ලබන ජූනි මස සිට දෙසැම්බර් දක්වා බොරතෙල් මිලදී ගැනීමට ටෙන්ඩර ක්රියාවලියකට අනුව සමාගමකට කැබිනට් අනුමැතිය ලබා දී තිබියදී ටෙන්ඩර ක්රියාවලියට පිටින් පසුගිය සඳුදා පැවති අමාත්ය මණ්ඩල රැස්වීමේදී අනුමත කර ගත් ගනුදෙනුව කුමක්දැයි රටට හෙළි කළ යුතු බව විපක්ෂ නායක සජිත් ප්රේමදාස අද පාර්ලිමේන්තුවේදී ප්රකාශ කළේය.
මෙම ටෙන්ඩරවලට පිටින් සිදුවන බොරතෙල් ගනුදෙනුව එක්සත් අරාබි එමීර් රාජ්ය සමාගමක් වුවද ඊට අදාළ ගනුදෙනුවෙන් සියයට 50ක් රුපියල්වලින් වෙනත් අක්වෙරළ සමාගමක් වෙත යැවීමට එයින් යෝජනා කර ඇති අතර මේ සමාගම කුමක්ද යන්න සහ එම ගනුදෙනුවේ විනිවිද භාවය විපක්ෂ නායකවරයා ප්රශ්න කළේය.
ඔහු ට අනුව පසුගිය සතියේ කැබිනට් මණ්ඩල රැස්වීමේදී බොරතෙල් ගෙන්වීම සඳහා ටෙන්ඩර් පටිපාටියට අනුව බොරතෙල් බැරල් මිලියන 4.2ක් ගෙන්වීම කොරල් එනර්ජි නම් එක්සත් අරාබි එමීර් රාජ්ය යේ සමාගමට ටෙන්ඩර ප්රදානයට අනුමැතිය හිමිව තිබේ.
එසේ තිබියදී මෙම සතියේ කැබිනට් මණ්ඩල රැස්වීමට අමාත්ය ගාමිණි ලොකුගේ තවත් යෝජනාවක් ඉදිරිපත් කර ඇති අතර එයින් ටෙන්ඩර් ක්රියාවලියෙන් පිට අත්හදා බැලීමේ පදනම යටතේ තවත් අරාබි සමාගමකටම බොරතෙල් බැරල් ලක්ෂ 7ක් ගෙන්වීම සඳහා අනුමැතිය අපේකෂා කර ඇත.
මෙම යෝජනාවට අනුව එම මිලදී ගැනීම් සඳහා ගෙවීම් සියයට 50ක් රුපියල්වලින්ද ඉතිරි සියයට 50 ඩොලර්වලින්ද ගෙවීමට හැකි වන අතර රුපියල් ගෙවීම් වහාම ගෙවිය යුතු බවටත් එම මුදල් බැර කළ යුතු වන්නේ වෙනත් අක්වෙරල සමාගමකට බවත් සඳහන්ව ඇත. එමෙන්ම ඉතිරි ඩොලර් දින 200ක් තුළ ගෙව්ය යුතු වේ. විපක්ෂනායකවරයා පාර්ලිමේන්තුවේදී ප්රශ්න කර සිටියේ කිසිදු විනිවිද භාවයක් නොමැති මෙම ගනුදෙනු යොජනාව අනුව මේ රුපියල් යැවෙන අක්වෙරල සමාගම කුමක්දැයි හෙළි කරන ලෙසය.
“මේ වගේ ගනුදෙනු ක්රියාක්මක වෙන්නේ රටේ අහිංසක ජනතාව පෝලිම් වල ඉන්න වෙලාවක. මිනිස්සු පීඩනයක ඉන්න වෙලාවක. රටේ ජනතාවට කන්න නැතිව ළමයින්ට විභාගය ලියන්න කඩදාසි කොලයක් ගන්න බැරි වෙලාවක. මේ පිළිබඳව රටට හෙළි කළ යුතුයි .“ යයි සජිත් ප්රේමදාස මහතා එහිදී ප්රකාශ කළේය.
