සැලෝන් දෙකක් පවත්වාගෙන යමින් කෝටිපතියෙක් වී සිය පෙම්වතියගේ උපන්දිනයට රුපියල් කෝටි දෙකක් පමණ වටිනා මෝටර් රථයක් පවා තෑගි දීමට තරම් වත්කමක් ඇතිව සිටි ව්යාපාරිකයෙක් බව කියන පුද්ගලයෙක් අනුරාධපුරයේ ගල්කඩවල ගලේපොස්ගම දී ඝාතනයට ලක්වන්නේ ඉකුත් 10 වෙනිදාය.
ඒ ඔහුගේ තවත් පෙම්වතියක් යැයි කියන 21 හැවිරිදි තරුණියක් බලහත්කාරයෙන් රැගෙනයන්නට පැමිණි අවස්ථාවේ දී තරුණියගේ සහෝදරයා විසින් එල්ලකල කැති පහරකිනි.
කොළඹ 02, නවම් මාවකේ සහ නාවින්නේ Salon hisa care සහ Groom Scord නමින් සුපිරි කොණ්ඩා සැකසුම් ආයතනයේ හිමිකරු බව කියන මේ තැනැත්තා සමාජය හමුවේ පෙන්වූයේ තමා කෝටිපතියෙක් වූයේ එම ව්යාපාරයෙන් බවය. එහෙත් ඒ වත්කම් පිළිබඳ නොවිසඳුණු ගැටලු ඇති බව පොලිසිය දැන් කියන්නේය.
පැතුම් මල්ලවආරච්චි ගැන ඔහු හැදී වැඩුණු පරිසරයෙන් මෙන්ම පොලීස් තොරතුරුවලින් හෙළි වන්නේ වෙනස් කතාවකි. කුඩා කල ඔහු ජීවත් වී ඇත්තේ ගල්කඩවල ඔහු කැති ප්රහාරයට ලක්වූ නිවසේ ය. දෙමාපියන්ගේ හව්හරණක් නොමැතිව ජීවත්වූ ඔහු ගැටවර අවධියේ දී සුළු සොරකම් සහ සමාජ විරෝධී ක්රියා සම්බන්ධව පොලීසියට හසුවී ඇති ඉතිහාසයක් සහිත තැනැත්තෙකි. හිටි හැටියේම වසර කිහිපයකට පෙර ගමෙන් අතුරුදන් වන ඔහු නැවත මතුවන්නේ කෙටි කළකින් සාර්ථක ව්යාපාරයක් ගොඩ නන්වා ගත් තරුණ කෝටිපති ව්යාපාරිකයෙක් ලෙසිණි. ඔහු තමන්ගේ ගමන ගැන විවිධ අවස්ථාවල දී සමාජ මාධ්යයට අනුවේදනීය කතා කීවේය. තමන් ජීවිතය ගොඩනගා ගැනීමට කළ කැප කිරීම ගැන කතා කළේය.
“ජිවිතෙ මාරම නපුරු කාලයක් තිබ්බා… මම එද්දි මිනුස්සු මාව පිලුකුල් කළා. දුක් විඳ විඳ හැමතැනම ඇවිදපු කාලයක් තිබ්බ. මුලු ජිවිතේම එපා වෙච්චි කාලයක් තිබ්බ . මට වටිනාකමක් දුන්නේ මගෙ වෘත්තිය. අම්මා තාත්ත නැතුව අධ්යාපනයක් නැතුව කව්රුත් ගනන් ගන්නෙ නැතුව හිටිය මාව ගොඩ දැම්මෙ මගෙ රස්සාව. “ ඔහු සිය ෆේස් බුක් ගිනුමේ එසේ සටහන් කර තිබිණි.
ඔහු කියන්නේ වසය අවුරුදු 14 දී කොණ්ඩය කපන කතුර ඔහුගේ අතේ දැවටුණු බවය. ඒ රැකියාව තමන්ගේ පියාගෙන් තමන්ට ලැබුණු බවය.
