-
දරුවාට සහ දැරියට අල්ටෙයාර් තට්ටු නිවාස සංකීරණයට ඇතුළු වීමට අවසර දුන් එහි පදිංචි ඔවුන්ගේ මිතුරා පකිස්ථාන් ජාතික සිසුවෙක්… එම සිසුවාගේ පියා පකිස්ථාන තානාපති කාර්යාලයේ උසස් නිලධාරියෙක් නිසා සිසුවාගෙන් ප්රකාශ ගන්න බැරි බව පොලිසිය අධිකරණයට කියයි
කොම්පඤ්ඤවීදියේ අල්ටෙයාර් තට්ටු නිවාස සංකීර්ණයේ 67 වැනි මහලෙන් වැටුණු සිසුවාගේ සහ සිසුවියගේ මරණය සැකසහිත බව එම ව්යසනයට මුහුණ දුන් සිසුවාගේ පියා ප්රකාශ කරයි.
එබැවින් ඔවුන්ගේ මරණයට සැකසහිත බවට පුද්ගලික පැමිණිල්ලක් ගොනු කිරීමට අවසර ලබා දෙන ලෙස නීතිඥවරයෙක් මාර්ගයෙන් ඊයේ(08) කොටුව මහේස්ත්රාත් අධිකරණයෙන් ඉල්ලීමක් කළ නමුත් කොටුව මහේස්ත්රාත් කෝසල සේනාධීර එම පාර්ශවයට දැන්වූයේ මරණය සැක සහිත නම් ඒ පිළිබඳ පැමිණිල්ලක් පොලිසියට ඉදිරිපත් කරන ලෙසය.
එහිදී කොටුව මහේස්ත්රාත් කෝසල සේනාධීර කියා සිටියේ එම සිසුන් දෙදෙනාගේ මරණය සැකසහිත බවට පුද්ගලික පැමිණිල්ලක් ගොනු කිරීමට ඉඩ ලබාදිය නොහැකි බවත් මරණයක් සැකසහිත බවට චෝදනා ගොනුකළ යුත්තේ පොලිසිය බවත්ය.
දැනටමත් කොම්පඤ්ඤවීදිය පොලිසිය බී වාර්තාවක් මගින් කරුණු වාර්තා කර ඇති බැවින් එහි ගොනු අංකය ලබාගෙන අදාළ පැමිණිල්ල පොලිසියට සිදුකරන ලෙසද මහේස්ත්රාත් කෝසල සේනාධීර පැවැසුවේය.
කොම්පඤ්ඤවීදිය පොලිසිය පසුගියදා බී වාර්තාවක් මගින් කොටුව මහේස්ත්රාත් අධිකරණයට කරුණු වාර්තා කළ අතර එහිදී 67 වැනි මහලෙන් වැටුණු සිසුවාගේ සහ සිසුවියගේ ජංගම දුරකතනවල ඇතුළත් කර තිබූ සිම් කාඩ්පත්වලට අදාළ දුරකතන ඇමැතුම් දත්ත වාර්තා කොම්පඤ්ඤවීදිය පොලිසියට ලබා දෙන ලෙස කොටුව මහේස්ත්රාත්වරයා අදාළ දුරකතන සේවා සපයන සමාගම්වලට නියෝගයක්ද නිකුත් කළේය.
මියගිය සිසුවා සහ සිසුවිය අල්ටෙයාර් තට්ටු නිවාස සංකීර්ණයේ සිටි ඔවුන්ගේ මිත්රයකු මුණ ගැසීමට ගොස් ඇති බවත් එම මිත්රයා පාකිස්තාන ජාතිකයකු බවත් එම අවස්ථාවේදී කොම්පඤ්ඤවීදිය පොලිසිය කීවේය.
එම පකිස්තාන ජාතික සිසුවාගේ පියා පාකිස්තාන මහ කොමසාරිස් කාර්යාලයේ තානාපති වරප්රසාද ඇති ඉහළ නිලධාරියෙකුගේ පුතකු වූ බැවින් එම සිසුවාගෙන් ප්රකාශයක් ලබා ගැනීමට අපොහොසත් වූ බවද එහිදී කොම්පඤ්ඤවීදිය පොලිසිය පැවැසුවේය. ( ලංකාදීප)
