ඉඳුනිල් කහටපිටිය –
මාධ්යවේදී ප්රදීප් එක්නැලිගොඩ පැහැරගෙන ගොස් අතුරුදහන් කිරීම ඇතුළු චෝදනා යටතේ ගිරිතලේ යුද හමුදා කඳවුරේ හිටපු අණදෙන නිලධාරී ෂම්මි කුමාරරත්න ඇතුළු යුද හමුදා නිලධාරීන් 09 දෙනෙකුට එරෙහිව නීතිපතිවරයා පවරා ඇති නඩුවේ සාක්ෂි විභාගය ලබන ජුනි මස 26 වැනිදා යළි කැඳවීමට කොළඹ ස්ථිර ත්රිපුද්ගල මහාධිකරණය අද (19) නියම කළේය.
නයනා සෙනවිරත්න (සභාපති විනිසුරු), නලීන් හේවාවසම් සහ ලක්මාලි හේවාවසම්ගෙන් සමන්විත ස්ථිර ත්රිපුද්ගල විනිශ්චය මණ්ඩලය හමුවේ මෙම නඩුව අද කැඳවනු ලැබීය.
එහිදී නියෝජ්ය සොලිසිටර් ජෙනරාල් වසන්ත පෙරේරාගේ මෙහෙයවීමෙන්, පැමිණිල්ලේ සාක්ෂිකරුවන් ලෙස නම් කර සිටින ගිරිතලේ හමුදා කඳවුරේ සේවය කළ හිටපු හමුදා නිලධාරියෙකු වන උපාලි ප්රියන්ත සහ විශ්රාමික පොලිස් කොස්තාපල්වරයෙකු වන සුමනතිලක යන අයගෙන් සාක්ෂි සටහන් කරගැනීම සිදු කෙරිණි.
අනතුරුව නියෝජ්ය සොලිසිටර් ජෙනරාල්වරයා අධිකරණයෙන් ඉල්ලා සිටියේ, මෙම නඩුවේ මීට පෙර සාක්ෂි සටහන් කරගත් සාක්ෂිකරුවෙකු වන සුරේෂ් කුමාර නමැත්තා ද යළි අධිකරණය හමුවට කැඳවීමට අවසර දෙන ලෙසයි.
අදාළ සාක්ෂිකරු මෙම සිද්ධිය සම්බන්ධයෙන් 2015 වසරේදී හෝමාගම මහේස්ත්රාත් අධිකරණයේ මහේස්ත්රාත්වරයා ඉදිරියේ රහස් ප්රකාශයක් ද, පසුව 2023 වසරේදී අපරාධ පරීක්ෂණ දෙපාර්තමේන්තුව ඉදිරියේ ඊට පරස්පර ප්රකාශයක් ද ලබා දී ඇති බව නියෝජ්ය සොලිසිටර් ජෙනරාල්වරයා පෙන්වා දුන්නේය.
නඩුවේ පළමු සැකකරු වන ගිරිතලේ හමුදා කඳවුරේ අණදෙන නිලධාරී ෂම්මි කුමාරරත්න තමන්ට තර්ජනය කර බලපෑම් කිරීම හේතුවෙන් සාක්ෂිකරු එලෙස පරස්පර සාක්ෂි ලබා දී ඇති බවත්, ඒ අනුව ඔහුගෙන් නැවත සාක්ෂි කැඳවීම අත්යවශ්ය බවත් පැමිණිල්ල වෙනුවෙන් පෙනී සිටි නියෝජ්ය සොලිසිටර් ජෙනරාල්වරයා අධිකරණයට දැනුම් දුන්නේය.
කෙසේ වෙතත්, එම ඉල්ලීමට විත්තියේ නීතිඥවරු දැඩි විරෝධය පළ කළහ. ඔවුන් අධිකරණය හමුවේ කියා සිටියේ අදාළ සාක්ෂිකරු අගතිගාමී සාක්ෂිකරුවෙකු වන බවයි.
පළමු සැකකාර ෂම්මි කුමාරරත්න විසින් මෙම සාක්ෂිකරුට තර්ජනය කිරීමේ සිද්ධිය සම්බන්ධයෙන් මේ වන විටත් ත්රිකුණාමලය අධිකරණයේ වෙනත් නඩුවක් විභාග වෙමින් පවතින බවත්, එහි තීන්දුවක් මෙතෙක් ලැබී නොමැති පසුබිමක, එකී සාක්ෂිකරු මෙම නඩුවේ සාක්ෂි සඳහා යළි කැඳවීමට කිසිසේත් එකඟ විය නොහැකි බවත් විත්තියේ නීතිඥවරු ප්රකාශ කළහ.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
ඉදිරිපත් වූ කරුණු සලකා බැලූ ත්රිපුද්ගල මහාධිකරණ විනිසුරු මඩුල්ල, නඩුවේ වැඩිදුර සාක්ෂි විභාගය ජුනි 26 වැනිදාට කල් තැබීය.
