ඉඳුනිල් කහටපිටිය –
රජයේ නිලධාරීන් ඇතුළු වත්කම් සහ බැරකම් ප්රකාශ කිරීමට නියමිත සියලුම පුද්ගලයින්ගේ වාර්ෂික ප්රකාශ ඉදිරිපත් කිරීමේ අවසන් දිනය අදට (ජූනි 30) යෙදී තිබේ.
අල්ලස් හෝ දූෂණ චෝදනා විමර්ශන කොමිෂන් සභාව (CIABOC) සඳහන් කරන්නේ 2023 අංක 9 දූෂණ විරෝධී පනතේ ප්රතිපාදනවලට අනුව සියලුම අදාළ නිලධාරීන් මධ්යගත ඉලෙක්ට්රොනික පද්ධතිය හරහා පමණක් මෙම ප්රකාශ ඉදිරිපත් කළ යුතු බවය. අද දිනෙන් පසුවත් ප්රකාශ ලබා නොදෙන පුද්ගලයන්ට එරෙහිව දඩ මුදල් අයකිරීම් සහ දැඩි නීතිමය ක්රියාමාර්ග ගැනීමට නියමිතව ඇත.
මේ අතර අන්තර්ජාල පද්ධතියේ පවතින දැඩි තදබදය සහ අවහිරතා හේතුවෙන් මෙම කාලය ජූලි 07 වැනිදා දක්වා සතියකින් දීර්ඝ කර ඇති බවට ඇතැම් මාධ්ය වාර්තා පළ කර තිබුණ ද, අල්ලස් හෝ දූෂණ චෝදනා විමර්ශන කොමිෂන් සභාව විසින් ඒ පිළිබඳව මෙතෙක් කිසිදු නිල ස්ථාවරයක් හෝ නිවේදනයක් නිකුත් කර නොමැත. එම නිසා නිල වශයෙන් වත්කම් ප්රකාශ ලබා දීමේ කාලය අදින් අවසන් වන බව අවධාරණය කෙරේ.
රාජ්ය සේවයේ විනිවිදභාවය තහවුරු කිරීම, දූෂණ වැළැක්වීම සහ රාජ්ය ධනයේ නිසි භාවිතය සහතික කිරීමේ අරමුණින් මෙම වත්කම් බැරකම් ප්රකාශ ලබා ගැනීම සිදු කෙරේ. ජනාධිපතිවරයා, අමාත්යවරුන්, පාර්ලිමේන්තු මන්ත්රීවරුන්, ඉහළ පෙළේ රාජ්ය නිලධාරීන්, විනිසුරුවරුන් මෙන්ම පළාත් සභා නිලධාරීන් ඇතුළු පුළුල් පිරිසක් මේ යටතේ වත්කම් ප්රකාශ කළ යුතුය.
පද්ධතියේ පවතින බාධාකාරී තත්ත්වයන් මඟහරවා ගනිමින් අද දිනය තුළම අදාළ ප්රකාශ ඇතුළත් කිරීමට උත්සාහ කරන ලෙසත්, ගැටලුවක් පවතී නම් වහාම කොමිෂන් සභාව සම්බන්ධ කර ගන්නා ලෙසත් නිලධාරීන්ට උපදෙස් දී තිබේ.
