දෙවැනි විස්සයි 20 තරගය තියුණු ලකුණු 05කින් පරාජය වන්නේ ලකුණු 108ක ජයග්රාහී ඉලක්කයක් හඹා ගිය දඹුල්ල තණ තිරූවේය. ඒ තරගයෙන් පසු ශ්රි ලංකා නායකයකා කතා කළේ හොඳ කම් බෑක් එකක් ගැනය. අද නැවත නැගිටීම අප දුටුවේ පොලා පනිමිනි. මේ වනවිට ශ්රි ලංකා ඉනිම පන්දු ඕවර 49.2ක් තුළ කඩුළු 05ක් දැවී ලකුණු 324කට නැවතී තිබේ. දඹුල්ලට මහ වැසි ඇද හැලෙමිනි.
තරග තුනකින් සමන්විත ශ්රී ලංකා නවසීලන්ත පළමු එක් දින තරගයේ පළමු ඉනිම සැනකෙළියකි. තරගයේ කාසියේ වාසිය දිනා ගත්තේ ශ්රි ලංකා කණ්ඩායමය. ඔවුහු පන්දුවට පහර දීම තේරූහ. එක්දින ජාත්යාන්තර තරගයක් දඹුල්ලේ මේ පැවැත්වෙන්නේ වසර හයකින් පසුවය. එබැවින් මේ තරගය සම්බන්ධව අප කවුරු තුළත් විචිකිච්ඡාවක් වූයේය. විස්සයි 20 තරගයක දී ලකුණු 108ක් ආරක්ෂා කරගෙන ජයග්රහණය ලබන්නට නවසීලන්තයට හැකි වූයේ මීට දින හතරකට පෙර මේ ක්රීඩාංගනයේ දීම ය.
එහෙත් අද මේ තණ තීරුව හැසිරෙමින් තිබුණේ පිතිකරණයේ පාරාදිසියක් ලෙසය. එය කදිම තරගයක් වුයේය. අවිශ්ක ප්රනාන්දු සහ කුසල් මෙන්ඩිස් ශතක ලබා ගත්හ. දෙවැනි කඩුල්ල වෙනුවෙන් ගොඩනැගුන සම්බන්ධතාවය වාර්තාගත එකකි. පළමු කඩුල්ල වෙනුවෙන් එක්දින ජාත්යාන්තර තරගයක දී නවසීලන්තයට එරෙහිව රැස් කළ වැඩිම ලකුනු සංඛ්යාව ලෙස මෙතෙක් පැවතියේ ජයසූරිය සහ තරංග අතර වර්ෂ 2001 දී ගොඩනැගුන ලකුණු 201 සම්බන්ධතාවය ය. එම වාර්තාව අද කුසල් මෙන්ඩිස් සහ අවිශ්ක ප්රනාදු බිඳ දැමූහ. ඔවුන් දෙදෙනා දෙවැනි කඩුල්ල වෙනුවෙන් ලකුණු 206ක විශිෂ්ට සම්බන්ධතාවයක් ගොඩනැගන්නේ පන්දු 215ක් තුළය.
ඉනිමේ මුල් කඩුල්ල දැවී යන්නේ මුළු ලකුණු සංඛ්යාව 17ක්ව තිබිය දීය. ලකුණු 12කට පැතුම් නිශ්ශංක දැවී යන්නේ 3ඕවරයේ 4 වැනි පන්දුවේ දී ය. තුන් වැනි ඕවරය යවමින් සිටි ජාකොබ් ඩුෆී ගේ දෙවැනි සහ තුන් වැනි පන්දු දෙකට පිට පිට හතරේ පහර දෙකක් එල්ල කළ පැතුම් වම් ඉන්නට පිටින් ඉහළ නැගි ඩුෆී ගේ සිව් වන පන්දුවට අපර් කට් පහරක් එල්ල කළේය. පන්දුව ඉහළින්ම ඩීප් තර්ඩ් මෑන් කලාපයට යොමු විය. එය ලකුණු 6ය් යැයි සිතුන පහරකි. එහෙත් නේතන් ස්මිත් වේගයෙන සිය දකුණු පසට දිව විත් ගුවනට පැන ලබා ගත් විශිෂ්ට උඩ පන්දු රැකීමකින් පැතුම් පිටියෙන් ඉවත් වූයේය.
