මීට අවුරුදු සීයකට පෙර සර් විලියම් හෙන්ඩ්රි මැනිංගේ ආණ්ඩු කාලයෙ ( 1917-1920) දී කොළඹ නගරයේ වරායට තරමක් දුරින් ආහාර ගබඩාවක් හැදුවේය. මේ ගබඩාවේ ප්රධාන පරමාර්ථය වුනේ රටට අවශ්ය සීනි නැව් මගින් ගෙන්වා ගබඩා කර තැබීමය. ආණ්ඩුවේ සීනි ගබඩාව මැනිං ගබඩාව විය.
මැනිං ගබඩාව පිහිටවා තිබුණේ හොඳම නැකතය. කොළඹ නගරය දියුණු වුනේය. පසෙකින් කොළඹ කොටුව දුම්රිය ස්ථානය වැඩි දියුණු විය. මහා විදී හැදී සංවර්ධනය වූයේය. අහස උසට ගොඩනැගිලි හැදුනේය. ඒත් මැනිංගේ සීනි ගබඩාව වෙනස් වුනේ නැත. එම පුරාණ ගොඩනැගිලි පරිශ්රය තුළ සීනි ගබඩාව ලංකාවේ ප්රධානම තොග වෙළෙඳ මධ්යස්ථාය බවට පරිවර්තනය විය.
ලංකාවේ හතරදිග්භාගයෙන් එන එළවළු පළතුරු තොග මිල තීරණය කරන තැන මැනිං වෙළෙඳපල විය. සියවසක් ඉක්මවූ ගොඩනැගිල්ලේ වෙළෙන්දන් සතු කඩ කාමර 1200 ඉක්මවා ගියේය. ඒ කතාව අද සිට එක් වන්නේ ඉතිහාසයටය. අද (20) තව ස්වල්ප මොහොතකින් සියක් වසරක් තිස්සේ කොළඹ නගර මධ්යයේ පැවති මේ ඓතිහාසික මැනිං වෙළෙඳපල නිශ්චිත ලෙසම සිය කාර්යය නිමා කරන්නේය. අද සිට මේ භූමිය අතීත සිහිවටනයකි.
කොළඹ අග නගරය සැලසුම් සහගතව සංවර්ධනය වත්ම කොළඹ කේන්ද්රීය හදබිමක පිහිටි පුරාණ ගොඩනැගිලි සංකීරණයක් සහිත මේ තොග වෙළෙඳ පල නගර සැලසුම තුළ ස්ථාන ගත කිරීමේ ගැටලුව පැන නැගුනේය. ඊට පිළියම් ලෙස කොළඹ නගරසීමා මායිමේ අධිවේගී මාර්ග ප්රවේශය අසල මැනිං වෙළෙඳපල විතැන් වුනේය.
පෑලියගොඩට ගිය නව මැනිං වෙළෙඳ සංකීර්ණය (Manin Market) අද (20) පෙ.ව. 10.00 ට නාගරික සංවර්ධන හා නිවාස අමාත්ය අග්රාමාත්ය මහින්ද රාජපක්ගේ ප්රධානත්වයෙන් විවෘත වන්නේය.
පෑලියගොඩ නව මැනිං වෙළෙඳපල
නව මැනිං වෙළෙඳපළ අක්කර 13.5 ක් පුරා විහිදෙයි . වෙළඳසැල් 1,192 කින් යුතුය. මහල් හතරකින් සමන්විතය. වෙළද සංකීර්ණයේ 03 වෙනි මහල දක්වා පිහිටි සෑම වෙළඳ සැලකටම එළවළු ප්රවාහන ලොරි ගෙන ඒමට හැකිවන සේ මෙම නව වෙළඳ සංකීර්ණය සකසා තිබේ. වාහන විශාල ප්රමාණයක් නැවැත්වීමේ පහසුකම් සහිත රථගාලක් සහිතය. එහි රථවාහන 600 ක් පමණ නතර කිරීමට පහසුකම් සලසා දී තිබේ. සේවකයින් සඳහා විවේකාගාර, වෛද්ය පහසුකම් සැපයීමේ මධ්යස්ථාන, බැංකු, ආපනශාලා, අධිශීත ගබඩා (Cool Room), හොටෙල් ඇතුළු පහසුකම් රැසකින් නව මැනිං වෙළඳ සංකීර්ණය සමන්විතය. ඉදිකිරීමේ වියදම රුපියල් බිලියන 6.9 කි.
