ඉදිරිපත් කර ඇති ඉදිරිගාමී අධ්යාපන ප්රතිසංස්කරණ සියල්ලටම උපරිම සහාය ලබා දෙන බවත් මේ ප්රතිසංස්කරණයට දේශපාලන විවේචන ඉදිරිපත් කිරීමෙන් වැලකී සිටින නමුත් වසර 44කට පසු මේ සංශෝධන සහිතව ඉදිරිපත් කර ඇත්තේ ජනතා විමුක්ති පෙරමුණ බරපතල ව්යසනයක් කර කඩාකප්පල් කළ 1981දී රනිල් වික්රමසිංහ විසින් ඉදිරිපත් කළ අධ්යාපන ධවල පත්රිකාව බවත් සමගි ජන බලවේගයේ පාර්ලිමේන්තු මන්ත්රී අචාර්ය හර්ෂ ද සිල්වා පැවසුවේය.
ඔහු පෙන්වා දුන්නේ මේ ඉදිරිපත් වී ඇති ප්රතිසංස්කරණයන් යහ පාලන රජයේ අකිල විරාජ් කාරියවසම් විසින් දියත් කර, ඉන් පසුව පැවති ගෝඨාභය ආණ්ඩුවේ දී සංවර්ධනය වුන සංකල්ප සහිත වැඩපිළිවෙළක සංශෝධනයක් සහිත ඉදිරියක් බවය. රජයෙන් රජයට අධ්යාපනය සම්බන්ධ ප්රතිපත්තිය විතැන් නොවී අඩුපාඩු පුරවා ගනිමින් එකම දිශාවකට ගමන් කරවන වැඩපිළිවෙළක් ජාතියක් ක්රියාත්මක කිරීම ගැන රජයට ස්තුතිවන්ත වෙන බවය.
“වැඩේ අවුල් කරන්න එපා… සහයෝගය දෙන්න… අනාගත අභියෝග ජය ගන්න පුලුවන් සජීවී ජීවිතයක් තියන නූතන දරුවෙක් බිහි කරන්න කියන එකයි ජනාධිපති තුමා කිව්වේ. . කිසිසේත්ම අපි ඒකට විරුද්ධ නෑ. අපි එකඟ වෙනවා. හැබැයි මේ දේවල් කතාවට පමණක් සීමා වෙන්න බෑ. ”
“මේක තමයි 2019 යහපාලන කාලයේ අකිල විරාජ් කාරියවසම් ඇති කරලා තිබුණ ප්රතිසංස්කරණයට දාලා තිබුණ ටයිටල් එක. 2020 ප්රතිසංස්කරණවල ටයිටල් එකත් මේකමයි. මේක හොඳ දෙයක්. ඒකට අපි ගරු කරනවා. මේක තමයි වෙන්න ඕන. හරිනි අමරසූරිය අගමැති තුමිය අද ඉදිරිපත් කරලා තියෙන්නේ සංශෝධන සහිත එම වැඩපිළිවෙළ.”
“අපි රාමුව හදන්න ඕන කියලා ජනාධිපතිතුමා කිව්වා. අධ්යාපනඥයො තමයි මේ ප්රේම් වර්ක් එක පුරවන්න ඕන. මේකේ කුළුණු පහක් ගැන කතා කරනවා. එතනදි කුඩා පාසල් ගැන මුදල් ගැන කතා කළා. ගුරු පුහුණුව ගැන කතා කරලා. මොඩියුල සිස්ටම් එක තමයි ලෝකයේ යන්නේ. ඒවා සාධනීය දේවල්.
“මේ සියලු දේට එකඟයි. මේ ප්රතිසංස්කරණ වැඩපිළිවෙළ සම්බන්ධව රටේ පුළුල් කථිකාවතක් ආරම්භ කරන්න ඕන. පයිලට් ප්රොජෙක්ට් එකක් කරන්නෙ නැතිනම් සියලු දෙනාම එකතු කරගන්න වේවි මේ වැඩපිළවෙළට. කවුරු මොනවා කිව්වත් 1931 දි ඉඳන් කන්නංගර මැතිතුමා විසින් ඉදිරිපත් කළ ජාතික අධ්යාපන වැඩපිළිවෙළ තමයි මේ ඉස්සරහට යන්නේ. ඒ ගමනේදි බොහෝ ගැටුම්වලට ලක් වුනා. එතුමා ඡන්දෙත් පැරදුනා. 1956දි සිද්ධ වුන දේ කවුරුත් දන්නවා.”
