ඉඳුනිල් කහටපිටිය –
ලංකා ප්රිමියර් ලීග් (LPL) 2026 තරගාවලියේ ක්රීඩක කෙටුම්පත (Player Draft) ආරම්භ වීමට පෙර, තරගාවලියට එක්වන ප්රධාන කණ්ඩායම් 5 විසින් තමන් වෙත සෘජුවම බඳවා ගනු ලැබූ (Pre-signed) දේශීය සහ විදේශීය ප්රමුඛ පෙළේ ක්රීඩකයින් 14 දෙනෙකුගෙන් යුත් නිල ලේඛනය ශ්රී ලංකා ක්රිකට් ආයතනය විසින් ප්රකාශයට පත් කර තිබේ.
මෙවර තරගාවලියේදී පසුගිය වසරවල පැවැති ක්රීඩක වෙන්දේසි (Auction) ක්රමය වෙනුවට නැවතත් ක්රීඩක කෙටුම්පත් (Draft) ක්රමවේදය ක්රියාත්මක වන අතර, ජූනි මස 1 වැනිදා එම ක්රීඩක කෙටුම්පත පැවැත්වීමට නියමිතය. ඒ අනුව කිසිදු කණ්ඩායමකට පසුගිය වසරේ ක්රීඩකයින් රඳවා ගැනීමේ (Retain) අවස්ථාව හිමි නොවන අතර, සියලුම කණ්ඩායම් අලුතින්ම නිර්මාණය කිරීමට සිදුවේ. එහෙත් කෙටුම්පතට පෙර “Local Icon”, “Local Star”, සහ “Foreign Icon” “Foreign Star”යන කාණ්ඩ යටතේ ක්රීඩකයින් 4 දෙනෙකු සෘජුවම බඳවා ගැනීමට කණ්ඩායම්වලට අවස්ථාව ලබා දී තිබුණි.
ඒ අනුව දැනට නිල වශයෙන් තහවුරු කර ඇති පූර්ව ක්රීඩක බඳවා ගැනීම් පහත පරිදි වේ.
කණ්ඩායම් සෘජුවම බඳවා ගත් ක්රීඩකයින්:
- Dambulla Sixers: දිනේෂ් චන්දිමාල්, දුෂ්මන්ත චමීර, සහීබ්සාදා ෆර්හාන් (පාකිස්ථානය), රීසා හෙන්ඩ්රික්ස් (දකුණු අප්රිකාව)
- Kandy Royals: වනිඳු හසරංග, ඇන්ජලෝ මැතිව්ස්, මොයින් අලි (එංගලන්තය)
- Galle Gallants: දසුන් ශානක, එෂාන් මාලිංග
- Jaffna Kings: දුනිත් වෙල්ලාලගේ, භානුක රාජපක්ෂ, ශකිබ් අල් හසන් (බංග්ලාදේශය)
- Colombo Kaps: කුසල් මෙන්ඩිස්, කමිඳු මෙන්ඩිස්
ඉතිරි ක්රීඩකයින් සියලු දෙනා ඉදිරි ක්රීඩක කෙටුම්පතේදී තෝරා ගැනීමට නියමිතය.
තරගාවලියේ නවතම රෙගුලාසි සහ ව්යුහය
ශ්රී ලංකා ක්රිකට් ආයතනයේ සංවිධායකත්වයෙන් හයවැනි වරටත් පැවැත්වෙන මෙවර LPL තරගාවලිය 2026 ජූලි මස 17 වැනිදා සිට අගෝස්තු මස 8 වැනිදා දක්වා පැවැත්වීමට සියලු කටයුතු සූදානම් කර ඇත.
