නම නිසා දිවි බේරාගත් ‘ඩොනල්ඩ් ට්‍රම්ප්’  මී හරකාගේ කතාව!… බිලි පූජාවෙන් නිදහස් කර   ජාතික සත්වෝද්‍යානයට!

උපේක්ෂා උඩුවරැල්ල –

බංග්ලාදේශයේ බාලිවර්ඩ් (Albino) විශේෂයට අයත්, ශරීරයේ පවතින සුවිශේෂී රන්වන් පැහැති රෝම කලඹ හේතුවෙන් “ඩොනල්ඩ් ට්‍රම්ප්” යන අන්වර්ථ නාමයෙන් හඳුන්වනු ලබන දුර්ලභ සුදු මී හරකෙකු එළඹෙන ඉද්-උල්-අදහා (Eid al-Adha) උත්සවයේ බිලි පූජාවෙන් නිදහස් කිරීමට එරට රජය අවසන් මොහොතේ මැදිහත් වී තීරණය කර තිබේ.

බංග්ලාදේශ ස්වදේශ කටයුතු අමාත්‍යාංශයේ උසස් නිලධාරියෙකු ඊයේ  (27 බදාදා ) දින මේ බව තහවුරු කළේය.

කිලෝග්‍රෑම් 700 කට (රාත්තල් 1,543 ක්) ආසන්න බරකින් යුත් මෙම සත්වයා සාම්ප්‍රදායික ආගමික බිලි පූජාව සඳහා ඒ වන විටත් අලෙවි කර අවසන්ව තිබුණි. කෙසේ වුවද, අද  දින පැවැත්වීමට නියමිත උත්සවයට පෙර මෙම සත්වයා කෙරෙහි මහජනතාව තුළ ඇති වූ දැඩි උනන්දුව සහ ආකර්ෂණය හේතුවෙන් මතුවිය හැකි ආරක්ෂක ගැටලු සැලකිල්ලට ගනිමින් බලධාරීන් වහාම ක්‍රියාත්මක වී මෙම මැදිහත්වීම සිදුකර ඇත.

බංග්ලාදේශ ස්වදේශ කටයුතු අමාත්‍ය සලාහුද්දීන් අහමඩ් විසින් ලබාදුන් නියෝගයකට අනුව, මෙම මී හරකා බිලි පූජාවෙන් නිදහස් කිරීමටත්, සත්වයා මිලදී ගත් පුද්ගලයාට ඔහු ගෙවූ මුදල් නැවත ලබා දීමටත් කටයුතු කර තිබේ. එමෙන්ම සත්වයා ඩකා අගනුවර පිහිටි ජාතික සත්වෝද්‍යානය වෙත ආරක්ෂිතව රැගෙන යාමට ද අමාත්‍යවරයා නියෝග කර ඇත.

“මහජනතාව තුළ ඇති වූ අසාමාන්‍ය උනන්දුව සහ ආරක්ෂක හේතුන් මත අවසන් මොහොතේ දී මෙම මී හරකා බිලි පූජාවෙන් නිදහස් කිරීමට තීරණය කරනු ලැබුවා” යැයි අමාත්‍යාංශ නිලධාරියා වැඩිදුරටත් සඳහන් කළේය.

සාමාන්‍ය උත්සව සමයක සිදුකරන සත්ව මිලදී ගැනීමක් ලෙස ආරම්භ වූ මෙම සිදුවීම, සත්වයාගේ දර්ශන ඇතුළත් වීඩියෝ පට සමාජ මාධ්‍ය ඔස්සේ ශීඝ්‍රයෙන් ප්‍රචාරය වීමත් සමඟ මුළු රටේම අවධානය දිනාගත් කතුහලයක් බවට පත් විය. සත්වයාගේ හිස මත පවතින රන්වන් පැහැති රෝම සිලුව සහ සන්සුන් හැසිරීම දැකබලා ගැනීම සඳහා දුර බැහැර ප්‍රදේශවලින් පවා විශාල ජනතාවක් එම ගොවිපළ වෙත පැමිණීමට පටන් ගෙන තිබුණි.

ගොවිපළේ අයිතිකරු වන සියාඋද්දීන් මෘධා පවසා සිටියේ, ඇමරිකානු හිටපු ජනාධිපතිවරයාගේ පෙනුමට පවතින සමානකම මුලින්ම හඳුනාගත් තමන්ගේ බාල සහෝදරයා විසින් මෙම සත්වයාට “ඩොනල්ඩ් ට්‍රම්ප්” යන නම තැබූ බවය.

මෘධා විසින් වැඩිදුරටත් සඳහන් කළේ මෙම සත්වයා අතිශයින්ම අහිංසක සහ සන්සුන් සත්වයෙකු වන අතර, නිතර නිතර ආහාර ලබාදීම සහ නිතිපතා නෑවීම ඇතුළු ඉතා ප්‍රවේශම්සහගත නඩත්තුවක් සහ රැකවරණයක් මේ වෙනුවෙන් අවශ්‍ය වන බවයි.

බංග්ලාදේශයේ වෙසෙන ගවයන් සහ මී හරකුන් බහුතරයක් තද කළු හෝ අළු පැහැති වන බැවින්, මෙවැනි ඇල්බිනෝ (සුදු) මී හරකුන් දැකගත හැක්කේ ඉතා කලාතුරකිනි.

එබැවින් ඉද් උත්සවයේ සත්ව වෙළඳපොළ තුළ මෙම සත්වයා කැපී පෙනෙන ආකර්ෂණයක් බවට පත්ව තිබුණි. කෙසේ වුවද, අවසානයේ දී සත්වයාගේ ජීවිතය බේරා ගැනීමට ප්‍රධානතම හේතුව වූයේ ඌට තබා තිබූ එම අපූරු අන්වර්ථ නාමයයි.