සුනේත්රා ඇතුගල්පුර-
ජායාරූප ශෂි සුබ්රමනියම්-
- එක් රූ රැජිණයක් දිනකට කිලෝ ග්රෑම් 70වත් 140ත් අතර ප්රමාණයක් ආහාර ගන්නවා… වතුර ලීටර් 80ක් බොනවා…
- කඩවසම් ගවයා, සුන්දර පියයුරු හිමි එළදෙන, යොවුන් එළදෙන, යොවුන් ගවයා, රූ රැජනට අමතරව තෝරනවා…
- ස්විස් ගව රූ රැජන යුරෝපා ගව රූ රැජන තරගයට ඉදිරිපත් කරනවා… ගිය අවුරුද්දේ යුරෝපා රූ රැජන ස්විස්ටර් ලන්තයේ ලේඩි ගගා…
ඔක්තෝබර් මාසය ස්විස් වැසියන්ට, විශේෂයෙන් ග්රාමීය ස්විස් ජනතාවට වර්ෂයේ වැදගත්ම මාසයකි. ඒ ඔක්තෝම්බර් මාසයේදී ගමින් ගමට ,නගරයෙන් නගරයට රූප රැජිණියන් බිහි වන බැවිනි. රූප රැජිණියන්ට අමතරව කඩවසම් කුමරුන්, මෙන්ම සුන්දර පියයුරු වලට හිමිකාරියන්ද ඔක්තෝම්බර් මාසයේදී බිහි වීම විශේෂත්වයකි .
ඔක්තෝම්බර් මුල් සතියේ සිට සති කිහිපයක් යනතුරා බොහෝ ස්විස් මාධ්යවල මුල් පිටුව සැරසෙන්නේ මෙම රූප රැජිනියන්ගේ ඡායාරූප වලින් හා ඔවුන්ගෙ පවුලේ සාමාජිකයන්ගෙනි. මෙම පවුලේ සාමාජිකයින් සිය ජයග්රහණ පිළිබඳව පුවත්පත් වලට හා රූපවාහිනී වලට සම්මුඛ සාකච්ඡා ලබා දෙන්නේ මහත් ආඩම්බරයකිනි. එම සම්මුඛ සාකච්ඡාවලින් බොහෝවිට තරඟයේ දී අසන්නට නොලැබුණු රසවත් හා බොහෝ පිරිස් අසන්නට කැමති තොරතුරුද හෙළිවේ. ජයග්රහයකයින් ගේ දෛනික ආහාර ප්රමාණය ,හා ජල ප්රමාණය ඒ අතර යම් විශේෂත්වයක් ගනී.
සාමාන්යයෙන් එක් රූ රැජිණයක් දිනකට කිලෝ ග්රෑම් හැත්තෑ වත් 140 ත් අතර ප්රමාණයක් ආහාරයට ගන්නා අතර දිනකට ලීටර් 80ක ජල ප්රමාණයක් බීමට ගනියි .
මාස හතරක පමණ කාලයක් ඇල්ප්ස් කදු වැටියේ රසවත් ආහාර හා පිරිසුදු ජලය මෙන්ම නැවුම් වාතය භුක්ති විඳී මේ රූප රැජිනියන් හා කඩවසම් කුමරුන් සිය සුන්දරත්වය විදහා පාන අලංකාරතම උත්සවයක් ලෙස ගව ප්රදර්ශනය හැඳින්විය හැකිය. මෙමඋත්සවය හැඳින්වෙන්නේ (Viehschau) ෆීආෂවූ ලෙසය.
ගව ප්රදර්ශනයට සූදානම් වීම
විශාල පළාත් වල ඒ ඒ නගර සභා ආශ්රිතව ද, කුඩා පළාත්වල පළාත් වශයෙන් ද මෙම ගව ප්රදර්ශනය සංවිධානය කෙරේ. පළාතේ පවතින විශාල පිට්ටනියකට තරඟකරුවන් රැස් කෙරෙන අතර දවස පුරා විවිධ අංශ යටතේ තරග පැවැත්වේ.
