සුසන්ත අමරබන්දු –
සුනාමියෙන් අවුරුදු 16කට පසු හමු වූ බව කී දරුවාගේ කතාව මේ වනවිට ඇත්තේ අතිශය මානුෂික වූ සංවෙදී තැනකය. සියලු තොරතුරු මෙසේ පෙළ ගැසෙන්නට පටන් ගත්තේ අද (01) සමන්තුරේ පොලිසියේ මූලිකත්වයෙන් මේ පිළිබඳ පොලිස් විමර්ශන කටයුතු ආරම්භ වීමත් සමගය.
දරුවා සමග අම්මලා දෙන්නාම පොලිසියට පැමිණ සිටියහ.
මේ අම්මලා දෙන්නාම හුදකලා වූවන්ය. දෙදෙනාම මුස්ලිම් ජාතික කාන්තාවන්ය. ඔවුන් දෙදෙනාගේම ස්වාමි පුරුෂයන් ඔවුන් හැර ගොස්ය. මේ අම්මලා දෙන්නාම සාත්තු සේවිකාවන්ය. එක් අම්මා කෙනෙක් කල්මුණේ අශ්රොෆ් රෝහලේය. අනෙක් අම්මා අම්පාර රෝහලේය. දෙන්නාම පොලිසියට ආවේ තම පුතා ගේ අයිතිය වෙනුවෙන්ය.
පුතා දැනට 19 වියැති තරුණයෙකි. නම දැන් ඔහුව හදා ගන්නා අම්මාට ඔහු මොහොමදු මොහොමඩ් ෂියාම් අමිර් ය. සුනාමියෙන් පසු දරුවා හමු වූ බව කියන අම්මාට ඔහු අක්රම් රිස්කාන්ය.
කතාව ආරම්භ වන්නේ කල්මුනේ අශ්රොෆ් අනුස්මරණ රෝහලේ සාත්තු සේවිකාවක් වූ අංක 43ඒ ෆයිසාල් පාර මලයිකාඩුහි පදිංචි, අබුසාලි සිප්පි කමාලියා නැමැති කාන්තාවක් පසුගිය 28 දා මාධ්ය අමතා ප්රකාශක් කරමින් සුනාමි ව්යසනයෙන් අතුරුදහන් වූ තම පුතා අවුරුදු 16කට පසු යළි හමුවූ බව ප්රකාශයට පත් කිරීමත් සමගය.
ඒ සමග රටම මේ සිද්ධිය ගැන කතා කරන්නට වූයේය. තමන් යාචකයෙක් සේ වෙස් වලාගෙන, සිංහල කාන්තාවක සේ වෙස් වලාගෙන, රැකියා ඒජන්ත වරියක් සේ වෙස් වලාගෙන දරුවා සොයා පැමිණි ආකාරය ඇය රටට කීවාය. දරුවා සමග අදහස් හුවමාරු කරගත් අයුරු කීවාය. ඇය ටක්කයටම මේ දරුවා තමන්ගේ බව විශ්වාස කළාය.
එහෙත් මේ වනතුරු ළමයා හදාවඩාගත් බව කියන මව වන අංක 732/3 බුද්ධංගල පාර අම්පාර පදිංචි, අම්පාර රෝහල සාත්තු සේවිකාවක් ලෙස කටයුතු කරනු ලබන මොහෙමඩ් ජුනයින් මිරුල් නැමැති කාන්තාව පොලිසියට පැමිණ අතුරුදහන් වූ දරුවා ලෙස පෙන්වා දෙන දරුවා තමාගේ බවත්, දරුවා උපදින තුරු පවත්වා ගත් සායනික පත්රිකා, උප්පැන්න සහතිකය, අධ්යාපන සහතික සහ සෞඛ්ය තොරතුරු ඇතුළත් සායන සටහන් ඉදිරිපත් කළාය.
පොලිසියට වාර්තා වුණු තොරතුරු
සුනාමියෙන් පසු සිය දරුවා අතුරුදන් වූ බව කී අබුසාලි සිප්පි කමාලියා කීවේ දරුවා කල්මුණේ රෝහලේ සිටින බව සිය නැගනියගේ ස්වාමිපුරුෂයා කී බවය. ඒ සුනාමි ව්යසනයෙන් දවස් 03කට පසුවය. ඇය රෝහලට යනවිට දරුවා අතුරුදන්ව සිටි ඇය කීවාය. තමා වසර දහසයක් තිස්සේ දැඩි වෙහෙසක් දරා දරුවා සොයමින් යද්දී අම්පාර ප්රාදේශීය ලේකම් කාර්යාලයේ අයෙක් දරුවා අම්පාර ප්රදේශයේ ඉන්නා බවට තොරතුරක් දුන් අයුරුය.
