කපිල කේ හීනටියන –
2026 මැයි 10 වන ඉරිදා දින තෙලන්ගානා ප්රාන්තයේ හයිද්රාබාද්හි, සේකුන්දරබාද් පරේඩ් ක්රීඩාංගණයේ පැවති දැවැන්ත ජන හමුවකදී ඉන්දීය අග්රාමාත්ය නරේන්ද්ර මෝදි විසින් විශේෂ දේශනයක් පවත්වන ලදී. මිනිත්තු 30ක කාලයක් පුරා දිවගිය මෙම දේශනය මගින් වර්තමානයේ ඉන්දියාව මුහුණ දී සිටින බරපතල ජාතික අභියෝග සහ ඉන් මිදීමට පුරවැසියන් දායක විය යුතු ආකාරය පිළිබඳව දීර්ඝ වශයෙන් කරුණු ඉදිරිපත් කෙරිණි.
පවතින ගෝලීය අර්බුදයේ නොගිලි විවෘත මනසකින් එය දකිමින් ජාතියක් ලෙස ඊට මුහුණදීමට ඇති ජාතික අවකාශය පටු දේශපාලන මුග්ධකම් විසින් වසා දමමින් සිටින මොහොතක් අපි ගතකරමින් හිඳිමු. මෝදිගේ කතාවේ සංක්ෂිප්තය මෙසේ ඉදිරිපත් කරන්නේ ව්යසනයේ තරම ඉන්දියාවෙන් හෝ කියවා ගැනීමටය.
වර්තමාන ගෝලීය අර්බුදය සහ එහි බලපෑම
බටහිර ආසියාවේ හටගෙන ඇති ඉරාන – ඇමරිකා – ඊශ්රායල ගැටුම හෙවත් “තෙවන ගල්ෆ් යුද්ධය” (Gulf War 3.0) හේතුවෙන් ඉන්දියාව දැඩි ආර්ථික පීඩනයකට ලක්ව ඇති බව අග්රාමාත්යවරයා මෙහිදී පෙන්වා දුන්නේය. මෙම ගැටුම නිසා ගෝලීය සැපයුම් දාමයන් සම්පූර්ණයෙන්ම බිඳ වැටී ඇති අතර, බොරතෙල්, පෙට්රල්, ඩීසල්, පිසින ගෑස්, ආහාරයට ගන්නා තෙල් සහ පොහොර මිල අහස උසට ඉහළ ගොස් ඇති ආකාරය ඔහු කීවේය.
මෝදිට අනුව ඉන්දියාව සිය ඉන්ධන අවශ්යතාවයෙන් වැඩි ප්රමාණයක් සහ ආහාර තෙල් ආනයනය කරන බැවින්, මෙම අර්බුදය රටේ බලශක්ති සුරක්ෂිතතාවයට, උද්ධමනයට සහ විදේශ විනිමය සංචිතවලට සෘජු බලපෑම් එල්ල කර තිබේ. මෙම තත්ත්වය මීට පෙර ඉන්දියාව මුහුණ දුන් කොවිඩ්-19 වසංගතයට සහ යුක්රේන යුද්ධයට වඩා දරුණු විය හැකි බවත්, එය දීර්ඝ කාලයක් පැවතිය හැකි බවත් හෙතෙම අවධාරණය කළේය. රජය දැනටමත් ගොවීන්ට සහනාධාර ලබා දෙමින් තත්ත්වය සමනය කිරීමට පියවර ගත්තද, ජාතියක් ලෙස මෙයට මුහුණ දීමට සෑම පුරවැසියෙකුම එක් විය යුතු බවට ඔහු ඇරයුම් කළේය.
දේශප්රේමය පිළිබඳ නව අර්ථකථනය (Deshapremaya)
දේශප්රේමය යනු දේශ සීමාවේ රැකවල්ලා සිටින සෙබළුන් දිවි පිදීම පමණක්ම නොවන බවත්, මෙවැනි දුෂ්කර කාල පරිච්ඡේදයකදී රට වෙනුවෙන් වගකීම් සහගතව ජීවත් වීම සහ දෛනික ජාතික වගකීම් ඉටු කිරීම ද උසස්ම දේශප්රේමයක් බවත් අග්රාමාත්යවරයා පැහැදිලි කළේය.
