අල්ලස් හෝ දූෂණ විමර්ශන කොමිෂන් සභාව මගින් තමන්ට එරෙහිව ගොනු කර ඇති කරුණු 31ක් අතුරින් කරුණු තුනක් පිළිගැනීමට හිටපු බලශක්ති අමාත්ය කුමාර ජයකොඩි එකඟ වී තිබේ. මහාධිකරණයේදී මෙම නඩුව විභාගයට ගැනීමට පෙර පැවැති පූර්ව නඩු විභාග සම්මන්ත්රණයේදී (Pre-trial conference) විත්තිකාර පාර්ශ්වය විසින් මෙම එකඟතාව පළ කරන ලද බව සන්ඩේ ටයිම්ස් වාර්තා කර ඇත.
ඒ අනුව අදාළ චෝදනා එල්ල වී ඇති කාලසීමාව තුළ තමන් ලංකා පොහොර සමාගමේ සේවය කළ බවත්, එම සමාගමේ ප්රසම්පාදන කමිටුවේ සාමාජිකයෙකු ලෙස කටයුතු කළ බවත් කුමාර ජයකොඩි පිළිගෙන තිබේ.
අල්ලස් කොමිසම මගින් ඉදිරිපත් කළ සෙසු කරුණු නඩු විභාගය පැවැත්වෙන කාලය තුළ සලකා බැලීමට මෙහිදී තීරණය විය. විත්තිකරු පිළිගත් කරුණු සනාථ කිරීම සඳහා අවශ්ය ලේඛනමය සාක්ෂි ඉදිරිපත් කරන ලෙස මහාධිකරණ විනිසුරු රෂාන්ත ගොඩවෙල විසින් විත්ති පාර්ශ්වයට නියෝග කළේය.
නඩුවට අදාළ සාක්ෂි විභාගය ජුනි 17 වැනිදා ආරම්භ වීමට නියමිත අතර, එදිනට පැමිණිල්ලේ සාක්ෂිකරුවන් දෙදෙනෙකු අධිකරණය හමුවේ සාක්ෂි ලබා දීමට නියමිතය. පැ
මිණිල්ල මෙහෙයවන අල්ලස් කොමිසමේ සහකාර අධ්යක්ෂ අසිත ඇන්තනි ප්රකාශ කළේ පැමිණිල්ලේ සාක්ෂි ඉදිරිපත් කිරීම සඳහා දින හයක් හෝ හතක් අවශ්ය වන බවය. විත්ති පාර්ශ්වය සිය සාක්ෂි ඉදිරිපත් කිරීම සඳහා දින තුනක කාලයක් ඉල්ලා සිටියේය.
2016 වසරේ ලංකා පොහොර සමාගමේ ප්රසම්පාදන කළමනාකරු ලෙස කටයුතු කරමින් සිටියදී පෞද්ගලික සමාගමකට අනිසි මූල්ය ලාභයක් ලබා ගැනීමට පහසුකම් සැලසීම සහ රජයට රුපියල් මිලියන 8.8කට අධික පාඩුවක් සිදු කිරීම සම්බන්ධයෙන් චෝදනා යටතේ අල්ලස් කොමිසම විසින් හිටපු ඇමතිවරයාට එරෙහිව අධිචෝදනා ගොනු කර ඇත. ඔහු මේ වන විට ඇප මත මුදා හැර සිටියි.
විත්තිකරු වෙනුවෙන් ජනාධිපති නීතිඥ නලින්ද ඉන්දතිස්ස සමඟ නීතිඥවරුන් වන පසිඳු ගිහාන් බටගොඩ, මල්කා දෙනෙත්ති සහ අකලංක උක්වත්ත පෙනී සිටියහ.