මෙවර තරගාවලිය සඳහා නව රීති කිහිපයක් ද හඳුන්වා දී තිබේ:
- සංචිතයේ ප්රමාණය: සෑම කණ්ඩායමකම අවම වශයෙන් ක්රීඩකයින් 18 දෙනෙකු සිටිය යුතු අතර උපරිම සීමාව 20 කි. මෙයට උපරිම වශයෙන් විදේශීය ක්රීඩකයින් 7 දෙනෙකු ඇතුළත් කළ හැකිය.
- තරුණ ක්රීඩක සහභාගිත්වය: සෑම සංචිතයකටම වයස අවුරුදු 23න් පහළ (U-23) නැගී එන දේශීය ක්රීඩකයින් දෙදෙනෙකු ඇතුළත් කිරීම අනිවාර්ය වන අතර, ඉන් එක් ක්රීඩකයෙකුට තරගයේ ක්රීඩා කරන එකොළොස් දෙනාගේ කණ්ඩායමට (Starting XI) අනිවාර්යයෙන්ම අවස්ථාව ලබා දිය යුතුය.
- විදේශීය ක්රීඩක සීමාව: තරගයකදී ක්රීඩා කරන එකොළොස් දෙනාගේ කණ්ඩායමට ඇතුළත් කළ හැකි උපරිම විදේශීය ක්රීඩකයින් සංඛ්යාව 4කි.
තරග කාලසටහන සහ ක්රීඩාංගණ
මෙවර තරගාවලිය පුරා තරග 24ක් පැවැත්වීමට සැලසුම් කර ඇති අතර එය ක්රීඩාංගණ 4ක් කේන්ද්ර කර ගනිමින් අදියර කිහිපයකින් පැවැත්වේ.
- ජූලි 17 – 19: සමාරම්භක තරගාවලිය කොළඹ එස්.එස්.සී. (SSC) ක්රීඩාංගණයේදී පැවැත්වේ. සමාරම්භක තරගය ජූලි 17 වැනිදා රාත්රී 7:30ට වත්මන් ශූර යාපනය කණ්ඩායම සහ අනුශූර ගාල්ල කණ්ඩායම අතර පැවැත්වීමට නියමිතය.
- ජූලි 21 – 26: දඹුල්ල රංගිරි දඹුලු ජාත්යන්තර ක්රිකට් ක්රීඩාංගණයේදී තරග පැවැත්වේ.
- ජූලි 28 – අගෝස්තු 2: මහනුවර පල්ලෙකැලේ ජාත්යන්තර ක්රිකට් ක්රීඩාංගණයේදී තරග පැවැත්වේ.
- අගෝස්තු 5 සහ 7: අවසන් වටයේ සුදුසුකම් ලැබීමේ (Qualifiers) සහ ඉවත් කිරීමේ (Eliminator) තරග කොළඹ ආර්. ප්රේමදාස ජාත්යන්තර ක්රිකට් ක්රීඩාංගණයේදී පැවැත්වේ.
- අගෝස්තු 8: මහා පිරිමියර් ලීග් අවසන් මහා තරගය කොළඹ ආර්. ප්රේමදාස ක්රීඩාංගණයේදී පැවැත්වෙන අතර, අගෝස්තු 9 වැනිදා අතිරේක දිනයක් (Reserve Day) ලෙස වෙන් කර ඇත.
පසුගිය පෙබරවාරි සහ මාර්තු මාසවල ශ්රී ලංකාව සහ ඉන්දියාව සම-සංවිධායකත්වය දැක්වූ පිරිමි විස්සයි20 ලෝක කුසලාන තරගාවලිය හේතුවෙන් මෙවර LPL තරගාවලිය ජූලි දක්වා කල් තැබීමට ශ්රී ලංකා ක්රිකට් ආයතනය පියවර ගෙන තිබුණි.
බටහිර ඉන්දීය කොදෙව් ක්රිකට් සුපිරි තරුවක් වන ක්රිස් ගේල් මෙවර තරගාවලියේ සන්නාම තානාපතිවරයා (Brand Ambassador) ලෙස කටයුතු කරයි.