ගව ප්රදර්ශනයේ ඇති සුවිශේෂීම වැදගත්කම වන්නේ ඊට සහභාගී වන තරඟ කරුවන්ට වඩා ඔවුන්ගේ හිමිකරුවන්ට එම උත්සවය වැදගත් වීමය. එබැවින් තරගය පැවැත්වෙන දිනය කිරි ගොවීන්ට විශේෂිත වන්නාසේම ආතතියක් සහිත දිනයක් බව නොරහසකි. පාන්දරම අවදි වන කිරි ගොවීන්ගේ දවසේ ප්රධානතම කාර්යය වන්නේ එදින පෙරවරුවේ පැවැත්වෙන ගව තරගය සඳහා සිය තරගකරුවන් ප්රවාහනය කිරීමය . එසේත් නැත්නම් පා ගමනින් රැගෙන යාමය.
ග්ලාරුස් පළාතේ මෙම තරගය පැවැත්වෙන්නේ ඓතිහාසික ලන්ස්ගෙමයින්ඩ් භූමියේදීය.(ලන්ස්ගෙමයින්ඩ් යන සුපිරි ප්රජාතන්ත්රවාදයේ සංකේතවත් කරමින් අත් ඔසවා ඡන්දය ප්රකාශ කිරීමය. ඒ සඳහා ග්ලාරුස් ජනතාව මෙම භූමියට පැමිණෙති ). ගව ප්රදර්ශනය පැවැත්වෙන දිනයේ දී මෙම භූමිය ලන්ස්ගෙමයින්ඩය පැවැත්වෙන දිනට වඩා කාර්යබහුලය. එක් පසෙකින් පන්සියයකට ආසන්න ගවයින් හා එළදෙනුන්ය. අනෙක් පසින් ඔවුන් තරඟ සඳහා ඉදිරිපත් කරන විශේෂිත ස්ථානයකි. තවත් පසෙකින් ඔබ මොබ ගමන් කරන නරඹන්නන්ය. මේ සියල්ල කැටි කොට ගත් විට ගව ප්රදර්ශන භූමිය එක්තරා ආකාරයකට ඉරිදා පොලක සිරි ගනී .
තරග රටාව
කාණ්ඩ ගණනාවක් යටතේ පැවැත්වෙන තරගවලට විටින් විට තරඟකරුවන් ඒ සඳහා විශේෂයෙන් සැදූ ස්ථානයකට ඔවුන්ගේ අයිතිකරුවන් විසින් රැගෙන එනු ලැබේ. මෙය හුදෙක් තරගයක් පමණක් නොව සාම්ප්රදායික උත්සවයක් බැවින් ඇල්ප්ස් ගොවීන් හා ගෙවිලියන් බොහෝ විට පැමිණෙන්නේ සම්ප්රදායික ඇඳුම් පැළඳුම්වලින් සැරසීය.
ගවයින් හා එළදෙනුන්ගේ සුන්දරත්වය වඩාත් පැහැදිලිව දැක ගැනීම සඳහා, ඊටම සුදුසුකම් හා පුහුණුවීම් පිරිසක් ගව ප්රදර්ශනය විනිසුරුවෝ ලෙස කටයුතු කරති. තරගයේ අපක්ෂපාතී භාවය රැක ගැනීම සඳහා බොහෝවිට විනිසුරුවන් පැමිණෙන්නේ පිට පළාත්වලිනි. එක පෙළකට තබනලද ගවයින් හො එළදෙනුන් දෙස මෙම නිරීක්ෂකයෝ බලා සිටින්නේ සැබෑ රූප රැජිනි තරගයකදී මෙන්ය.
සතුන්ගේ ප්රමාණය ,හැඩරුව ,ජව සම්පන්න බව ,පියයුරු වල ප්රමාණය හා අලංකාරත්වය ,කුරවල අලංකාරත්වය ඔවුන්ගේ තියුණු ඇසට යොමු වන ප්රධාන අංගයන් වේ. තරඟයේ ප්රධානතම අංගය වන්නේ රූ රැජින තේරීමයි . රූ රැජින එදින කාගෙත් කතාබහට ලක්වන මාතෘකාවක් වන අතර ජනමාධ්ය වල ප්රධාන ඉලක්කය බවට පත්වේ. ඊට අමතරව කඩවසම් ගවයා, සුන්දර පියයුරු හිමි එළදෙන, යොවුන් එළදෙන, යොවුන් ගවයා, තෝරා ගැනේ .
