හැටන් රංජිත් රාජපක්ෂ –
නුවරඑලිය ලංගම ඩිපෝවේ සේවය කල මුරකරුවෙකු ඝාතනය කර ඩිපෝව තුළ බැංකු ගත කිරිමට තිබු රුපියල් ලක්ෂ නවයකට ආසන්න මුදලක් කිසියම් පිරිසක් සොරකම් කිරිම සම්බන්ධයෙන් නුවරඑලිය පොලිසිය විමර්ශනයක් ආරම්භ කර ඇත.
මෙසේ ඝාතනයට ලක් වි ඇත්තේ එම ඩිපෝවේ මුරකරුවෙකු වශයෙන් සේවය කළ නුවරඑලිය ගල්පාය ප්රදේශයේ පදිංචිව සිටි කේ.ලෝගෙෂ්වරන් නැමති 85 හැවිරිදි අයෙකි. මෙවැනි වියපත් අසරණ මනුෂ්යයෙක් මුරකරුවෙක් ලෙස යොදා ගැනීම සම්බන්ධව ද විමර්ශන අංශවල අවධානය යොමු වී ඇත. දෙසැම්බර් මස අධික ශිතල සහිත පරිසරයක මේ වියපත් මනිසා රාත්රී සේවයේ යොදවා තිබිණි.
මුරකරු ඝාතනය කර ඩිපෝවේ අල්මාරියක් තුළ තිබු රු ලක්ෂ නවයකට ආසන්න මුදලක් කිසියම් පිරිසක් රැගෙන ඇති බවට දැනට කර ඇති මුලික විමර්ශන වලදි අනාවරණය වි ඇත.
මුරකරු ඔහුගේ ආරක්ෂක කුටියේ රැදි සිට ඇති බවත්, එම අවස්තාවේ කිසියම් පිරිසක් හෝ පුද්ගලයෙකු තියුණු අයුධයකින් ඔහුගේ හිසට පහර දි ඝාතනය කර මුදල් රැගෙන ගොස් ඇත.
ඝාතනය සිදු වු අවස්ථාවේ එම ඩිපෝවේ ස්ථාන භාර නිලධාරිවරයා සහ මුදල් අයකැමි ඩිපෝව තුළ රැදි සිට ඇතත්, ඔවුන් නින්දට ගොස් සිටියදි මෙම ඝාතනය සිදු කර ඇති බව ඝාතනය සම්බන්ධයෙන් විමර්ශන සිදු කරන නුවරඑලිය පොලිසිය කියා සිටියේය.
ඊයේ (05) දින පස්වරුවේ එම ඩිපෝවේ ධාවනය කළ බස් රථ වල ආදායම බැංකු ගත කිරිම සදහා අල්මාරියේ තබා තිබු බව නුවරඑලිය ලංගම ඩිපෝවේ නිලධාරියෙකු පැවසුවේය.
