මහජන ආරක්ෂක ඇමති ආනන්ද විජේපාල පාර්ලිමේන්තුවේ මන්ත්රී ධූරයක් දැරීමට නුසුදුස්සෙක් බවට තීන්දුවක් ඉල්ලා ශ්රී ලංකා පොදුජන පෙරමුණේ හිටපු පාලක ලේකම් රේණුක පෙරේරා විසින් ඉදිරිපත් කළ රිට් පෙත්සම විභාගයට ගැනීමට ශ්රේෂ්ඨාධිකරණය අද (22) ඒකමතිකව තීරණය කර තිබේ.
මෙම පෙත්සම අද සලකා බලනු ලැබුවේ ජනක් ද සිල්වා, මේනකා විජේසුන්දර සහ සම්පත් විජේරත්න යන ශ්රේෂ්ඨාධිකරණ විනිසුරුවරුන්ගෙන් සමන්විත ත්රිපුද්ගල විනිසුරු මඩුල්ල ඉදිරියේ දී ය. ඒ අනුව මෙම අභියාචනා පෙත්සම එළඹෙන නොවැම්බර් මස 03 වැනිදා විභාගයට ගැනීමට අධිකරණය දින නියම කළේය.
ආනන්ද විජේපාල පාර්ලිමේන්තු මන්ත්රීවරයෙක් ලෙස ක්රියා කරමින් ජනාධිපතිවරයාගේ කාර්ය මණ්ඩල ප්රධානියා වශයෙන් ද කටයුතු කරන බවත්, පාර්ලිමේන්තු මන්ත්රී ධූරයක් දරමින් සිටිය දී රාජ්ය සේවයේ තනතුරක් දැරීම මන්ත්රී ධූරය අහෝසි වීමට නුසුදුසුකමක් ලෙස තීන්දු කරන ලෙසත් ඉල්ලා රේණුක පෙරේරා විසින් මුලින්ම මෙම රිට් පෙත්සම අභියාචනාධිකරණයට ඉදිරිපත් කර තිබිණි.
එම අවස්ථාවේ දී නීතිපතිවරයා මූලික විරෝධතා ගොනු කරමින් පෙන්වා දුන්නේ පෙත්සමේ වගඋත්තරකරුවෙක් ලෙස ජනාධිපතිවරයා නම් කර නොමැති නිසාත්, අමාත්යවරයා ජනාධිපති කාර්ය මණ්ඩල ප්රධානියා ලෙස කටයුතු කළ ද රජයෙන් කිසිදු වැටුපක් ලබාගෙන නොමැති නිසාත්, එම පෙත්සම පවත්වාගෙන යෑමට නොහැකි බවයි. ඒ අනුව අභියාචනාධිකරණය එම රිට් පෙත්සම විභාගයට නොගෙනම ඉකුත් වසරේ දී නිෂ්ප්රභා කිරීමට පියවර ගත්තේය.
පෙත්සම්කාර රේණුක පෙරේරා එම අභියාචනාධිකරණ තීන්දුව අභියෝගයට ලක් කරමින් ශ්රේෂ්ඨාධිකරණය හමුවේ මෙම අභියාචනා පෙත්සම ගොනු කරනු ලැබුවේ ඉන් අනතුරුවය.
එම පෙත්සම අද සලකා බැලූ අවස්ථාවේ දී පෙත්සම්කරු වෙනුවෙන් පෙනී සිටි නීතිඥවරයා අධිකරණය හමුවේ කරුණු දක්වමින් පෙන්වා දුන්නේ ආණ්ඩුක්රම ව්යවස්ථාවේ ප්රතිපාදන අනුව පාර්ලිමේන්තු මන්ත්රීවරයෙක් ලෙස තේරී පත්වන අයෙකුට රාජ්ය තනතුරක් දැරීමට කිසිදු නීතිමය අවසරයක් නොමැති බවයි. වගඋත්තරකාර ආනන්ද විජේපාල මන්ත්රී ධූරය දරන අතරම ජනාධිපති කාර්ය මණ්ඩල ප්රධානියා ලෙස පත් කර තිබීම ආණ්ඩුක්රම ව්යවස්ථාව ප්රකාරව මන්ත්රී ධූරය දැරීමට නුසුදුසුකමක් බව නීතිඥවරයා තර්ක කළේය.
එහෙත් වගඋත්තරකාර ආනන්ද විජේපාල වෙනුවෙන් පෙනී සිටි ජනාධිපති නීතිඥ ජෙෆ්රි අලගරත්නම් පෙන්වා දුන්නේ යමෙක් රජයේ සේවකයෙක් ලෙස පිළිගැනීමට නම් ඔහු රජයෙන් කිසියම් ගෙවීමක් හෝ වැටුපක් ලබා තිබිය යුතු බවයි. ආනන්ද විජේපාල කිසිම අවස්ථාවක ජනාධිපති කාර්ය මණ්ඩල ප්රධානියා ලෙස රජයෙන් වැටුපක් ලබාගෙන නැති බවත්, ඔහු ඉටු කර තිබෙන්නේ ගරු සේවයක් බැවින් ඔහුව නීතිය ඉදිරියේ රාජ්ය සේවකයෙක් ලෙස පිළිගත නොහැකි බවත් ජනාධිපති නීතිඥවරයා සඳහන් කළේය. ඒ අනුව මන්ත්රී ධූරයේ නුසුදුසුකමක් උද්ගත නොවන බව ඔහු කියා සිටියේය.
නීතිපතිවරයා වෙනුවෙන් පෙනී සිටි නියෝජ්ය සොලිසිටර් ජෙනරාල් රජීව පෙරේරා වැඩිදුරටත් කරුණු දක්වමින් කියා සිටියේ, රාජ්ය සේවකයෙක් වීම පාර්ලිමේන්තු මන්ත්රී ධූරයක් දැරීමට බාධාවක් වන්නේ ඔහු පාර්ලිමේන්තුවට තේරී පත්වන අවස්ථාවේ දී එම තනතුර දැරුවහොත් පමණක් බවයි. ආනන්ද විජේපාල පාර්ලිමේන්තුවට තේරී පත්වන අවස්ථාවේ දී රාජ්යයේ කිසිදු තනතුරක් දරා නොමැති බැවින් ඔහුට පාර්ලිමේන්තුවට තේරී පත් වීමට, අසුන් ගැනීමට හෝ ඡන්දය ප්රකාශ කිරීමට බාධාවක් සිදුවී නොමැති බව නියෝජ්ය සොලිසිටර් ජෙනරාල්වරයා පෙන්වා දුන්නේය.
කෙසේ වුවද, ඉදිරිපත් වූ සියලු කරුණු සලකා බැලූ ශ්රේෂ්ඨාධිකරණ විනිසුරු මඩුල්ල මෙම අභියාචනය සම්බන්ධයෙන් පූර්ණ විභාගයක් පැවැත්වීමට ඒකමතිකව තීරණය කළේය.