“ මම උත්සාහය අත්හැරියේ නැහැ. පුතාගේ පින්තූර රැගෙන හැමෝටම පෙන්වනවා. සමහරු එක එක හෝඩුවාවන් දෙනවා. මම ඔවුන් කියන කියන තැන්වලට යනවා. අන්තිම තමයි ප්රාදේශීය ලේකම් කාර්යාලයෙ කෙනා මගෙ පුතා අම්පාරෙ ඉන්නවා කියලා කීවෙ.“
ඒ තොරතුර අනුව රැකියා ලබා දෙන නියොජිතවරියක සේ අදාළ නිවසට වෙස් වළාගෙන ගොස් තම දරුවා දැක ඔහු හඳුනා ගත් බව සිප්පි කමාලියා කීවාය. එයින් පසුව දුරකථනය හරහා අදහස් හුවමාරු කරගත් බව ද කීවාය.
දරුවා හදාගත් බව කියන මොහෙමඩ් ජුනයින් මිරුල් අම්මා කියන්නේ දරුවා ගැන කියන කතාව මෙසේය. ඇය කියන්නේ මේ ඇයගේ කුසින් උපන් ඇයගේ දරුවා බවය. මේ දරුවා සම්බන්ධ සියලු තොරතුරු ඉදිරිපත් කරන ඇය දරුවා මුලින්ම අවුරුද්දක් අම්පාර පාසල් ගිය බව කීවාය. අනතුරුව ඇයට සුනාමි ව්යසනයෙන්ම හුදකලා වූ මුස්ලිම් ජාතිකයෙකුගෙන් විවාහ යෝජනාවක් ලැබුණු බවත්, ඔහු හා ජීවත් වෙමින් අවුරුදු 4ක් හම්බන්තොට ජීවත් වුවත් දරුවාගේ අනාගතය සලකා යළි අම්පාරට පැමිණ ඔහුව පාසල් යවා අධ්යාපන කටයුතු වලට මුල් තැන ලබා දී ජීවත් වූ බවත් ඇය කීවාය. දරුවා ඉගෙන ගෙන තිබුණේ අම්පාර සද්ධාතිස්ස විද්යාලයේය.
දැන් මේ තරුණයා පාසල් අධ්යාපනය හමාර කර කොලොන්නාව වැල්ලම්පිටිය ප්රදේශයේ රැකියාවක නිරත වන්නේය. මේ අතර සුනාමියෙන් දරුවා නැති වූ බව කී අබුසාලි සිප්පි කමාලියා අම්මා දරුවා රැකියාවකට යොමු කිරීම සඳහා පසුගිය 27 දා ඔහුව කොළඹ සිට කල්මුණේට ගෙන්වාගෙන තිබිනි. තරුණයා ගෙදරට එන විට ඇය තම පුතා ලැබුණු බව කියන්නට මාධ්ය ආවරණයක් නිවසේ සූදානම් කර තිබුණාය. තරුණයා ගෙදර නැවතී ඔහුගේ අලුත් අම්මා ඊට පසු දා (28) සූදානම් කර තිබූ නින්දවූර් අට්ටපලන්හි ආයතනයේ සම්මුඛ පරීක්ෂණයට ද පෙනී සිට යලි තමන් හැදී වැඩුණු නිවසට ගියේය.
තරුණයාට අලුතින් අයිතිය කියන අම්මා ගැන මතක නැත . ඔහුට මතක ඔහු හදාගත් අම්මා පමණි. ඒ අම්මා ගැන මේ තරුණයාගේ අයිතිය තහවුරු කළ හැකි ලිපි ලේඛනත් තිබේ. ඒ නිසා දෙපාශවයේම එකඟතාවය මත තරුණයා අම්පාරේ බුද්ධංගල අම්මා එක්ක පිටව ගියේය.
දැන් දරුවා කාගෙ දැයි නිශඡය කිරීම විද්යාත්මක සාධක වෙත පවරා තිබේ. දෙපාර්ශවයේ එකඟතාවය මත අධිකරණය හරහා කටයුතු කර ඩි එන්.ඒ. පරීක්ෂාවකින් ළමයා කාගේ දැයි විසඳා ගැනීමට නියමිතය. ඒ සඳහා ලබන 05 වැනිදා දෙපාර්ශවයම අධිකරණයට කැඳවීමට නියමිතය.
නැගෙනහිර පළාත භාර ජ්යෙෂ්ඨ නියෝජ්ය පොලිස්පති නිලන්ත ජයවර්ධනගේ උපදෙස් මත අම්පාර නියෝජ්ය පොලිස්පති ආයාෂ කරුණාරත්නගේ සහ අම්පාර ජ්යෙෂ්ඨ පොලිස් අධිකාරි ජයන්ත රත්නායකගේ මඟ පෙන්වීමෙන් සහකාර පොලිස් අධිකාරී ටී එම් ජයරත්න ගේ අධික්ෂණයෙන් සමන්තුරේ පොලිසියේ ස්ථානාධිපති ප්රධාන පොලිස් පරීක්ෂක සුරවීර ජයලත් , විවිධ පැමිණිලි අංශයේ ස්ථානාධිපති පො.ප. අමිර් ඇතුළු නිලධාරිහු සිද්ධිය පිළිබඳ පරීක්ෂණ කටයුතු පවත්වමින් සිටිති.
https://wp.me/pc1Our-2Wn
