14 හැවිරිදි දැරියක බරපතළ ලෙස ලිංගික අපයෝජනයට ලක් කිරීමේ සිද්ධියකට සම්බන්ධ ප්රධාන සැකකාර මවුලවියෙක් සහ ඔහුට ආධාර අනුබල දුන් තවත් අයෙකු ලබන ජූනි මස 03 වනදා දක්වා රක්ෂිත බන්ධනාගාරගත කර තිබේ.
පොලිසිය සඳහන් කළේ එරගම ප්රදේශයේ පදිංචි 21 හැවිරිදි මවුලවියෙක් මෙලෙස රක්ෂිත බන්ධනාගාරගත කර ඇති බවය.
සිද්ධියෙන් පසු ප්රදේශයෙන් පළාගොස් සිටි ප්රධාන සැකකාර මවුලවියා, පසුගිය මැයි 20 වනදා නීතිඥයෙකු මාර්ගයෙන් අම්පාර මහේස්ත්රාත් අධිකරණයට භාර වීමෙන් අනතුරුව මෙලෙස රක්ෂිත බන්ධනාගාරගත කර ඇත.
මෙම අපයෝජන සිද්ධිය සඳහා ප්රධාන සැකකරුට ආධාර අනුබල දීමේ චෝදනාව මත එරගම ප්රදේශයේම පදිංචි තවත් 21 හැවිරිදි තරුණයෙකු පොලිසිය විසින් මීට පෙර අත්අඩංගුවට ගෙන තිබුණි.
පසුගිය මැයි 09 වනදා අම්පාර මහේස්ත්රාත් අධිකරණයට ඉදිරිපත් කිරීමෙන් පසු මැයි 20 දක්වා රක්ෂිත බන්ධනාගාරගත කර සිටි එම සැකකරු ද ජූනි 03 වනදා දක්වා නැවත වරක් බන්ධනාගාරගත කිරීමට මහේස්ත්රාත්වරයා නියෝග කර තිබේ.
සිද්ධිය සම්බන්ධයෙන් එරගම පොලිසිය වැඩිදුර විමර්ශන සිදුකරනු ලබයි. ( නිවුස් වයර්)
