අසේල කුරුළුවංශ –
මහා භාණ්ඩාගාරයේ ඩොලර් මිලියන 2.5 ක මුදලක් වෙනත් ගිණුමකට බැර කිරීමේ සිද්ධිය සම්බන්ධයෙන් විපක්ෂය ඉල්ලා සිටි විවාදය, කාලය වෙන්කර ගැනීමේ ගැටලුවක් හේතුවෙන් මීළඟ පාර්ලිමේන්තු සතියේදී ලබා දීමට සභානායකවරයා කැමැත්ත පළකර තිබෙන බව කතානායක වෛද්ය ජගත් වික්රමරත්න පවසයි.
කතානායකවරයා පෙන්වා දෙන්නේ මෙම සතිය පාර්ලිමේන්තුවට ඉතා කාර්යබහුල සතියක් බවයි. අණපනත් ගණනාවක් සම්මත කර ගැනීමට අමතරව, වියට්නාම් ජනාධිපතිවරයා එළඹෙන 08 වැනි දින පාර්ලිමේන්තුව ඇමතීමට නියමිතව ඇති බවද හෙතෙම සඳහන් කළේය.
ශ්රී ලංකා පාර්ලිමේන්තුව ශ්රී ජයවර්ධනපුර කෝට්ටේ ස්ථාපිත කර වසර 44 ක් සපිරීම නිමිත්තෙන් අද (30) මහනුවර ශ්රී දළදා මාලිගාවේදී පැවැති ආගමික වැඩසටහනකට සහභාගි වීමෙන් අනතුරුව මාධ්ය හමුවේ අදහස් දක්වමින් කතානායකවරයා මේ බව පැවසීය.
අදාළ සිද්ධිය සම්බන්ධ විවාදයක් සඳහා මීළඟ පාර්ලිමේන්තු සැසියේදී කාලය වෙන් කිරීමට සභානායකවරයා එකඟ වී ඇති බවත්, මෙම සතියේ පවතින දැඩි කාර්යබහුලත්වය මත එය කල් දැමීමට සිදු වූ බවත් හෙතෙම යළිත් අවධාරණය කළේය.
