මනම්පිටිය නිමල් ජයරත්න –
ඓතිහාසික දිඹුලාගල කඳු මුදුනෙන් සොයාගත් ශ්රී ලංකාවේ මෙතෙක් හමු වු විශාලතම සෙල්ලිපියෙන් ශ්රි ලංකාවේ ඉතිහාසය පිළිබඳ අලුත් පරච්ඡේදයක් මතු වනු ඇතැයි සැකකරන බව පුරාවිද්යා නිලධාරී තනුර දයානන්ද පවසයි.
මීට මාසයකට පමණ ඉහතදී, පුරාවිද්යා දෙපාර්තමේන්තුවේ ප්රධාන කාර්යාලයේ ශිලාලේඛන අංශයේ නිලධාරීන් සහ දිඹුලාගල නාමල්පොකුණ පුරාවිද්යා නිලධාරීන් ඇතුළු පිරිසක් විසින් අඩි 50 ක් දිග සහ අඩි නමයක් උසැති මෙම සෙල්ලිපිය සොයා ගනු ලැබුවේය.
මී කඩන්නට කන්දට ගිය ගැමියෙක් විසින් මෙම ශිලා ලේඛනය පිළිබඳ මුල්ම තොරතුර මීට මාස තුනකට පෙර පුරවිද්යා නිලධාරීන් වෙත ලබා දී තිබිණි.
එම සෙල්ලිපිය ඉකුත් 26 වෙනිදා සිට පුරාවිද්යා නිලධාරීන් පිරිසක් විසින් පිටපත් කිරීමේ කටයුතු ආරම්භ කර තිබිණි.
මිහිඳු මහරහතන් වහන්සේ ශ්රී ලංකාවට වැඩම කර වසර සීයකට පමණ පසුව මෙම සෙල්ලිපිය ස්ථාපිත කර ඇති බවට සැලකෙන බව මේ පිළිබඳ අධ්යයනය කරන පුරාවිද්යා ක්ෂේත්ර නිලධාරීන් සඳහන් කරයි.
තව දින කීපයකින් පිටපත් කර අවසන් කිරීමට බලාපොරොත්තු වන මෙම විශාලතම සෙල්ලිපිය ක්රිස්තු පූර්ව තුන්වන හා පලමුවන සියවස අතර කාලයට අයත් බවට සැලකෙන අතර එය පූර්ව බ්රාහ්මීය අක්ෂරවලින් කොටා ඇති බවද තනුර දයානන්ද සඳහන් කරයි.
අඩි 50 ක් දිග සහ උසින් අඩි නවයක් පමණ යුතු මෙම සෙල්ලිපියේ එක් පේලියකට පූර්ව බ්රාහ්මී අකුරු දෙසීයක් පමණ අඩංගු වී ඇති බවද දයානන්ද සඳහන් කරයි.
දැනට සොයාගත් ඇති කරුණු අනුව ඓතිහාසික නාමල්පොකුණ කඳුවැටියට කිලෝමීටර් තුනක් පමණ උසින් පිහිටි පර්වතයකින් මෙම ලිපිය සොයාගෙන තිබේ.
මෙම සෙල්ලිපිය ඉතා ඉක්මනින් පිටපත්කර දෙස් විදෙස් සංචාරකයන්ට නැරඹීමට අවකාශය උදා කරන බවත්, එය මතු පරපුරට ආරක්ෂා කිරීමේ වගකීම පුරාවිද්යා දෙපාර්තමේන්තුවටත් රජයටත් භාර කරන බවත්, ඒ සඳහා ඕනෑම වැඩපිළිවෙලකට තමන්ගෙ සහය ලබාදෙන බවත් ඓතිහාසික දිඹුලාගල ආරණ්ය සේනාසනාධිපති දිඹුලාගල රාහුලාලංකාර නාහිමියෝ සඳහන් කරති.
