ලබන වසරේ සිට 06 ශ්රේණියේ නව අධ්යාපන ප්රතිසංස්කරණ ක්රියාත්මක කිරීම සඳහා අධ්යාපන අමාත්යාංශය පූර්ණ සූදානමකින් පසුවන බව රජය නිවේදනය කරයි.
අධ්යාපන ප්රතිසංස්කරණ ක්රියාත්මක කිරීමේ ප්රගතිය විමසා බැලීම සඳහා ජනාධිපති ලේකම් ආචාර්ය නන්දික සනත් කුමනායක ප්රධානත්වයෙන් ඊයේ (26) පස්වරුවේ ජනාධිපති ලේකම් කාර්යාලයේදී පැවැති සාකච්ඡාවකින් පසු මෙම දැනුම් දීම රජය පාර්ශවයෙන් සිදුකර තිබේ.
එම සාකච්ඡාව සඳහා අධ්යාපන, උසස් අධ්යාපන සහ වෘත්තීය අධ්යාපන අමාත්යාංශයේ ලේකම් නාලක කලුවැව ඇතුළු අධ්යාපන අමාත්යාංශය යටතේ ක්රියාත්මකවන ආයතනවල ප්රධානීන් පිරිසක් එක්ව සිටියහ.
මෙම නව අධ්යාපන ප්රතිසංස්කරණ කුළුණු පහක් යටතේ ක්රියාත්මක වන අතර, ජනාධිපතිවරයා සමඟ පැවැති සාකච්ඡාවකදී ලබා දුන් උපදෙස් පරිදි එම කටයුතු අධීක්ෂණය සහ පවත්වාගෙන යාම සඳහා කමිටු පහක් පත් කර ඇත. එම කමිටුවල කටයුතු සොයා බැලීම සහ ප්රගතිය විමසා බැලීම සඳහා අධ්යාපන අමාත්යවරියගේ ප්රධානත්වයෙන් තවත් කමිටුවක් පත් කර තිබේ. 2026 වසරේදී පළමු වසර සඳහා ආරම්භ කරන ලද අධ්යාපන ප්රතිසංස්කරණ මේ වන විට විධිමත්ව ක්රියාත්මක වන බව අධ්යාපන අමාත්යාංශයේ නිලධාරීහු පෙන්වා දුන්හ.
ෙප්රතිසංස්කරණ ක්රියාත්මක කිරීම පිළිබඳව පත් කරන ලද විද්වත් කමිටුවේ යෝජනාද සැලකිල්ලට ගනිමින් 06 ශ්රේණියට අදාළ මොඩියුල සංස්කරණය කර මුද්රණය කිරීමට කටයුතු සූදානම් කර ඇත. පළමු වාරයට අදාළ සියලුම මොඩියුල මේ වන විට මුද්රණය කර අවසන්ව ඇති අතර, ඒවා දෙවන වාරය සඳහාවන මොඩියුලද සමඟ එකවර ලබා දීමට සැලසුම් කර තිබේ. මෙම මොඩියුල සංවර්ධනය කිරීම අධ්යාපන ග්රන්ථ ප්රකාශන දෙපාර්තමේන්තුව විසින් සිදුකරන අතර, ජාතික අධ්යාපන ආයතනය සහ ජාතික අධ්යාපන කොමිෂන් සභාව මේ සඳහා අඛණ්ඩව මැදිහත් වෙයි.
අධ්යාපන ප්රතිසංස්කරණ ක්රියාත්මක කිරීමට අදාළව දිවයිනේ ද්විතීයික පාසල් 6500කට අවශ්ය උපකරණ මේ වන විට ලබා දී අවසන්ය. විශේෂයෙන් සංවර්ධනය කළ යුතු පාසල් 373ක් හඳුනාගෙන ඇති අතර, ඒවා සංවර්ධනය කිරීමේ කටයුතුද මේ වන විට සිදු වෙමින් පවතී. මෙම අධ්යාපන ප්රතිසංස්කරණ ක්රියාවට නැංවීමේදී අදාළ ආයතන අතර මනා සම්බන්ධීකරණයක් පවත්වා ගනිමින් ප්රතිපත්තිමය මගපෙන්වීම් සිදු කිරීමට ජනාධිපති කාර්යාලය දක්වන අඛණ්ඩ මැදිහත්වීම අධ්යාපන අමාත්යාංශයේ ලේකම්වරයා ඇතුළු නිලධාරීන්ගේ ඇගයීමට ලක් විය. මෙම ප්රගතිය සොයා බැලීම සඳහා යළි මාස තුනකින් රැස්වීමටද මෙහිදී එකඟතාව පළ විය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
මෙම සාකච්ඡාව සඳහා ජනාධිපති ජ්යෙෂ්ඨ අතිරේක ලේකම් කපිල ජනක බණ්ඩාර, අධ්යාපන කොමිෂන් සභාවේ සභාපති මහාචාර්ය ඒ.සරත් ආනන්ද, උප සභාපති තිලක් ධර්මරත්න ඇතුළු අධ්යාපන අමාත්යාංශයේ සහ ඒ යටතේ ක්රියාත්මක වන ආයතනවල ප්රධානීහු පිරිසක් සහභාගී වූහ.