වෙළඳ සංකීර්ණ ව්යාපෘතියේ සියළුම ඉදිකිරීම් කටයුතු සහ වාස්තු විද්යාත්මක නිර්මාණයන් සිදු කළේ ඉංජිනේරු කාර්යයන් පිළිබඳ මධ්යම උපදේශන කාර්යංශ (CCB) ආයතනයේ ඉංජිනේරුවරුන් හා වාස්තු විද්යාඥයින් විසිනි.
අග්රාමාත්ය මහින්ද රාජපක්ෂගේ උපදෙස් පරිදි නාගරික සංවර්ධන, වෙරළ සංරක්ෂණ, අපද්රව්ය බැහැරලීම හා ප්රජා පවිත්රතා කටයුතු රාජ්ය අමාත්ය ආචාර්ය නාලක ගොඩහේවා, නාගරික සංවර්ධන හා නිවාස අමාත්යාංශයේ ලේකම් සිරිනිමල් පෙරේරා, නාගරික සංවර්ධන අධිකාරියේ සභාපති, වරලත් වාස්තු විද්යාඥ හර්ෂාන් ද සිල්වා, නාගරික සංවර්ධන අධිකාරියේ අධ්යක්ෂ ජනරාල්, වරලත් නගර නිර්මාණ ශිල්පි ප්රසාද් රණවීර ගේ අධික්ෂණය යටතේ මෙම ව්යාපෘතියේ ඉදිකිරීම් කටයුතු පසුගිය දිනවල කඩිනමින් සිදුකෙරිණ.
ඉදිකිරීම් සැලසුම
සැලසුම් සහගත නාගරික සංවර්ධනයක් සඳහා කොළඹ මත්ස්ය තොග වෙළඳ සංකීර්ණය පෑලියගොඩ ස්ථාපනය කිරීමට 2011 වසරේ දී සිදුවන්නේත් මේ නගර සැලසුමේ අංගයක් ලෙසය. එම කටයුත්ත සිදු වන්නේ එවකට ආරක්ෂක හා නාගරික සංවර්ධන අමාත්යාංශයේ ලේකම්වරයාව සිට වත්මන් ජනාධිපති ගෝඨාභය රාජපක්ෂගේ උපදෙස් පරිදිය. කොළඹ එළවළු වෙළඳ සංකීර්ණය පෑලියගොඩට ගෙන යාමට මූලික සැලසුම් සකස් වන්නේ ද එම අවස්ථාවේ දීය.
එම මූලික සැලසුම් අනුව මැනිං වෙළඳ සංකීර්ණයේ ඉදිකිරීම් කටයුතු 2013 වර්ෂයේ දී ආරම්භ කෙරිණි. මේ සැලසුම අනුව මාළු, එළවළු තොග වෙළෙඳාම පමණක් නොව පිටකොටුව ප්රදේශයේ පවත්වාගෙන යන වියළි ආහාර තොග බඩු සහ ගොඩනැගිලි ද්රව්ය තොග බඩු ද ඉදිරියේ දී පෑලියගොඩ ගෙන යාමට නියමිතයි.
පෑලියගොඩ හුවමාරුව සමඟ දිවයිනේ සෑම ප්රදේශයකටම ගමන් කරන අධිවේගී මාර්ග සම්බන්ධ වන නිසා ඉතා පහසුවෙන් මෙම තොග බඩු කොළඹට ගෙනඒම සහ කොළඹින් පිට ප්රදේශවලට ප්රවාහනය කිරීම සඳහා ද අවස්ථාව හිමිවේ.
ගුවන් තොටුපළ අධිවේගී මාර්ගය, වරාය අධිවේගී මාර්ගය, දක්ෂිණ අධිවේගී මාර්ගය, මධ්යම අධිවේගී මාර්ගය, උතුරු අධිවේගී මාර්ගය ඇතුළු අධිවේගී මාර්ග සමඟ පෑලියගොඩ හුවමාරුව සම්බන්ධ වන නිසා තොග බඩු ප්රවාහනය පහසුවෙන් රට පුරා සිදු කළ හැකි අයුරින් අනාගත සැලසුම් සකස් වී ඇත.
ඉතිහාසය වෙනස් වී තිබේ. අද ඇරඹෙන නව ප්රවේශය අලුත් කතාවක් ආරම්භ කර ඇත. ඉතිහාසය ගලාගෙන යන්නේ එසේය.
