උදා වූ සිංහල සහ දෙමළ අලුත් අවුරුද්ද වෙනුවෙන් ආශිර්වාද ලබා ගැනීම සඳහා ජනාධිපති අනුර කුමාර දිසානායක අද (15) පෙරවරුවේ මහනුවර ඓතිහාසික මල්වතු සහ අස්ගිරි මහා විහාරයන් වෙත ගොස් මහා නායක හිමිවරුන් බැහැදුටුවේය.
පළමුව මල්වතු මහා විහාරය වෙත පැමිණි ජනාධිපතිවරයා මහා විහාරවංශික ස්යාමෝපාලි මහා නිකායේ මල්වතු පාර්ශ්වයේ මහා නායක අතිපූජ්ය තිබ්බටුවාවේ ශ්රී සුමංගල නාහිමිපාණන් වහන්සේ බැහැදැක සුවදුක් විමසා කෙටි පිළිසඳරක නිරත විය. එහිදී මහා නාහිමියන් ප්රමුඛ මහා සංඝරත්නය සෙත් පිරිත් සජ්ජායනා කර උදා වූ අලුත් අවුරුද්ද වෙනුවෙන් ජනාධිපතිවරයා ඇතුළු පිරිස වෙත ආශිර්වාද කළහ.
අනතුරුව අස්ගිරි මහා විහාරය වෙත ගිය ජනාධිපතිවරයා ස්යාමෝපාලි මහා නිකායේ අස්ගිරි පාර්ශ්වයේ මහා නායක අතිපූජ්ය වරකාගොඩ ශ්රී ඤාණරතන නාහිමිපාණන් වහන්සේ බැහැදුටු අතර එහිදී ද මහා සංඝරත්නය සෙත් පිරිත් සජ්ජායනා කරමින් රාජ්ය නායකයා වෙත සිය ආශිර්වාදය පළ කළහ.
මෙම සංචාරය අතරතුර මල්වතු සහ අස්ගිරි උභය මහා විහාරීය අනුනායක හිමිවරුන් බැහැදැකීමට ද ජනාධිපතිවරයා කටයුතු කළේය. ඒ අනුව මල්වතු පාර්ශ්වයේ අනුනායක අතිපූජ්ය දිඹුල්කුඹුරේ විමලධම්ම අනුනායක හිමිපාණන් වහන්සේ බැහැදුටු ජනාධිපතිවරයා ඉන් අනතුරුව අස්ගිරි පාර්ශ්වයේ අනුනායක අතිපූජ්ය නාරම්පනාවේ ආනන්ද අනුනායක හිමිපාණන් වහන්සේ බැහැදුටුවේය.
එසේම අස්ගිරි ගෙඩිගේ රාජමහා විහාරය වෙත ගොස් ස්යාමෝපාලි මහා නිකායේ අස්ගිරි පාර්ශ්වයේ අනුනායක, පොළොන්නරුව සොළොස්මස්ථානාධිපති අතිපූජ්ය වෙඬරුවේ උපාලි අනුනායක හිමිපාණන් වහන්සේ බැහැදැක ද ජනාධිපතිවරයා ආශිර්වාද ලබා ගත්තේය.
සෞඛ්ය සහ ජනමාධ්ය අමාත්ය වෛද්ය නලින්ද ජයතිස්ස ඇතුළු පිරිසක් මෙම අවස්ථාවට එක්ව සිටියහ.
නාරම්පනාවේ ආනන්ද අනුනායක හිමියන් බැහැ දකිමින්…