එතැන් සිට කුසල් සහ අවිශ්ක අතර ගොඩනැගෙන්නේ ප්රහර්ෂවත් ඉනිමකි. 3 වැනි ඕවරයේ යැවූ 4 වැනි පන්දුවේ දී පැතුම් දැවී ගිය පසු කුසල් සහ අවිශ්ක අතර ගොඩනැගෙන දිවිත්ව ශතක සම්බන්ධය නිමා වන්නේ 38 වැනි ඕවරයේ 2 වැනි පන්දුවෙනි. ඒ වනවිට අවිශ්ක පන්දු 115ක දි සිය ශතකය රැස් කරගෙන සිටියේය. ඉෂ් සෝධි එවූ පන්දුවකට විල් යන්ග් විසින් මිඩ් ඕෆ් හි සිට උඩ පන්දුව රැකගෙන ඔහුගේ ඉනිම නිමා කරන විට කුසල් සහ අවිශ්ක නවසීලන්තයට එරෙහිව වාර්තාවක් තබා අවසන්ය. අවිශ්ක දැවී ගිය පසු පිටියට පැමිණි සධීර සමරවික්රම සාර්ථක වූයේ නැත. ඔහු මුහුණ දෙන්නේ පන්දු 4කට පමණි. ලකුණු 05කට සධීර දැවී යන්නේය.
පන්දු 128ක දී ලකුණු 143ක් රැස් කරගෙන සිටිය දී කුසල් මෙන්ඩිස් දැවී යන්නේ 45 වැනි ඕවරයේ 2 වැනි පන්දුවේ දී ය. ලකුණු 150 පෙනි පෙනී කුසල් මෙන්ඩිස් දැවී යන්නේය. ජාකොබ් ඩුෆී පිට ඉන්නෙන් පිටත පතිත කළ පන්දුවට කුසල් එල්ලකළ පහර මදක් ඉපිලී එද්දී මිඩ් ඕෆ් හි පන්දු රකිමින් සිටි හෙන්රි නිකලොස් විසින් රැක පහසුවෙන් ගන්නේය. මෙන්ඩිස් පිටියෙන් ඉවත් වන්නේ නවසීලන්ත ක්රීඩකයින්ගේ ආදරය හිතෙන ක්රීඩා ශීලී ගුණය සහිත සුබ පැතුම් අතරය.
කුසල් දැවී ගිය පසු අසලංක සමග එක්වන ජනිත් ලියනගේ යළිත් වරක් වාර්තාවක් වෙත ශ්රී ලංකා කණ්ඩායම කැඳවාගෙන යමින් සිටියේය. ඒ නවසීලන්තයට එරෙහි මෙතෙක් කණ්ඩායමක් ලබා ගත් ඉහළම ලකුණු ගණන වූ 326 ඉක්මවා යෑමය. එහෙත් නායක චරිත් අසලංක අසලංක ලකුණු 49.2 දැවී යන්නේ පන්දු 28 කදී ලකුනු 40ක් ලබාගෙන සිටියදී ය. ජනිත් ලියනගේ පන්දු 13ක් තුළ ලකුණු 12ක් ලබාගෙන නොදැවී ක්රීඩා කරමිනි. බොහෝ විට නැවත ශ්රි ලංකා ඉනිමේ ඉතිරි පන්දු 4 නොයැවෙනු ඇත.
ශ්රී ලංකා කණ්ඩායම වෙනුවෙන් පැතුම් නිශ්ශංක, අවිශ්ක ප්රනාන්දු, කුසල් මෙන්ඩිස්, සධීර සමරවික්රම, චරිත් අසලංක, කමිඳු මෙන්ඩිස්. ජනිත් ලියනගේ, මහීෂ් තීක්ෂණ, ජෙෆ්රි වැන්ඩර්සේ, ඩිල්ෂාන් මධුශංක සහ අසිත ප්රනාන්දු ක්රීඩා කරති. වනිඳු වෙනුවට වැන්ඩර්සේ කැඳවා තිබේ. වර්ෂාවෙන් පසු තණ තීරුව වැඩිපුර දඟ කැවෙන බව මිෂෙල් සැන්ට්නර් ඊයේ කීවේය. ඒ විස්සයි විස්ස තරගය ශ්රී ලංකා පිතිකරුවන්ට අපහසු වූ හේතුව කියමිනි. දැන් මහා වැස්සකි. තණ තිරුව වසා දමා ඇත. මේ වැස්සෙන් අනතුරුව ඩක්වර්ත් ලුවිස් න්යාය අනුව අඩු පන්දු ඕවර ගණක දී තියුණු ඉලක්කයක් නවසීලන්තයට ලැබෙන්නට ඉඩ තිබේ. ඒ අභියෝගය ඔවුන් ගනු ඇත්තේ කෙසේ ද යන්න පිළිබඳව දැන් අප විමසිල්ලෙනි.