ජයග්රහයකයින් සඳහා හිමි වන ප්රධානම තාග්ය වන්නේ පිත්තල වලින් නිම කළ විශාල ඝාණ්ටාරයකි. තරඟයේ නම හා තරඟය පැවැත්වූ ස්ථානය, ලබාගත් ස්ථානය එම ගන්ඨාරයේ කොටා තිබේ. මෙම ඝාන්ඨාර බොහෝවිට ඇල්ප්ස් ගොවීන්ගේ ගවගාල් වල එල්ලා තිබෙනු දක්නට ලැබේ. ඒවා ඔවුන්ගේ අමරණීය මතකයන් වන්නාක් මෙන්ම සාඩම්බරත්වයේ සංකේතයක් ද වන්නේය.
සංචාරක ආකර්ෂණ ඉලක්කයක්
ගව ප්රදර්ශනය බොහෝ පළාත්වල විශාල ප්රචාරයක් නොදී පැවැත් වුවත්, ඇතැම් ප්රදේශවල එය ඉතා උත්කර්ෂවත් අන්දමින් සංචාරකයින් ඉලක්ක කොට පැවැත්වීම සුවිශේෂී ලක්ෂණයකි. ස්විට්සර්ලන්තයේ ඇපන්සල්හි ගව ප්රදර්ශනය මේ අතර ප්රධාන තැනක් ගනියි.
ගව ප්රදර්ශනය පැවැත්වෙන ස්ථානය සඳහා ඇල්ප්ස් ගොවීන් සිය ගවයින් සමග පැමිණෙන්නේ පෙරහැරක් ආකාරයෙනි. අලංකාර සම්ප්රදායික ඇඳුමින් සැරසුණු ඔවුහු සිය දරුවන් හා පවුලේ උදවිය සමග මෙම පෙරහැරේ ගමන් කරන්නේ තරමක ආඩම්බරයකිනි. එම දසුන එක්තරා ආකාරයකට ශ්රී ලංකාවේ පෙරහරවල ගමන් ගන්නා නිලමේවරුන් සිහිගන්වයි. මග දෙපස රැඳී සිටින ජනතාව හා සංචාරකයින් ඔවුන්ට ගෙන දෙන්නේ මහත් ශක්තියකි. විටින් විට ස්විස් සාම්ප්රදායික ජන ගී වලින් නරඹන්නන් ආනන්දයට පත්කිරීමට ද ඇතැම් ගොවීහු අමතක නොකරති .
ළමයින්ටත් දුම්පානයට අවසර
මෙම ගව ප්රදර්ශනයේ ඇති තවත් විශේෂත්වයක් වන්නේ එදින පළාතේ ළමුන්ට හා තරුනයින්ට කිසිදු බාධාවකින් තොරව දුම්පානය සඳහා අවසරය ලැබීමය. ස්විස් වැසියන්ගේ සාම්ප්රදායික උත්සව අතර වැදගත් තැනක් උසුලන මෙම ගව ප්රදර්ශනය පළාත් හා ප්රාදේශීය මට්ටමින් පමණක් අවසන් නොවේ. ඉන් අනතුරුව පැවැත් වන්නේ ජාතික මට්ටමේ රූප සුන්දරියන් තේරීමේ තරගයයි .ඊට පළාත් මට්ටමින් ජයග්රහණය කළ තරගකාරියන්, හා තරගකරුවන් ඉදිරිපත් කෙරේ .
ගවයින්ට යුරෝපයේ හිමි තැන කදිමට කියාපාන මෙම සාම්ප්රදායික උත්සවය ජාතික මට්ටමෙන් පමණක් අවසන් නොවන අතර එහි ඊළඟ අදිරය වන්නේ යුරෝපා රූ රැජින තරගයයි. පසුගිය වසරේ මෙම යුරෝපා රූ රැජින තරගය පැවැත්වූයේ බෙල්ජියමේ දීය . ඊට යුරෝපයේ රටවල් පහළොවක් නියෝජනය කරමින් තරගකරුවන් 190 විවිධ කාණ්ඩ යටතේ ඉදිරිපත් වූ අතර ජර්මනියෙන් ඉදිරිපත් කළ තරගකාරිය එහිදී ජයග්රහණය කළාය . ඇගේ නම ලේඩි ගගාය.