ඔහුගේ අර්ථකථනයට අනුව, ඉන්ධන පිරිමැසීම, ආනයනය අඩු කිරීම සහ විදේශ විනිමය ආරක්ෂා කිරීම වැනි එදිනෙදා සරල ක්රියාවන් අද දවසේ දේශප්රේමී ක්රියාවන් වේ. “තෙල් භාවිතය සීමා කිරීම ජාතික ආර්ථිකයට මෙන්ම පුද්ගලික සෞඛ්යයට ද හිතකරය” යන්න ඔහු අවධාරණය කළේය. මෙය “ජාතිය ප්රථමයෙන්” (Nation First) යන තේමාව යටතේ සිදු කරන “සිවිල් සත්යග්රහයක්” (Civic Satyagraha) ලෙස හැඳින්වූ ඔහු, දේශප්රේමයේ ජීවගුණය අවදි කර මෙම ගෝලීය අර්බුදය ස්වයංපෝෂිත ඉන්දියාවක් ගොඩනැගීමට අවස්ථාවක් කර ගන්නා ලෙස මාධ්ය, වෘත්තීය සමිති සහ දේශපාලන පක්ෂ ඇතුළු සැමට ආරාධනා කළේය.
අර්බුදයට මුහුණ දීම සඳහා ජාතියට ඉදිරිපත් කළ ප්රධාන යෝජනා
කොවිඩ් වසංගතයට මුහුණ දුන් ආකාරයටම සාමූහිකව, ඉවසීමෙන් සහ සංයමයෙන් යුතුව මෙම අර්බුදයට මුහුණ දීම සඳහා අග්රාමාත්යවරයා විසින් ප්රධාන ක්ෂේත්ර කිහිපයක් යටතේ කරුණු ඉදිරිපත් කරන ලදී.
- ඉන්ධන පරිභෝජනය පාලනය කිරීම:
පෙට්රල් සහ ඩීසල් භාවිතය අවම කිරීම සඳහා නගරවල මෙට්රෝ දුම්රිය ඇතුළු පොදු ප්රවාහනය උපරිමයෙන් භාවිතා කරන ලෙසත්, පුද්ගලික වාහන හවුලේ (Carpooling) භාවිතා කරන ලෙසත් ඔහු ඉල්ලා සිටියේය. එමෙන්ම දෛනික ගමන් බිමන් සීමා කිරීම සඳහා කොවිඩ් සමයේ මෙන් “නිවසේ සිට වැඩ කිරීමේ” (Work from Home) ක්රමය සහ මාර්ගගත රැස්වීම් නැවත දිරිමත් කළ යුතු බවත්, භාණ්ඩ ප්රවාහනය සඳහා ට්රක් රථ වෙනුවට විදුලි දුම්රිය භාවිතා කළ යුතු බවත් සඳහන් කළේය. විදුලි වාහන (EV) භාවිතය සඳහා ජනතාව හැකි උපරිමයෙන් යොමු විය යුතු බව ඔහු කීවේය.
- ආහාර තෙල් සහ පිසින ගෑස් පිරිමැසීම:
ආහාරයට ගන්නා තෙල් භාවිතය 10%කින් පමණ අඩු කිරීම මගින් විදේශ විනිමය විශාල වශයෙන් ඉතිරි කර ගත හැකි අතර එය මහජන සෞඛ්යයට ද හිතකර බව මෝදි කීවේය. එමෙන්ම පිසින ගෑස් භාවිතය ද සීමා කරන ලෙස ඔහු උපදෙස් දුන්නේය.