“ඉස්සෙල්ලාම කොන්ඩෙ කපන්න ගත්තෙ රුපියල් 20ට. ඔව් මට මේ ජොබ් එක එපා වෙච්චි කාලයක් තිබුනා . මම එක එක වැඩ කළා. එත් මට හිතට වැදුණු ජොබ මෙක. එක නිසා මම මේක ගොඩක් ඉගෙන ගත්තා. තාමත් ඉගෙන ගන්නවා . මම විස්වාස කරන්නේ තමන් දන්න දෙ හරියට ඉගෙන ගෙන ආදරෙන් ආසවෙන් ඒ දේ පටන් ගත්තොත් ඕනෙම වෘත්තීයක් කරන කෙනෙකුට ඉක්මනින් ගොඩ එන්න පුළුවන්.
“මොකද මම අවුරුදු 20 මේක දැනගෙන හිටියට මේකෙන් ගොඩ එන්න ඔනෙ කියලා හිතුවෙ 2015 දි. ඉතින් මොන වෘත්තීයක් කරන කෙනෙකුට උනත් ඒ දේට ආසවෙන් හරියට ඉගෙනගෙන ප්ලෑන් කරලාපටන් ගත්තොත් ඉක්මනින් ගොඩ එන්න පුලුවන්. “ මීට මාස කීපයකට පෙර ඔහු ෆේස් බුක් සටහන තබන්නේ එසේය. ඒ වනවිට ඔහු කෝටි දෙකක වාහනයක් තමන්ගේ පෙම්වතියට මිලදී ගෙන තෑගි කර ඉවරය.
එහෙත් ඔහු කළ වෙනත් කළු ව්යාපාර ගැන තොරතුරු ලැබෙන්නේ ඔහු තමන් කුඩා කල හැදී වැඩුණු නිවසේ දී කැති පාර කා මැරී වැටුනු පසුය.
ඔහු තමා හැදී වැඩුණු නිවැසියන්ගේ 21 හැවිරිදි දියණිය සිය පෙම්වතියක් ලෙස ඇසුරුකළ බව කියැවිනි. මේ තැනැත්තා ඉකුත් දිනක ඇය කොළඹට රැගෙන යන්නේ ඇයට රැකියාවක් සොයා දෙන්නට යැයි කියාය. පොලිස් විමර්ශකයන් හෙළි කරගෙන ඇත්තේ ඔහු ඇයට සොයා දුන්නේ කාන්තාවකට අමිහිරි රැකියාවක් බවය. ඇය ඒ ගැන සිය මවටද පැවසුවාය. ඒ නිසාම සිය දියණිය ගැන කිසිදු තොරතුරක් නැතැයි කියා ඇය පොලීසියටද ගොස් තිබුණාය. අවසානයේදී ඇය දින කිහිපයකට පසු එතැනින් බේරී නිවසට ආවාය.
මේ තැනැත්තා ඇගේ සහෝදරයාගේ කැති පහරින් මරුමුවට පත්වන්නේ නැවතත් ඇයව බලහත්කාරයෙන් ඔහුගේ ඒ තිරිසන් රැකියාව සඳහා රැගෙනයාමට පැමිණි අවස්ථාවේදීය.
එදා ඔහු පැමිණ ඇත්තේද තනිවම නොව, කිහිප දෙනෙක්ද සමගිනි. මේ පුද්ගලයා කැති පහරින් ලේ විලක් මැද ඇද වැටෙන විට බියට පත් ඔහුගේ සහචරයන් පළා යන්නේ ඔහුවත් ඔසවාගෙනය.
බරපතල තුවාල සහිතව මෙම පුද්ගලයා අනුරාධපුර රෝහලට ඇතුළත් කර තිබිණි. එහිදී ඔහු මිය ගියේය. කැති පහර එල්ල කළ තරුණියගේ සහෝදරයා මේ වනවිට පොලිස් අත්අඩංගුවේය. කාලය තවත් බොහෝ දේ හෙළි කරනු ඇති බව පමණක් දැනට ලියා තැබීම ප්රමාණවත්ය.
