දිනසේන රතුගමගේ –
මුලතිව් රෝහල වෙත අඛණ්ඩව භාණ්ඩ සැපයීමේ අවස්ථාව ලබාදීම සඳහා රුපියල් ලක්ෂ තුනක අල්ලසක් ඉල්ලා ඉන් කොටසක් ලබාගත් එම රෝහලේ ගණකාධිකාරීවරයා සහ කළමනාකාර සහකාරවරයෙකු අල්ලස් හෝ දූෂණ විමර්ශන කොමිෂන් සභාවේ නිලධාරීන් විසින් අත්අඩංගුවට ගෙන තිබේ.
අදාළ සැපයුම්කරුගෙන් දිගින් දිගටම භාණ්ඩ මිලදී ගැනීම සහතික කිරීම වෙනුවෙන් මෙම අල්ලස් මුදල ඉල්ලා ඇති බව වාර්තා වේ. සැපයුම්කරු විසින් කරන ලද පැමිණිල්ලකට අනුව ක්රියාත්මක වූ කොළඹ අල්ලස් හෝ දූෂණ විමර්ශන ඒකකයේ නිලධාරීන් කණ්ඩායමක් පසුගිය 18 වනදා මුලතිව්හිදී මෙම වැටලීම සිදුකර ඇත.
අල්ලස් මුදල ලබාගන්නා අවස්ථාවේදීම සැකකරුවන් දෙදෙනා අත්අඩංගුවට ගෙන ඇති අතර, ඔවුන් වැඩිදුර විමර්ශන කටයුතු සඳහා කොළඹට රැගෙන ගොස් තිබේ.
සිද්ධිය සම්බන්ධයෙන් අල්ලස් හෝ දූෂණ විමර්ශන කොමිෂන් සභාව වැඩිදුර පරීක්ෂණ පවත්වයි.