- අත්යවශ්ය නොවන විදේශ සංචාර සහ රන් මිලදී ගැනීම්:
අවම වශයෙන් වසරක් යනතුරු විදේශ විනෝද චාරිකා, විදේශයන්හි පවත්වන විවාහ උත්සව සහ අත්යවශ්ය නොවන විදේශ ගමන් පමා කරන ලෙස ඉල්ලා සිටි අග්රාමාත්යවරයා, ඒ වෙනුවට දේශීය සංචාරක කර්මාන්තය දිරිමත් කරන ලෙස ඉල්ලා සිටියේය. එමෙන්ම විදේශ විනිමය පිටතට ගලා යාම වැළැක්වීම සඳහා අවම වශයෙන් වසරක කාලයක් රන් මිලදී ගැනීමෙන් වළකින ලෙස ද ඔහු ජනතාවගෙන් පොරොන්දුවක් ඉල්ලා සිටියේය.
- දේශීය නිෂ්පාදන දිරිගැන්වීම (Swadeshi):
“Vocal for Local” ව්යාපාරය යටතේ එදිනෙදා භාවිතා කරන පනාව, බෑග්, පාවහන්, කතුර, දත් බුරුසු වැනි සෑම දෙයක්ම දේශීය නිෂ්පාදනවලින් සපුරා ගැනීමට පියවර ගත යුතු බවත්, සෑම දෙයකටම ආනයන මත යැපෙන්නේ නම් ජාතියක් දියුණු කළ නොහැකි බව හෙතෙම පෙන්වා දුන්නේය.
- කෘෂිකාර්මික ක්ෂේත්රයේ වෙනස්කම්:
රසායනික පොහොර භාවිතය 25% – 50% දක්වා අඩු කර ක්රමයෙන් ස්වභාවික ගොවිතැනට යොමු වන ලෙස මෝදි ගොවීන්ගෙන් ඉල්ලා සිටියේය. ඔමු විදේශයන්හි රුපියල් 3000ක් පමණ වන පොහොර මල්ලක් රජය රුපියල් 300කට වඩා අඩු මුදලකට සහනාධාර යටතේ ලබා දෙන බව සිහිපත් කළේය. ඩීසල් ජල පොම්ප වෙනුවට සූර්ය බලශක්ති ජල පොම්ප භාවිතයට යොමු වීමේ අවශ්යතාවය ද ඔහු අවධාරණය කළේය.
- ජාතික මානසිකත්වය සහ සහයෝගීතාවය:
මෝදිගේ යෝජනාව අනුව
- සෑම කුඩා තීරණයකදීම “ජාතිය ප්රථමයෙන්” යනුවෙන් සිතා කටයුතු කළ යුතුය.
- භාණ්ඩ හිඟයක් ඇති වේ යැයි අනවශ්ය බියක් ඇති කර නොගත යුතු අතර, කළු කඩ ව්යාපාර හෝ භාණ්ඩ රැස් කිරීම්වලින් වැළකී සිටිය යුතුය.
- මාධ්ය, වෘත්තීය සමිති සහ අධිකරණය වැනි සියලුම ආයතන ජාතික අවශ්යතාවය වෙනුවෙන් පෙනී සිටිය යුතු බවත්, රජය සහ ජනතාව එකට එක්ව කටයුතු කිරීම ඉන්දියාවේ සැබෑ ශක්තිය බවත් ඔහු ප්රකාශ කළේය.
අවසාන වශයෙන්, සෑම පුරවැසියෙකුම අවංකව සහ කැපවීමෙන් කටයුතු කරන්නේ නම්, ඕනෑම අභියෝගයක් ජයගත හැකි බවත්, ඉන්දියාව මෙම අර්බුදයෙන් වඩාත් ශක්තිමත්ව නැගී සිටිනු ඇති බවත් පවසමින් අග්රාමාත්යවරයා සිය දේශනය අවසන් කළේය.
ඇතිවෙමින් ඇති ලෝක අර්බුදය තේරුම් නොගෙන ලිප ගිනි මෙලවෙන තෙක් දිය හැලියේ කෙළින කකුළුවන් මෙන් හැසිරෙමින් බලය වෙනුවෙන් කරන නිරුවත් බලු පොරයක් සහිත දේශපාලනයක් අවසානයේ ජාතියක් සොහොන් කරන බව පමණක් දැනට ලියා තබමු..