මේ වකවානුවේ දී චන්ද්රිකා මැතිණිය ගෙනාපු වෙනස්කම් ගැන අමතක කරන්න එපා. 1981 රනිල් වික්රමසිංහ මහත්මයා ගෙනාපු අධ්යාපන ධවල පත්රිකාව සම්බන්ධයෙන් මෙතන කතා කළ යුතුයි. අපිට පේන එක වැදත් දෙයක් තියනව. අද ඉදිරිපත් කරලා තියන අධ්යාපන ප්රතිසංස්කරණවල මූලික හරය ඉදිරිපත් වෙලා තියෙන්නේ මීට අවුරුදු 44කට කලින්. මේ ඉදිරිපත් කළ ධවල පත්රිකාවේ. මේ ඉදිරිපත් වෙන්නේ ඒකේ සංශෝධනයක් වෙන්න පුලුවන්. නමුත් අවුදුරු 44ක් අපට මිස් උනේ කොතැන ද කියලා බලන්න වෙනවා.
ධවල පත්රිකාවට මොකද උනේ කියලා ජේ.වී.පී එක අය දන්නවා. එදා ජේ.ආර්.ගේ විවෘත ආර්ථික ආන්ඩුව අධ්යාපනය හොර පාරෙ විකුණන්න හදනවා කියලා තමයි කිව්වේ. කෙසේ වෙතත් ගරු ජනාධිපති තුමා අද ඒක පිළිගන්න. දැන් පරණ වැටුන වලේ නොවැටී ඉඳීවි කියලා අපි හිතනවා.
“රටේ අනාගතය අනතුරට දාන්නේ නැතිව එකතුවෙලා මේ දේ කරමු. මහින්ද ජයසිංහ මහත්මයලා ගුරුවරු පාරට බස්සලා නවත්වපු අධ්යාපන ප්රතිසංස්කරණ ඔවුන් විසින් ඒ විදිහටම යෝජනා කිරීම දෛවයේ සරදමක් කියලා මා විශ්වාස කරනවා.”
ඉංග්රීසි ගැන ජනාධිපති තුමා මෙතනදි කතා කළේ නෑ වැඩිය. මම දේශපාලකයෙක් විදිහට අවුරුදු විස්සක් විතර කළ පරීක්ෂණයක් තියනවා. සමූහයක් එකතුවෙන තැනකට ගියාට පස්සේ මම අහනවා ඔබ ඔබ් දරුවන්ට අධ්යාපනය ලබා දෙන්න ඕන මාධ්ය ඉංග්රිසී ද සිංහල ද කියලා. අතිශය බහුතරයක් අවස්ථාවල සියයට සීයක් කැමති වෙන්නේ දරුවන්ට ඉංග්රීසි භාෂාවෙන් අධ්යාපනය ලබා දෙන්න. ඉංග්රීසි භාෂාවෙන් අධ්යාපනය ලබා ගත්තා කියලා තමන්ගේ භාෂාව සංස්කෘතිය අමතක වෙන්නේ නෑ. ලෝකය ජයගන්න වගේම ගමේ පාසලේත් කොළඹ රාජකීය විද්යාලයෙත් වෙනස යා කරන පාලම ඉංග්රීසි භාෂා අධ්යාපනය වේවි.
ඒ මොන දේ තිබුණත් ගීයක් රස විඳින්න බැරි, චිත්රයක් විඳන්න බැරි පරම්පරාවක් වෙනුවට සංවේදී මිනිස්සු ටිකක් රටේ අධ්යාපන ක්රමය තුළින් බිහි විය යුතුයි.
අපි එකඟයි. මේ ප්රතිසංස්කරණ එකතු වෙමු. සියලු දෙනාම එකට එකතු වෙමු. ඔබතුමියට සුබ පතනවා…” ආචාර්ය හර්ෂ ද සිල්වා පැවසුවේය.
