පුද්ගලයා ලෙස එම තනතුරින් ඉල්ලා අස් වන්නේ සදාචාරය සහ පාරිශුද්ධත්වය සම්බන්ධවත් පිවිතුරු පාර්ලිමේන්තුවක් සම්බන්ධවත් දැවැන්ත ජනතා මතවාදයක් ගොඩ නගමින් බලයට පැමිණි ජාතික ජන බලවේග රජය බරපතල ලෙස ප්රශ්න කිරීමකට ලක් කරමිනි.
කෙසේ වෙතත් සමාජ අපවාදය මැද පසුගිය 13 වැනිදා ඉල්ලා අස්වීම ඉදිරිපත් කළ අශෝක රන්වලගේ ඉල්ලා අස්වීම ජනාධිපතිවරයා විසින් පිළිගන්නා ලදුව ජනාධිපති ලේකම්වරයා පාර්ලිමේන්තු මහලේකම්වරියට ලිඛිතව දැනුම් දී තිබිණි.
වාර්තාවන ආකාරයට මේ වනවිට කථානායකවරයා ලෙස රජයෙන් යෝජනා කිරිමට සැරසෙන වෛද්ය ජගත් වික්රමරත්න ජාතික ජන බලවේග පොළොන්නරුව දිස්ත්රික් මනාප ලැයිස්තුවේ දෙවන තැන හිමි කරගත් මන්ත්රීවරයාය.
