කිරින්ද ධීවර වරායේ වැලි කැනීමේ ව්යාපෘතියක් කොරියානු සමාගමකට ලබා දී රජයට රුපියල් කෝටි දෙකකට අධික පාඩුවක් සිදුකළේ යැයි කියන සිද්ධිය සම්බන්ධයෙන් සැක කරුවෙක් ලෙස නම් කර ඇති හිටපු ධීවර අමාත්ය රාජිත සේනාරත්න පසුගිය 26 වැනිදා සිට පදිංචි නිවස අතහැර ගොස් ඇතැයි අල්ලස් කොමිසම අද කොළඹ අතිරේක මහේස්ත්රාත් හර්ෂණ කැකුණවෙලට දැනුම් දුන්නේය.
කොමිසම මේ සම්බන්ධව දැනුම් දුන්නේ සැකකාර රාජිත සේනාරත්න අත් අඩංගුවට ගැනීමට වරෙන්තු ලබා ගැනීමට මෝසමක් ගොනු කරමිනි.
සැකකාර හිටපු අමාත්ය රාජිත සේනාරත්නට අල්ලස් කොමිසමට පැමිණ ප්රකාශයක් ලබා දෙන ලෙස දැන්වූ නමුත් අසනීප බවට කරුණු ඉදිරිපත් කරමින් දිගින් දිගටම අල්ලස් කොමිසම මග හරිමින් සිටින බව එම කොමිසම අධිකරණයට දැනුම් දුන්නේය.
කොමිසමේ නිලධාරීන් අධිකරණයට දැන්වූයේ දින 15ක කාලයක් ඔහුගේ ජංගම දුරකථනය ක්රියා විරහිත කර ඇති බවය.
සැකකරුට අල්ලස් කොමිසමට පැමිණෙන ලෙස දන්වා යැවූ ලිපිය, සැකකරු කොමිසමට පැමිණිය නොහැකි බවට දන්වමින් එවු වෛද්ය සහතිකය හෝ යම් ලේඛනයක් අධිකරණයට ඉදිරිපත් කරන්නේදැයි අතිරේක මහේස්ත්රාත්වරයා විමසූ අවස්ථාවේ දී අල්ලස් කොමිසම පැවසුවේ එම අවස්ථාවේ දී අදාල ලේඛණ පැමිනිල්ල සතුව නොමැති බවය. ඒවා විමර්ශන ගොනුවට ඇතුළත් කර ඇති බවය.
අදාල ලේඛණ අධිකරණයට ඉදිරිපත් කිරීම අත්යාවශ්ය බව දැනුම් දුන් අත්රේක මහේස්ත්රාත්වරයා නඩුවක සැක කරුවෙක් නම් ඔහුව අත් අඩංගුටවට ගැනීමට අල්ලස් කොමිසමට කිසිම බාධාවක් නැති බව කියා සිටියේය.
එමෙන්ම සැකකරු අත් අඩංගුවට ගෙන අධිකරණයට ඉදිරිපත් කිරීමට වරෙන්තු අවශ්ය නොවන බවත්, වරෙන්තු අවශ්ය නම් අදාල ලේඛන ඉදිරිපත් කර වරෙන්තු ලබා ගන්නා ලෙසත් අතිරේක මහේස්ත්රාත්වරයා අදාල නිලධාරීන්ට දැනුම් දුන්නේය.
